କଳିଙ୍ଗ ମ୍ୟାଜିକ ସର୍କଲ ପକ୍ଷରୁ ହାସ୍ୟ ଅଭିନେତା ଜୟୀରାମ ସାମଲଙ୍କୁ ସମ୍ବର୍ଦ୍ଧନା
#କଟକ(ଏନ୍.ଏମ୍.): କଳିଙ୍ଗ ମ୍ୟାଜିକ ସର୍କଲ ପକ୍ଷରୁ ବିଶିଷ୍ଟ ଯାଦୁକର ସ୍ୱର୍ଗତ ପିଏଲ ସୁନ୍ଦରକାଙ୍କ ସ୍ମୃତି ଦିବସ ଅବସରରେ ୮ମ ମ୍ୟାଜିକ ଡେ ପାଳିତ ହୋଇଯାଇଛି । ସ୍ଥାନୀୟ ବାଣୀପୀଠ ଶ୍ରୀରାମଚନ୍ଦ୍ର ଭବନରେ ଆୟୋଜିତ ଏହି କାର୍ଯ୍ୟକ୍ରମରେ ରାଜ୍ୟର ବିଭିନ୍ନ କୋଣ ଅନୁକୋଣରୁ ୧୦୨ଜଣ ଯାଦୁକର ଯୋଗଦେଇ ନିଜ ନିଜର ଯାଦୁ ପ୍ରଦର୍ଶନ କରିଥିଲେ । ସର୍କଲର ସମ୍ପାଦକ ତଥା ବିଶିଷ୍ଟ ଯାଜୁକର ବାପୁ ଲେଙ୍କାଙ୍କ ପୌରହିତ୍ୟରେ ଆୟୋଜିତ ଏହି କାର୍ଯ୍ୟକ୍ରମରେ ମୁଖ୍ୟଅତିଥି ଭାବେ ସୁନିଲ ମୁରାରକା ଯୋଗଦେଇ ଏହି ଯାଦୁ ଭଳି ଗୋଟିଏ କୌତୁକ ପ୍ରଦର୍ଶନର ଉନ୍ନତି କାମନା କରିବା ସହ ଆଜିର ଯୁବପୀଢ଼ି ଯାଦୁଖେଳ ଉପରେ ପାରଦର୍ଶିତା ହାସଲ କରିବା ଉଚିତ ବୋଲି କହିଥିଲେ । ସମ୍ମାନିତ ଅତିଥି ଭାବେ ବିଶିଷ୍ଟ ସିନେ ତାରକା ହାସ୍ୟ ଜଗତର ମଉଡ଼ମଣି ତଥା ଅନନ୍ୟ ଯାଦୁକର ଜୟୀରାମ ସାମଲ ଯୋଗଦେଇ ଆଜିର ଯାଦୁକରମାନେ ନିଜର କଳା ପ୍ରଦର୍ଶନ କରିବାକୁ ଉପଯୁକ୍ତ ପ୍ଲାଟଫର୍ମ ପାଉନଥିବା ଯୋଗୁ ଏହି କଳାର ଉନ୍ନତି ହୋଇପାରୁନଥିବା କହିଥିଲେ । ଆଗାମୀ ଦିନରେ ଯାଦୁକରମାନଙ୍କୁ ମଧ୍ୟ ସରକାର ସ୍ୱତନ୍ତ୍ର ପ୍ରୋତ୍ସାହନ ବ୍ୟବସ୍ଥା କରିବା ଆବଶ୍ୟକ ବୋଲି ଉପସ୍ଥିତ ଯାଦୁକରମାନେ ମତପ୍ରକାଶ କରିଥିଲେ । ଏହି ଅବସରରେ କଳିଙ୍ଗ ମ୍ୟାଜିକ ସର୍କଲ ଦ୍ୱାରା ହାସ୍ୟ ଅଭିନେତା ତଥା ଯାଦୁକର ଶ୍ରୀ ସାମଲ ଏବଂ ଅନୁଷ୍ଠାନ ସଭାପତି ଯାଦୁକର ନିରଞ୍ଜନ ଦାସଙ୍କୁ ସମ୍ବର୍ଦ୍ଧିତ କରାଯାଇଥିଲା ।