‘ଲୋକ ସ୍ୱରାଜ ଓଡ଼ିଶା’ ଗଠନ
#କଟକ(ଏନ୍.ଏମ୍.): ନେତାଜୀ ସୁଭାଷ ଚନ୍ଦ୍ର ବୋଷଙ୍କର ୧୨୬ତମ ଜନ୍ମ ଜୟନ୍ତୀ ଅବସରରେ ଏକ ସଂଗଠନ ଜନ୍ମନେଇଛି । ଲୋକ ସ୍ୱରାଜ ଓଡ଼ିଶା ନାମରେ ଏହି ସଂଗଠନ ସମାଜର ବିଭିନ୍ନ ଦିଗରେ କାର୍ଯ୍ୟକରିବ ବୋଲି ଅନୁଷ୍ଠାନ ପକ୍ଷରୁ ସୂଚନା ଦିଆଯାଇଛି । ମହାନଦୀ ବିହାର ସ୍ଥିତ ଅରବିଟାଲ୍ ହାଉସ ସମ୍ମିଳନୀ କକ୍ଷରେ ଆୟୋଜିତ ସାଧାରଣ ସଭାରେ ଆବାହକ ପ୍ରକାଶ ରଞ୍ଜନ ଭୂୟାଁ ଅଧ୍ୟକ୍ଷତା କରିଥିଲେ । ଏହି ସଭାରେ ପ୍ରକାଶ ରଞ୍ଜନ ଭୂୟାଁ ସଭାର ଉଦ୍ଦେଶ୍ୟ ଓ ସାଂପ୍ରତିକ ପରିସ୍ଥିତିରେ ରାଜ୍ୟସ୍ତରୀୟ ଏକ ନିଆରା ସାମାଜିକ ସଂଗଠନର ରୂପରେଖ ବିଷୟରେ ଆଲୋକ ପାତ କରିଥିଲେ । ସାଂପ୍ରତିକ ଓଡ଼ିଶା ରାଜନୀତି ଏବଂ ବ୍ୟକ୍ତିର ଅଧିକାର ପାଇଁ ବିଭିନ୍ନ ରାଜନେତାମାନଙ୍କ ଭୂମିକାକୁ ନେଇ ବକ୍ତାମାନେ ନିଜର ମତ ରଖିଥିଲେ । ନିର୍ବାଚନ ପରେ ସାଧାରଣତନ୍ତ୍ର ଯେଉଁଭଳି ଭାବରେ ଗଣତାନ୍ତ୍ରିକ ଏକଛତ୍ର ବାଦରେ ପରିଣତ ହେଉଛି ରାଜ୍ୟର ନାଗରିକ ତାର ରାଜନୈତିକ ଅଧିକାର ପାଇବା ପାଇଁ ସମର୍ଥ ହେଉ ନଥିବା ଯୋଗୁଁ ପ୍ରତିନିଧି ମୂଳକ ଗଣତନ୍ତ୍ର ବ୍ୟବସ୍ଥାକୁ ପରିବର୍ତ୍ତନ କରି ସାଧାରଣ ଲୋକଙ୍କର ଦ୍ୱାରା ଏକ ଭାଗୀଦାର ମୂଳକ ଗଣତନ୍ତ୍ରର ପ୍ରତିଷ୍ଠା କରିବା ଜରୁରୀ ହୋଇ ପଡ଼ିଛି ବୋଲି ମତପ୍ରକାଶ ପାଇଥିଲା । ଏହି ପରିପ୍ରେକ୍ଷୀରେ ଏକ ବିକଳ୍ପ ସାମାଜିକ ଆନ୍ଦୋଳନର ଆବଶ୍ୟକତା ରହିଛି ବୋଲି ବକ୍ତାମାନେ ଜୋର ଦେଇଥିଲେ । ଏଣୁ ସଂଗଠନର ନାମକରଣ ପାଇଁ ଉପସ୍ଥିତ ବ୍ୟକ୍ତିମାନଙ୍କ ଠାରୁ ଆହ୍ୱାନ କରିଥିଲେ । ବିଭିନ୍ନ ନାମ ଭିତରୁ ସଙ୍ଗଠନର ଉଦେଶ୍ୟକୁ ଭିତ୍ତି କରି ଏକ ବିକଳ୍ପ ସାମାଜିକ ଆନ୍ଦୋଳନ ଭାବରେ “ଲୋକ ସ୍ୱରାଜ ଓଡ଼ିଶା’ ନାମଟି ସର୍ବସମ୍ମତି କ୍ରମେ ଗୃହିତ ହୋଇଥିବା ସବ୍ୟସାଚୀ ମହାନ୍ତି ସୂଚନା ଦେଇଛନ୍ତି । ଅନୁଷ୍ଠାନର କର୍ମକର୍ତ୍ତା ନିର୍ବାଚନ ହେବା ସହ ସଭାପତି ଭାବେ ଡ. ଅଜୟ କୁମାର ପତି, ଉପସଭାପତି- ପ୍ରକାଶ ରଞ୍ଜନ ଭୂୟାଁ, ସାଧାରଣ ସଂପାଦକ ସବ୍ୟସାଚୀ ମହାନ୍ତି, ସହ ସଂପାଦକ- ଚନ୍ଦନ କୁମାର ସାହୁ, କୋଷାଧ୍ୟକ୍ଷ- ମଧୁସ୍ମିତା ପଟ୍ଟନାୟକ ସର୍ବସମ୍ମତି କ୍ରମେ ନିର୍ବାଚିତ ହୋଇଛନ୍ତି । ଏହି ବୈଠକରେ ହେମନ୍ତ କୁମାର ସାହୁ, ଧ୍ରୁବ ଚରଣ ବେହେରା, ଜଗତ ଜୀବନ ମହାନ୍ତି, ଓମ୍ ସାଇ ସମ୍ରାଟ, ସୁଶାନ୍ତ ଓଝା, ମମତା ଲେଙ୍କା, ସାରଳା ପରିଜା, ସଂଯୁକ୍ତା ଭୂୟାଁ, ପବିତ୍ର ମୁଦୁଲି, ଅନିଲ ପାତ୍ର, ମୃତୁଞ୍ଜୟ ପାତ୍ର, କମଲେଶ ଗୁପ୍ତା, ରିତୁ ରାୟ, ସଞ୍ଜୟ କୁମାର ଦେଓ, ସୁଦିପ୍ ନନ୍ଦ, ରାକେଶ ରାୟ, ଶୁଭ୍ରଜିତ୍ ସିଂହ, ଶକ୍ତିକାନ୍ତ ବେହେରା, ବିରଞ୍ଚି ନାରୟଣ ମହାନ୍ତି, ମନୋଜ କୁମାର ଖିଲାର ପ୍ରମୁଖ ଉପସ୍ଥିତଥିଲେ ।