News by Padmalochan Mishra (Cuttack)

ବାହାନଗା ରେଳ ଦୁର୍ଘଟଣା: ଏସସିବିରେ ଚିକିତ୍ସାଧୀନ ଅବସ୍ଥାରେ  ଆଉ ଜଣଙ୍କର ମୃତ୍ୟୁ 

News by Padmalochan Mishra (Cuttack)

#କଟକ(ଏନ୍‌.ଏମ୍‌.): ବାହାନଗା ରେଳ ଦୁର୍ଘଟଣାରେ ଆହତ ହୋଇ ଏସସିବିରେ ଚିକିତ୍ସାଧୀନ ଅବସ୍ଥାରେ ଆଉ ଜଣଙ୍କର ମୃତ୍ୟୁ ହୋଇଛି । ମୃତକ ଜଣକ ବିହାର ବାସିନ୍ଦା ପ୍ରକାଶ ରାମ (୧୭) ବୋଲି ମେଡ଼ିକାଲ ସୂତ୍ରରୁ ସୂଚନା ମିଳିଛି । ପ୍ରକାଶଙ୍କର ଆସିୟୁରେ ଚିକିତ୍ସା ଚାଲିଥିବା ବେଳେ ତାଙ୍କର ମୃତ୍ୟୁ ହୋଇଥିବା କଟକ ବଡ଼ମେଡ଼ିକାଲ (ଏସସିବି)ର କୁଳ ସଚିବ ଡକ୍ଟର ଅବିନାଶ ରାଉତ ପ୍ରକାଶ କରିଛନ୍ତି । ଏହାକୁ ମିଶାଇ ଏସସିବିରେ ଦୁଇ ଜଣଙ୍କ ମୃତ୍ୟୁ ହୋଇଛି । ଚିକିତ୍ସା ସମୟରେ ୨ଜଣଙ୍କ ମୃତ୍ୟୁ ହେବା ପରେ ବାହାନଗା ଟ୍ରେନ ଟ୍ରାଜେଡିରେ ମୃତ୍ୟୁ ସଂଖ୍ୟା ୨୯୦ରେ ପହଞ୍ଚିଥିବା ଜଣାପଡ଼ିଛି ।
ସୂଚନା ଯୋଗ୍ୟ ଯେ, ବାଲେଶ୍ୱର ଜିଲ୍ଲା ବାହାନଗାରେ ଗତ ୨ ତାରିଖ ଦିନ ଘଟିଥିବା କରମଣ୍ଡଳ ଏକ୍ସପ୍ରେସ୍‌, ଯଶୋବନ୍ତପୁର-ହାୱଡା ଏକ୍ସପ୍ରେସ୍ ଓ ମାଲଗାଡ଼ି ଦୁର୍ଘଟଣାଜନିତ ମୃତ୍ୟୁ ସଂଖ୍ୟା ୨୮୮ ଥିବାବେଳେ ଆଉ ୨ ବୃଦ୍ଧି ପାଇଛି । ବିଭିନ୍ନ ସ୍ଥାନରେ ଆହୁରି ପ୍ରାୟ କେତେକ ଲୋକଙ୍କର ଚିକିତ୍ସା ଜାରି ରହିଛି । ପୂର୍ବରୁ ବିଜୟ ପାଶୱାନ ନାମକ ଜଣେ ଆହତଙ୍କର ଚିକିତ୍ସାଧୀନ ଅବସ୍ଥାରେ ମୃତ୍ୟୁ ଘଟିଥିଲା । ତାଙ୍କ ଘର ବିହାର ଅଞ୍ଚଳରେ । ଦୁର୍ଘଟଣା ଦିନ ତାଙ୍କୁ ଗୁରୁତର ଅବସ୍ଥାରେ କଟକ ଏସସିବି ମେଡିକାଲକୁ ସ୍ଥାନାନ୍ତର କରାଯାଇଥିଲା । ଏସସିବିର ସେଣ୍ଟ୍ରାଲ ଆଇସିୟୁରେ ରହି ଚିକିତ୍ସିତ ହେଉଥିଲେ । ମୃତକ ବିଜୟଙ୍କର ସ୍ପାଇନାଲ ଇଞ୍ଜୁରୀ ଥିଲା । ତାଙ୍କୁ ଭେଣ୍ଟି ଲେଟରରେ ରଖାଯାଇଥିଲା । ତେବେ ବର୍ତ୍ତମାନ ସୁଦ୍ଧା ଏସସିବିରେ ଦୁଇ ଜଣଙ୍କ ମୃତ୍ୟୁ ହୋଇଛି । ଅନ୍ୟପକ୍ଷରେ ବାହାନଗା ଟ୍ରେନ ଟ୍ରାଜେଡିରେ ମୃତ ମୋଟ ଯାତ୍ରୀଙ୍କ ମଧ୍ୟରୁ ଏବେବି ୮୧ ଜଣ ମୃତକଙ୍କ ଚିହ୍ନଟ ପ୍ରକ୍ରିୟା ଶେଷ ହୋଇନାହିଁ । ଭୁବନେଶ୍ୱରସ୍ଥିତ ଏମସ ପରିସରରେ ଏହି ଶବ ସଂରକ୍ଷିତ ହୋଇ ରହିଛି । ସେଥିରୁ ୭୫ଜଣ ମୃତକଙ୍କ ଦାବିଦାର ଭାବେ ତାଙ୍କ ପ୍ରିୟଜନଙ୍କ ଡିଏନଏ ନମୂନା ସଂଗ୍ରହ କରାଯାଇ ଦିଲ୍ଲୀ ପଠାଯାଇଥିବା ଜଣାପଡ଼ିଛି । ରିପୋର୍ଟ ଆସିଲେ ମୃତ ବ୍ୟକ୍ତିଙ୍କ ଶବ ତାଙ୍କ ଆତ୍ମୀୟ ସ୍ୱଜନକୁ ପ୍ରଦାନ କରାଯିବ ।

By admin

Leave a Reply

Your email address will not be published. Required fields are marked *