ଆଠଗଡ଼ ପାଇଁ ଗର୍ବ: ଜର୍ମାନୀରେ ହେବାକୁ ଥିବା ଅଲମ୍ପିକ୍ସ କ୍ରୀଡ଼ାରେ ଭାଗ ନେବେ କଳ୍ପନା
#ଆଠଗଡ଼(ଏନ୍.ଏମ୍.): କଟକ ଜିଲ୍ଲା ଆଠଗଡ଼ ବ୍ଲକ୍ ଖୁଣ୍ଟକଟା ପଞ୍ଚାୟତ ଅଧୀନ ରେଗେଡାପଡ଼ା ଗାଁ ର ଝିଅ କଳ୍ପନା ଜେନା । ଆଜି ଆଠଗଡ଼ ପାଇଁ ଗର୍ବ ପାଲଟିଛନ୍ତି । ଚାଷୀ ପରିବାରରେ ଜନ୍ମଗ୍ରହଣ କରିଥିବା ଏହି ଝିଅ ଏବେ ଯିବେ ଚଳିତ ବର୍ଷ ଜର୍ମାନୀରେ ହେବାକୁ ଥିବା ଅଲମ୍ପିକ୍ସ କ୍ରୀଡ଼ାର ସାଇକେଲ ଚାଳନାରେ ଭାଗ ନେବାକୁ । ଛୋଟ ବେଳୁ ସାଇକେଲ ଚାଳନାରେ ଥିଲା ଅନେକ ବୁର୍ବଳତା । ହେଲେ ବାପା ଗଦାଧର ଜେନା ଜଣେ କ୍ଷୁଦ୍ର ଚାଷୀ ହୋଇଥିବାରୁ ଝିଅ କଳ୍ପନା ପାଇଁ ଏକ ସାଇକେଲ ଯୋଗାଡ଼ କରିବା ପାଇଁ ସମ୍ବଳ ନଥିଲା । କିନ୍ତୁ ନିଜର ମନୋବଳ ଦୃଢ଼ ରଖି ସାଙ୍ଗ ସାଥି ମାନଙ୍କୁ ସାଇକେଲ ମାଗି ନିଜର ସାଇକେଲ ଚାଳନା ଅବ୍ୟାହତ ରଖିଥିଲେ ।
ଜଣେ ଭଲ ସାଇକେଲ ଚାଳକ ଭାବରେ ପ୍ରଥମେ ନିଜ ଜିଲ୍ଲା ଓ ରାଜ୍ୟ ପାଇଁ ଗୌରବ ଅର୍ଜନ କରିଥିଲେ । ପରେ ଦେଶର ବିଭିନ୍ନ ରାଜ୍ୟକୁ ଯାଇ ନିଜର କଳା ପ୍ରଦର୍ଶନ କରି ମନୋନୟନକାରୀମାନଙ୍କ ମନ ଜିଣି ପାରିଥିଲେ । ଯାହାର ଫଳ ସ୍ୱରୂପ କଳ୍ପନା ଆସନ୍ତା ମାସରେ ଦିଲ୍ଲୀ ଯିବେ ଓ ପରେ ଜର୍ମାନୀ ପାଇଁ ନିଜର ରାସ୍ତା ବାଛିବେ । ଅତି ଗରିବ ପରିବାରରେ ଜନ୍ମ ନେଇ ଥିବା କଳ୍ପନାକୁ ବହୁ ଦୁଃଖ କଷ୍ଟରେ ମଣିଷ କରିଛନ୍ତି ତାଙ୍କ ବାପା ମା’ । ଭଲ ଘର ଖଣ୍ଡେ ନାହିଁ ଏହି ପରିବାର ପାଖରେ । ବାପା ଗଦାଧର ଜେନା ନିଜର କିଛି ପୈତୃକ ଜମିରେ ଚାଷ କରି ନିଜର ପରିବାର ପୋଷଣ କରିଥାନ୍ତି । କିନ୍ତୁ ଝିଅର ଏହି ସଫଳତା ଆଜି ତାଙ୍କ ପରିବାରକୁ ଲୋକଲୋଚନକୁ ଆଣିପାରିଛି । କଳ୍ପନାଙ୍କ ଜର୍ମାନୀ ପାଇଁ ପ୍ରସ୍ତାବ ଆସିବା ପରେ ଆଠଗଡ଼ ବିଧାୟକ ତଥା ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ୱାଇଁ କଳ୍ପନା ପାଇଁ ଏକ ସାଇକେଲ ଉପହାର ସ୍ୱରୂପ ଦେଇଛନ୍ତି । ଏହି ସଫଳତା ପଛରେ କଳ୍ପନା ତାଙ୍କ ଗାଁର ସମସ୍ତ ଲୋକମାନଙ୍କ ସହିତ ନିଜର ଗୁରୁ ବିବେକା ନନ୍ଦ ସାର୍, ନିଜର ବାପା ମା ଓ ସ୍ଥାନୀୟ ବିଧାୟକଙ୍କୁ ଶ୍ରେୟ ଦେଇଛନ୍ତି ।