ପରଲୋକରେ ପୂର୍ବତନ ଶିଳ୍ପ ବିକାଶ ଅଧିକାରୀ ରମେଶ ଚନ୍ଦ୍ର ସାମଲ
#ଭୁବନେଶ୍ୱର (ଏନ୍.ଏମ୍.): ପୂର୍ବତନ ଶିଳ୍ପ ବିକାଶ ଅଧିକାରୀ(ଆଇ.ପି.ଓ) ରମେଶ ଚନ୍ଦ୍ର ସାମଲଙ୍କ ଗତ ଜୁନ୍ ୨୬ ତାରିଖରେ ୭୨ବର୍ଷ ବୟସରେ ପରଲୋକ ହୋଇଯାଇଛି । ସ୍ୱର୍ଗତ ସାମଲ ହସ୍ତଶିଳ୍ପ ଓ କୁଟୀର ଶିଳ୍ପ ନିର୍ଦ୍ଦେଶାଳୟ, ଓଡିଶା ଅଧିନରେ ୧୯୮୦ ମସିହାରେ ସରକାରୀ ଚାକିରୀରେ ଯୋଗଦାନ କରି ୨୦୧୦ମସିହାରେ ଅବସର ଗ୍ରହଣ କରିଥିଲେ । ସେ ଦୀର୍ଘ ବର୍ଷ ଧରି ଭୁବନେଶ୍ୱର ବ୍ଲକରେ ଆଇ.ପି.ଓ ଭାବରେ ନିଷ୍ଠାର ସହ କାର୍ଯ୍ୟ ସମ୍ପାଦନ କରିଥିଲେ । ଯାଜପୁର ଜିଲ୍ଲା ବ୍ରହ୍ମବରଦା ନିକଟସ୍ଥ ନୁନୁପୁର ଗ୍ରାମର ମୂଳ ନିବାସୀ ସ୍ୱର୍ଗତ ଶ୍ରୀ ସାମଲ ରସୁଲଗଡ ସ୍ଥିତ ନିଗମାନନ୍ଦ ନଗରରେ ସପରିବାର ରହୁଥିଲେ । ତାଙ୍କର ପତ୍ନୀ, ଦୁଇ ଝିଅ, ଜ୍ୱାଇଁ, ପୁଅ, ପୁତ୍ରବଧୂ ଏବଂ ନାତି ନାତୁଣୀ ଅଛନ୍ତି । ଜଣେ ସରଳ, ଅମାୟିକ ଓ ଲୋକପ୍ରିୟ ବ୍ୟକ୍ତି ଭାବେ ଜଣାଶୁଣା ସ୍ୱର୍ଗତ ସାମଲ କିଛି ବର୍ଷ ଧରି ନିଗମାନନ୍ଦ ନଗରସ୍ଥିତ ମଙ୍ଗଳେଶ୍ୱର ଶିବ ମନ୍ଦିରର ସଭାପତି ଭାବେ କାର୍ଯ୍ୟ ତୁଲାଉଥିଲେ । ତାଙ୍କ ବିୟୋଗରେ ସ୍ଥାନୀୟ ରସୁଲଗଡ ଅଞ୍ଚଳ ଓ ନିଜ ଗ୍ରାମ ସମେତ ବନ୍ଧୁ, ପରିବାରବର୍ଗ ଓ ଆତ୍ମୀୟସ୍ୱଜନଙ୍କ ତରଫରୁ ଗଭୀର ଶୋକ ପ୍ରକାଶ କରାଯାଇ ଦିବଂଗତ ଆତ୍ମାର ସଦଗତି କାମନା କରାଯାଇଛି ।