ଖୁଚୁରା ବିକ୍ରେତାଙ୍କ ଦାବି ସମ୍ପର୍କରେ ଜିଲ୍ଲାପ୍ରଶାସନ ସହ ଆଲୋଚନା

#କଟକ(ଏନ୍‌.ଏମ୍‌.): କଟକ ମହାନଗର ନିଗମ ଅଞ୍ଚଳର କାର୍ଯ୍ୟ ରତ ଖୁଚୁରା ବିକ୍ରେତାମାନଙ୍କ ବିଭିନ୍ନ ସମସ୍ୟା ନେଇ ଆଜି କଟକ ରିଟେଲ ଡିଲର୍ସ ଆସୋସିଏସନର କର୍ମକର୍ତ୍ତା ଜିଲ୍ଲା ପ୍ରଶାସନ ସହ ଏକ ଗୁରୁତ୍ୱପୂର୍ଣ୍ଣ ବୈଠକ ଅନୁଷ୍ଠିତ ହୋଇଯାଇଛି । ଜିଲ୍ଲାପାଳ ଡକ୍ଟର ଭବାନୀ ଶଙ୍କର ଚୟନୀଙ୍କ ନିର୍ଦ୍ଦେଶକ୍ରମେ ସଂଘର କର୍ମକର୍ତ୍ତାମାନେ ଜିଲ୍ଲାଯୋଗାଣ ବିଭାଗ ଅଧିକାରୀଙ୍‌କ ସହ ସବିଶେଷ ଆଲୋଚନା କରିଥିଲେ । ତେବେ ଜିଲ୍ଲା ଯୋଗାଣ ଅଧିକାରୀ ଏ ନେଇ ସରକାରଙ୍କ ନିକଟରେ ଉପସ୍ଥାପନ କରିବା ପାଇଁ ପ୍ରତିଶ୍ରୁତି ଦେଇଛନ୍ତି ।
ସୂଚନା ଯୋଗ୍ୟ ଯେ, କଟକ ମହାନଗର ନିଗମ ଅଞ୍ଚଳରେ କାର୍ଯ୍ୟରତ ଖୁଚୁରା ବିକ୍ରେତାମାନେ ୫ଦଫା ଦାବି ନେଇ ଗତ ୧୮ତାରିଖ ଦିନ କଟକ ଜିଲ୍ଲା ଯୋଗାଣ ଅଧିକାରୀଙ୍କୁ ଏକ ସ୍ମାରକପତ୍ର ପ୍ରଦାନ କରାଯାଇ ଥିଲା । ଏସମ୍ପର୍କରେ ଚୌଦ୍ୱାର-କଟକ ପୂର୍ବତନ ବିଧାୟକ ଡକ୍ଟର ପ୍ରଭାତ ରଞ୍ଜନ ବିଶ୍ୱାଳ ଅବଗତ ହେବା ପରେ ଏ ବିଷୟରେ କଟକ ଜିଲ୍ଲାପାଳ ଡକ୍ଟର ଚୟନୀଙ୍କ ଦୃଷ୍ଟି ଆକର୍ଷଣ କରିଥିଲେ । ତଦନୁଯାୟୀ ଆଜି ଏସମ୍ପର୍କରେ ବିଷଦ ଆଲୋଚନା କରିବା ପାଇଁ କଟକ ଜିଲ୍ଲାପାଳଙ୍କ କାର୍ଯ୍ୟାଳୟରେ ଯୋଗାଣ ବିଭାଗ ଅଧିକାରୀଙ୍କ ସହ ଏକ ମିଳିତ ବୈଠକ ଅନୁଷ୍ଠିତ ହୋଇଥିଲା । ଏହି ବୈଠକରେ ଜିଲ୍ଲାପାଳ ଡକ୍ଟର ଚୟନୀଙ୍କ ସମେତ ଜିଲ୍ଲା ଯୋଗାଣ ଅଧିକାରୀ ମାନସ କୁମାର ମହାପାତ୍ର କଟକ ରିଟେଲ ଡିଲର୍ସ ଆସୋସିଏସନର କାର୍ଯ୍ୟକାରୀ ସଭାପତି ସୟଦ ଏକ୍ରାମ ହୁସେନ୍‌, ଉପସଭାପତି ପୀତବାସ ଜେଠୀ, ସହ ସମ୍ପାଦକ ବିଜୟ କୁମାର ସାହୁ, ତାପସ ମହାନ୍ତି, ବାଇନ ବିଶ୍ୱାଳ ପ୍ରମୁଖ ଯୋଗଦେଇ ଦାବି ସମ୍ପର୍କରେ ଜିଲ୍ଲାପାଳଙ୍କୁ ଅବଗତ କରିବା ସହ ତୁରନ୍ତ ପୂରଣ ପାଇଁ ଅନୁରୋଧ କରିଥିଲେ । ଜିଲ୍ଲାପାଳ ଡକ୍ଟର ଚୟନୀ ଏ ସମ୍ପର୍କରେ ବିହିତ ପଦକ୍ଷେପ ଗ୍ରହଣ ପାଇଁ ଜିଲ୍ଲା ଯୋଗାଣ ଅଧିକାରୀଙ୍କୁ ନିର୍ଦ୍ଦେଶ ଦେବାସହ ଆବଶ୍ୟକ ହେଲେ ଏ ବିଷୟରେ ସରକାରଙ୍କୁ ଜଣାଇବାକୁ ପରାର୍ମଶ ଦେଇଥିଲେ । କଟକ ରିଟେଲ ଡିଲର୍ସ ଆସୋସିଏସନ କର୍ମକର୍ତ୍ତା ଆଲୋଚନା ପ୍ରସଙ୍ଗରେ ଚଳିତ ଜୁନ ମାସ ୩୦ ତାରିଖ ସୁଦ୍ଧା ଦାବି ଗୁଡ଼ିକ ପୂରଣ କରା ନଗଲେ ଆଗାମୀ ଜୁଲାଇ ପହିଲାରୁ କୌଣସି ସାମଗ୍ରୀ ଉଠାଣ ଅଥବା ବଣ୍ଟନ ନକରିବା ଦାବି ଦୋହରାଇଥିଲେ । ତେବେ ଚୌଦ୍ୱାର-କଟକ ପୂର୍ବତନ ବିଧାୟକ ଡକ୍ଟର ପ୍ରଭାତ ରଞ୍ଜନ ବିଶ୍ୱାଳ ଏବଂ କଟକ ଜିଲ୍ଲାପାଳଙ୍କ ପକ୍ଷରୁ କାର୍ଯ୍ୟରତ ଖୁଚୁରା ବିକ୍ରେତା ମାନଙ୍କ ଦାବି ପ୍ରତି ସହାନୁଭୂତି ପ୍ରର୍ଦଶନ ପାଇଁ ଆସୋସିଏସନ ପକ୍ଷରୁ ଡକ୍ଟର ବିଶ୍ୱାଳ ଓ ଜିଲ୍ଲାପାଳ, ଯୋଗାଣ ଅଧିକାରୀଙ୍କୁ କୃତଞତା ଜ୍ଞାପନ କରାଯାଇଛି ।