କଟକ ରେଳଷ୍ଟେସନ ହେବ ବିଶ୍ୱସ୍ତରୀୟ
ଉନ୍ନୟନ କାର୍ଯ୍ୟ ତୁରନ୍ତ ସମ୍ପୂର୍ଣ୍ଣ କରିବାକୁ କେନ୍ଦ୍ର ରେଳ ମନ୍ତ୍ରୀଙ୍କ ନିର୍ଦ୍ଦେଶ
#କଟକ(ଏନ୍.ଏମ୍.): କଟକ ରେଳଷ୍ଟେସନକୁ ବିଶ୍ୱସ୍ତରୀୟ ଷ୍ଟେସନରେ ପରିଣତ କରାଯିବା ପାଇଁ ଉନ୍ନୟନ କାର୍ଯ୍ୟ ଆରମ୍ଭ ହୋଇଯାଇଛି । ୩୦୦ କୋଟି ଟଙ୍କା ଅନୁଦାନରେ ଚାଲିଥିବା ଏହି କାର୍ଯ୍ୟ ଶେଷ କରିବାକୁ ଏକ ବର୍ଷ ସମୟ ଧାର୍ଯ୍ୟ କରାଯାଇଛି । ପ୍ରାଥମିକ ପର୍ଯ୍ୟାୟରେ ଷ୍ଟେସନର ପୂର୍ବ ଓ ପଶ୍ଚିମ ପାଶ୍ୱର୍ ପ୍ରବେଶ ପଥ ଉନ୍ନୟନ କାର୍ଯ୍ୟ ଏବେ ଚାଲିଛି । କେନ୍ଦ୍ର ରେଳ ମନ୍ତ୍ରୀ ଅଶ୍ୱିନୀ ବୈଷ୍ଣବ ଆଜି ସନ୍ଧ୍ୟାରେ କଟକ ରେଳଷ୍ଟେସନ ପରିଦର୍ଶନ କରି ଉନ୍ନୟନ କାର୍ଯ୍ୟ ତୁରନ୍ତ ସମ୍ପୂର୍ଣ୍ଣ କରିବାକୁ ବିଭାଗୀୟ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି । ଯାତ୍ରୀମାନେ ସିଧାସଳଖ ଜାତୀୟ ରାଜପଥରୁ ପୂର୍ବପାଶ୍ୱର୍ ପଥରେ ଷ୍ଟେସନକୁ ପ୍ରବେଶ ନିମନ୍ତେ ଚାଲିଥିବା କାର୍ଯ୍ୟ ଓ ପଶ୍ଚିମ ପାଶ୍ୱର୍ ପ୍ରବେଶ ପଥର କାର୍ଯ୍ୟ ଅଗ୍ରଗତି ସମ୍ପର୍କରେ ରେଳମନ୍ତ୍ରୀ ଶ୍ରୀ ବୈଷ୍ଣବ ତଦାରଖ କରିଛନ୍ତି । ଷ୍ଟେସନ ପରିସରରେ ଯାତ୍ରୀମାନଙ୍କୁ ରେଳବାଇର ସୁବିଧା ଓ ସେବା ଷ୍ଟେସନର ପରିସ୍କାର, ପରିଚ୍ଛନ୍ନତା ବାବଦରେ ଯାତ୍ରୀମାନଙ୍କଠାରୁ ସେ ସିଧାସଳଖ ପଚାରି ବୁଝିଥିଲେ । ଏଥିସହ ରେଳ କର୍ମଚାରୀମାନଙ୍କ ସହ ଆଲୋଚନା ସମସ୍ୟା ପଚାରି ବୁଝିଥିଲେ । କେନ୍ଦ୍ର ରେଳମନ୍ତ୍ରୀ ଶ୍ରୀ ବୈଷ୍ଣବ ପରିିଦର୍ଶନ ଅବସରରେ କହିଲେ ଯେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଭାରତର ବିଭିନ୍ନ ରେଳଷ୍ଟେସନକୁ ବିଶ୍ୱସ୍ତରୀୟ ଷ୍ଟେସନ କରିବା ପାଇଁ ପରିକଳ୍ପନା କରୁଛନ୍ତି । ଏହି ପରିକଳ୍ପନା ଏବେ ସଫଳ ହୋଇଛି । କଟକ ରେଳଷ୍ଟେସନର ଉଭୟ ପାଶ୍ୱର୍ ଉନ୍ନତିକରଣ କାର୍ଯ୍ୟ ଆରମ୍ଭ ହୋଇଯାଇଛି । କଟକ ରେଳଷ୍ଟେସନର ମୁଖ୍ୟ ପ୍ରବେଶ ପଥକୁ ଅଧିକ ଆକର୍ଷଣୀୟ କରାଯିବା ନିମନ୍ତେ ଉନ୍ନତିକରଣ କାମ ଆରମ୍ଭ ହୋଇଯାଇଛି । ଖୁବ ଶୀଘ୍ର ଏହା ସମ୍ପୂର୍ଣ୍ଣ ହେବ । ଭାରତରେ ୫୦୮ଟି ରେଳଷ୍ଟେସନକୁ ବିଶ୍ୱସ୍ତରୀୟ ଷ୍ଟେସନ ଭାବରେ ପରିଣତ କରିବା ପାଇଁ ଶିଳାନ୍ୟାସ କରାଯାଇଛି । ତେଣୁ କଟକ ରେଳ ଷ୍ଟେସନକୁ ନବୀକରଣ କରାଯାଇ ଏହାକୁ ବିଶ୍ୱସ୍ତରୀୟ ଷ୍ଟେସନରେ ପରିଣତ କରାଯିବ । ଏହାଦ୍ୱାରା ପ୍ରଧାନ ମନ୍ତ୍ରୀଙ୍କ ପରିକଳ୍ପନା ସଫଳ ହେବ ବୋଲି ଶ୍ରୀ ବୈଷ୍ଣବ ପ୍ରକାଶ କରିଛନ୍ତି । ରେଳମନ୍ତ୍ରୀଙ୍କ ଗସ୍ତ ସମୟରେ ପୂର୍ବତଟ ରେଳପଥର ସାଧାରଣ ପରିଚାଳକ ମନୋଜ ଶର୍ମା, ଖୋର୍ଦ୍ଧାରୋଡ୍ ଡିଭିଜନ୍ର ମଣ୍ଡଳ ରେଳ ପ୍ରବନ୍ଧକ ଏଚ୍. ଏସ୍. ବାଜୱା, କଟକ ଷ୍ଟେସନ ମ୍ୟାନେଜର ମଳୟ କୁମାର ଆଚାର୍ଯ୍ୟଙ୍କ ସମେତ ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ ।