ଅଟକିଗଲା ହୃଦୟ ମାଗୁଥିବା ଝିଅ କାହାଣୀକାରଙ୍କ କଲମ
ଆରପାରିରେ ଓଡ଼ିଶା ସାହିତ୍ୟ ଏକାଡେମି ସଚିବ ପ୍ରବୋଧ କୁମାର ରାଉତ

#କଟକ(ଏନ୍‌.ଏମ୍‌.): ଆରପାରିରେ ଓଡିଶା ସାହିତ୍ୟ ଏକାଡେମି ସଚିବ ତଥା ବିଶିଷ୍ଟ ସାରସ୍ୱତ ସାଧକ ପ୍ରବୋଧ କୁମାର ରାଉତ(୫୨) । ତାଙ୍କର ଆଜି ସଂଧ୍ୟାରେ କଟକର ଏକ ଘରୋଇ ଚିକିତ୍ସାଳୟରେ ପରଲୋକ ଘଟିଛି । ତେବେ ୧୬ ତାରିଖ ସକାଳେ କନିକାଛକରେ ଏକ ଦୁର୍ଘଟଣା ହୋଇଥିଲା । ତେବେ ଚିକିତ୍ସାଧୀନ ଅବସ୍ଥାରେ ଆଜି ତାଙ୍କର ପରଲୋକ ଘଟିଛି । ଅନ୍ତିମ ସମୟରେ ପତ୍ନୀ ପୁଷ୍ପଲତା ରାଉତ, ପୁଅ ପ୍ରତିଷ୍ଠ ରାଉତ, ଝିଅ ପ୍ରାଚ୍ୟୁର୍ଯ୍ୟା ରାଉତଙ୍କ ସମେତ ଆତ୍ମୀୟସ୍ୱଜନ ଉପସ୍ଥିତ ଥିଲେ । ତାଙ୍କର ପରଲୋକଗତ ଖବର ପାଇଁ ଜିଲ୍ଲାପାଳ ଡକ୍ଟର ଭବାନୀ ଶଙ୍କର ଚୟନୀଙ୍କ ସମେତ ବହୁ ବିଶିଷ୍ଟ ବ୍ୟକ୍ତି ତାଙ୍କର ଶେଷଦର୍ଶନ କରି ଶ୍ରଦ୍ଧାଞ୍ଜଳି ଅର୍ପଣ କରିଥିଲେ । ସେ ଏକାଧାରରେ ଜଣେ ସୁସାହିତ୍ୟିକ, କବି ନାଟ୍ୟକାର ସହିତ ସୁ ପ୍ରଶାସକ ଥିଲେ । ଓଡ଼ିଶା ପ୍ରଶାସନିକ ସେବାରେ କାର୍ଯ୍ୟକରୁଥିଲେ ମଧ୍ୟ ଶାନ୍ତନୁ ଆଚାର୍ଯ୍ୟ, ଗିରିଜା ବଳିୟାରସିଂହ, ଶିବବ୍ରତ ଦାଶ, ଗୋପାଳ ଛୋଟରାୟଙ୍କ ଦ୍ୱାରା ପ୍ରଭାବିତ ହୋଇ ସେ ସାହିତ୍ୟ ସାଧନା ଆରମ୍ଭ କରିଥିଲେ । କବିତା ଗ୍ରନ୍ଥ ‘ଏକାବନ କବିତା, ମିନି କବିତା ‘ଭୁଲିପାରୁନି ବୋଲି’, ଗୀତ ବହି ‘ହୃଦୟ ସଂଗୀତ’, ଗଳ୍ପ ବହି ‘ଗପସପ,’ ‘ଅଜନ୍ତା ଏଲୋରା ପରୀ’, ହୃଦୟ ମାଗୁଥିବା ଝିଅ’, ନାଟକ ‘ନାଟ୍ୟଶାଳା’, ଇଂରାଜୀ ନାଟକ ‘ମିଷ୍ଟ୍ରି ଅପ ବ୍ରୋଙ୍କ ଟଙ୍କ୍ର’ ଆଦି ତାଙ୍କର ସାରସ୍ୱତ କୃତି । ଏହା ବ୍ୟତୀତ ଅନେକ ପତ୍ରପତ୍ରିକାରେ ତାଙ୍କର ବହୁ ଲେଖା ପ୍ରକାଶ ପାଇଛି । ଶ୍ରୀ ରାଉତ ୧୯୭୧ମସିହାରେ ଜଗତସିଂହପୁର ଜିଲ୍ଲା କଟରା ପଞ୍ଚାୟତ ଗୋପାଳପୁର ଗ୍ରାମରେ ଜନ୍ମଗ୍ରହଣ କରିଥିଲେ । ତାଙ୍କ ବାପା ଧର୍ମାନନ୍ଦ ରାଉତ ପ୍ରାକ୍ତନ ଡାକବିଭାଗ କର୍ମଚାରୀ ଓ ମା’ ପ୍ରମିଳା ରାଉତ ଗୃହିଣୀ । ଗାଁରେ ପ୍ରାଥମିକ ଓ ହାଇସ୍କୁଲ ଶିକ୍ଷା ଶେଷରେ ସେ କଟକ, ଭୁବନେଶ୍ୱରରେ ଉଚ୍ଚଶିକ୍ଷା ଲାଭ କରିଥିଲେ । ଶ୍ରୀ ରାଉତ ଅର୍ଥନୀତିରେ ସ୍ନାତକୋତ୍ତର ଡିଗ୍ରି ସହ ଆଇନରେ ସ୍ନାତକ, ସମବାୟ ପରିଚାଳନା ଓ ରପ୍ତାନି ପରିଚାଳନାରେ ଡିପ୍ଲୋମା ଡିଗ୍ରି ହାସଲ କରିଥିଲେ । ବାଲିଆ କଲେଜରେ ସ୍ୱଳ୍ପ ସମୟ ପାଇଁ ଅଧ୍ୟାପନା କରିବା ପରେ ଓଡିଶା ପ୍ରଶାସନିକ ସେବାରେ ଯୋଗ ଦେଇଥିଲେ । ଓଏଏସ୍ ଅଧିକାରୀ ଭାବେ ସେ କୋରାପୁଟ, ଆସ୍କା, ଅନୁଗୁଳ, ଛେଣ୍ଡିପଦା, ଜଟଣୀ, କଟକ, ଭୁବନେଶ୍ୱରରେ ଦକ୍ଷତାର ସହ କାର୍ଯ୍ୟ କରି ସ୍ୱତନ୍ତ୍ର ପରିଚୟ ସୃଷ୍ଟି କରିଥିଲେ । ଉଲ୍ଲେଖନୀୟ ସାରସ୍ୱତ ସାଧନା ପାଇଁ ଶ୍ରୀ ରାଉତ କଟକ ଆକାଶବାଣୀ ସମେତ ବହୁ ସାରସ୍ୱତ ଅନୁଷ୍ଠାନ ଦ୍ୱାରା ସମ୍ମାନ ଓ ସମ୍ବର୍ଦ୍ଧନା ପାଇଛନ୍ତି । ତାଙ୍କ ପରଲୋକରେ କେନ୍ଦ୍ର ସାହିତ୍ୟ ଏକାଡେମୀ ଓଡିଆ ଉପଦେଷ୍ଟା ମଣ୍ଡଳୀ ଆବାହକ ଡ. ଗୌରହରି ଦାସ, ପ୍ରଫେସର ଡ. ବିଜୟାନନ୍ଦ ସିଂହ, ଉତ୍କଳ ସାହିତ୍ୟ ସମାଜର ସଭାପତି ଡକ୍ଟର ଗୋବିନ୍ଦ ଚାନ୍ଦ, ବିଶିଷ୍ଟ ସାହିତ୍ୟିକ ଡକ୍ଟର ଗୋବିନ୍ଦ ଭୂୟାଁ, ଅଧ୍ୟାପକ ଡକ୍ଟର ବିଜୟ କୁମାର ରାଉତଙ୍କ ସମେତ କଟକ ମହାନଗର ନାଗରିକ ମହାସଭା ସଭାପତି ଡାକ୍ତର ରବିରଞ୍ଜନ ସାହୁ ପ୍ରମୁଖ ଗଭୀର ଶୋକ ପ୍ରକାଶ କରିଛନ୍ତି ।