ଆଇପିଏଲ୍: ଡୁପ୍ଲେସି ଓ ସିରାଜ ଆରସିବିକୁ ଜିତାଇଲେ
#ହାଇଦ୍ରାବାଦ(ଏନ୍.ଏମ୍.): ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ରେ ଗୁରୁବାର ଅନୁଷ୍ଠିତ ପ୍ରଥମ ତଥା ଟୁର୍ଣ୍ଣାମେଣ୍ଟର ୨୭ତମ ମ୍ୟାଚ୍ରେ ଆରସିବି ବିଜୟୀ ହୋଇଛି । ବ୍ୟାଟିଂରେ ଇମ୍ପାକ୍ଟ ପ୍ଲେୟାର ଫାପ ଡୁପ୍ଲେସିଙ୍କ ଧୂଆଁଧାର ଅର୍ଦ୍ଧଶତକ(୮୪) ଓ ବୋଲିଂରେ ମହମ୍ମଦ ସିରାଜଙ୍କ ୪ ୱିକେଟ୍ (୪-୦-୨୧-୪) ବଳରେ ଚଳିତ ଆଇପିଏଲରେ ଆରସିବି ତୃତୀୟ ଜିତ୍ ହାସଲ କରିଛି । ଏହି ମ୍ୟାଚରେ ଆରସିବି ପକ୍ଷରୁ ଧାର୍ଯ୍ୟ ୧୭୫ରନର ବିଜୟ ଲକ୍ଷ୍ୟକୁ ପିଚ୍ଛା କରି ପଞ୍ଜାବ କିଙ୍ଗ୍ ୧୮.୨ ଓଭରରେ ସମସ୍ତ ୱିକଟେ ହରାଇ ୧୫୦ରନରେ ସୀମିତ ରହି ଯାଇଥିଲା । ପଞ୍ଜାବ ପକ୍ଷରୁ ଇମ୍ପାକ୍ଟ ପ୍ଲେୟାର ପ୍ରଭସିମରନ ସିଂ ୪୬ରନ୍ କରିଥିବାବେଳେ ୱିକେଟ୍ କିପର ଜିତେଶ ଶର୍ମା ୪୧ରନର ଇନିଂସ ଖେଳିଥିଲେ । ସେହିପରି ସିରାଜ ୪ଟି, ହାସାରାଙ୍ଗା ୨ଟି ୱିକେଟ ଅକ୍ତିଆର କରିଥିଲେ ।
ପୂର୍ବରୁ ପଞ୍ଜାବ କିଙ୍ଗ୍ ଟସ୍ ଜିତି ଫିଲ୍ଡିଂ କରିବାକୁ ନିଷ୍ପତ୍ତି ନେଇଥିଲା । ଆରସିବି ପକ୍ଷରୁ ଅଧିନାୟକ ବିରାଟ କୋହଲି ଓ ଡୁପ୍ଲେସି ଓପନିଂ କରିବାକୁ ଆସି ପ୍ରଥମ ୱିକେଟ ପାଇଁ ୧୬ ଓଭରରୁ ୧୩୭ରନ୍ ସଂଗ୍ରହ କରିଥିଲେ । ଏହାପରେ ବିରାଟ୍ ୪୭ବଲରୁ ୫ଚୌକା ଓ ଗୋଟିଏ ଛକା ସହାୟତାରେ ୫୯ରନ୍ କରି ଆଉଟ୍ ହୋଇଥିଲେ । ତେବେ ପରବର୍ତ୍ତୀ ସମୟରେ ଡୁପ୍ଲେସିଙ୍କ ବ୍ୟତୀତ ଅନ୍ୟ କୌଣସି ବ୍ୟାଟର ବଡ଼ ସଟ୍ ଖେଳିବାରେ ସଫଳ ନହେବାରୁ ଦଳ ନିର୍ଦ୍ଧାରିତ ଓଭରରେ ୪ ୱିକେଟ୍ ହରାଇ ୧୭୪ରନ କରିବାକୁ ସମର୍ଥ ହୋଇଥିଲା । ଏହି ବିଜୟରୁ ଆରସିବି ୨ ପଏଣ୍ଟ ହାସଲ କରି ଟୁର୍ଣ୍ଣାମେଣ୍ଟରେ ମୋଟ୍ ୬ ପଏଣ୍ଟ ସହ ପଏଣ୍ଟ ଟେବଲର ୫ମ ସ୍ଥାନରେ ପହଞ୍ଚିଛି ।