୫ଟି ଜିଲ୍ଲାରେ ଆଞ୍ଚଳିକ ଜୁଡ଼ିସିଆଲ ଏକାଡେମୀ ଉଦ୍ଘାଟିତ
#କଟକ(ଏନ୍.ଏମ୍.): ସିଡିଏ ସ୍ଥିତ ଓଡ଼ିଶା ଜୁଡିସିଆଲ୍ ଏକାଡେମୀର ଗତିକୃଷ୍ଣ ମିଶ୍ର ପ୍ରେକ୍ଷାଳୟରେ ରାଜ୍ୟର ୫ଟି ଜିଲ୍ଲାରେ ଆଜି ଆଞ୍ଚଳିକ ଜୁଡ଼ିସିଆଲ ଏକାଡେମୀ ଉଦ୍ଘାଟିତ ହୋଇଯାଇଛି । ଜୁଡ଼ିସିଆଲ ଏକାଡେମୀ ପରିସରରେ ଏକ ସ୍ୱତନ୍ତ୍ର କାର୍ଯ୍ୟକ୍ରମରେ ସୁପ୍ରିମକୋର୍ଟର ବିଚାରପତି ସୂର୍ଯ୍ୟକାନ୍ତ ଯୋଗଦେଇ ଅନୁଗୁଳ, ବାଲେଶ୍ୱର, କୋରାପୁଟ, ଗଞ୍ଜାମ ଏବଂ ସମ୍ବଲପୁରରେ ଆଭାସି ମାଧ୍ୟମରେ ଆଞ୍ଚଳିକ ଜୁଡିସିଆଲ ଏକାଡେମୀକୁ ଲୋକାର୍ପଣ କରିଛନ୍ତି । ଏହି ଅବସରରେ ସେ କହିଛନ୍ତି ଯେ ବିଚାର ବିଭାଗର ସମାଜ ପାଇଁ ଗୁରୁ ଦାୟିତ୍ୱ ରହିଛି । ସମଗ୍ର ଦେଶରେ ଓଡ଼ିଶା ପ୍ରଥମ ରାଜ୍ୟ ଯେଉଁ ରାଜ୍ୟରେ ବିଚାର ବିଭାଗରେ ଡିଜିଟାଲ ବ୍ୟବସ୍ଥା ଏବଂ ପେପର୍ ଲେସ୍ କୋର୍ଟ ପ୍ରଚଳନ କରାଯାଇଛି । ଏହି ଉଭୟ ପଦ୍ଧତି ପାଇଁ ଆବଶ୍ୟକୀୟ ପ୍ରଶିକ୍ଷଣ ଦରକାର । ତେଣୁ ବିଚାର ବିଭାଗର ଅଧିକାରୀମାନଙ୍କୁ ଏକାଡେମୀ ପ୍ରଶିକ୍ଷଣ ଯୋଗାଇଦେବ । ଓଡ଼ିଶାରେ ପ୍ରାକୃତିକ ସମ୍ପଦ ଭରପୁର ରହିଛି । ଏହି ପ୍ରାକୃତିକ ସମ୍ପଦକୁ ନେଇ ବିବାଦ ଦେଖାଯାଉଥିବା ବେଳେ ଏହାର ସମାଧାନ ପାଇଁ ଉପଯୁକ୍ତ ପ୍ରଶିକ୍ଷଣ ପ୍ରାସଙ୍ଗିକତା ରହିଛି ବୋଲି ଜଷ୍ଟିସ ସୁର୍ଯ୍ୟକାନ୍ତ କହିଛନ୍ତି । ହାଇକୋର୍ଟର ମୁଖ୍ୟ ବିଚାରପତି ଡକ୍ଟର ଏସ. ମୁରଲୀଧର ଏକ ବିବରଣୀ ଉପସ୍ଥାପନ କରି କହିଲେ ଯେ,ବର୍ତ୍ତମାନ ଡିଜିଟାଲ ଏବଂ ପେପର ଲେସ କୋର୍ଟ ଯୁଗରେ ବିଚାର ବିଭାଗରେ ଆବଶ୍ୟକୀୟ ପ୍ରଶିକ୍ଷଣ ବ୍ୟବସ୍ଥାକୁ ସୁଦୃଢ଼ କରିବା ଦରକାର । ଗତ ୨୦୦୩ ମସିହାରେ କଟକଠାରେ ରାଜ୍ୟର ସର୍ବ ପ୍ରଥମ ଓଡ଼ିଶା ଜୁଡ଼ିସିିଆଲ ଏକାଡେମୀ ଗଠନ ହୋଇଥିଲା । ଓଡ଼ିଶା ସରକାରଙ୍କର ସହାୟତାରେ ଏହି ଏକାଡେମୀକୁ ସମ୍ପ୍ରସାରଣ କରାଯାଉଛି । ଆଜି ପାଞ୍ଚଟି ଜିଲ୍ଲାରେ ଏହି ଏକାଡେମୀ କାର୍ଯ୍ୟ ଆରମ୍ଭ କରିବ ବୋଲି ମୁଖ୍ୟବିଚାରପତି କହିଥିଲେ । ପ୍ରାରମ୍ଭରେ ଓଡ଼ିଶା ହାଇକୋର୍ଟର ବିଚାରପତି ଡକ୍ଟର ବିଦ୍ୟୁତ୍ ରଞ୍ଜନ ଷଡଙ୍ଗୀ ସ୍ୱାଗତ ଭାଷଣ ଦେଇ ଏକାଡେମୀ ସ୍ଥାପନର ଉଦ୍ଦେଶ୍ୟ ଏବଂ ଲକ୍ଷ୍ୟ ସମ୍ପର୍କରେ ସଂକ୍ଷିପ୍ତ ବିବରଣୀ ଉପସ୍ଥାପନ କରିଥିଲେ । ଏହି କାର୍ଯ୍ୟକ୍ରମରେ ଏକାଡେମୀର ଏକ ଭିଡିଓ ଚିତ୍ର ପ୍ରଦର୍ଶିତ କରାଯାଇଥିଲା । ଜଷ୍ଟିସ ବିରଜା ପ୍ରସନ୍ନ ଶତପଥୀ ଧନ୍ୟବାଦ୍ ଦେଇଥିଲେ । ସୂଚନାଯୋଗ୍ୟ ୨୦୦୩ ମସିହାରେ ପ୍ରଥମକରି ରାଜ୍ୟରେ ଓଡ଼ିଶା ଜୁଡ଼ିସିଆଲ ଏକାଡେମୀ ସ୍ଥାପନ କରାଯାଇଥିଲା । ବିଚାର ବିଭାଗରେ ଗୁଣାତ୍ମକ ଆଇନ୍ ବିଦ୍ୟା ଶିକ୍ଷାର ଲକ୍ଷ୍ୟ ରଖି ଏହି ଏକାଡେମୀ ଗଠନ କରାଯାଇଥିଲା । ଉକ୍ତ ଏକାଡେମୀରେ ଜିଲ୍ଲା ଜଜ୍ଠାରୁ ଆରମ୍ଭ କରି ବିଚାର ବିଭାଗର ଅଧିକାରୀମାନଙ୍କୁ ପ୍ରଶିକ୍ଷଣ ଦିଆଯାଉଥିବା ବେଳେ ଏବେ ଏକାଡେମୀକୁ ବିଭିନ୍ନ ଜିଲ୍ଲାକୁ ସମ୍ପ୍ରସାରଣ କରାଯାଉଛି ।