କଟକରେ ବିଜେପି ପକ୍ଷରୁ ବିଶାଳ ଯୁବ ଆକ୍ରୋଶ ସମାବେଶ
#କଟକ (ଏନ୍.ଏମ୍.): କଟକରେ ଏବେ ବିଜେପି ନିଜର ସଂଗଠନକୁ ମଜଭୁତ କରିବାରେ ଲାଗି ପଡ଼ିଛି । ସାଧାରଣ ନିର୍ବାଚନ ଯେତିକି ଯେତିକି ପାଖେଇ ଆସୁଛି ବିଭିନ୍ନ ରାଜନୈତିକ ସଂଗଠନ ସେତିକି ସେତିକି ପ୍ରସ୍ତୁତ ହେଉଛନ୍ତି ପ୍ରତିଦ୍ୱନ୍ଦୀଙ୍କୁ ମୁକାବିଲା କରିବା ପାଇଁ । ଏହି ପରିପ୍ରେକ୍ଷୀରେ କଟକରେ ବିଜେପି ମଧ୍ୟ ତା’ର ପ୍ରସ୍ତୁତି ଜାରି ରଖିଛି । ବିଜେପି ଯୁବମୋର୍ଚ୍ଚାର ପୂର୍ବତନ ସଭାପତି ଜ୍ୟୋତିରଞ୍ଜନ ପଲାଇଙ୍କ ନେତୃତ୍ୱରେ ବାରବାଟୀ-କଟକ ନିର୍ବାଚନ ମଣ୍ଡଳୀର ବିଭିନ୍ନ ୱାର୍ଡର ପ୍ରାୟ ୫ହଜାର କାର୍ଯ୍ୟକର୍ତ୍ତାକୁ ନେଇ ଏକ ବିଶାଳ ସମାବେଶ ଆୟୋଜିତ ହୋଇଯାଇଛି । ସ୍ଥାନୀୟ ବାଲିଯାତ୍ରା ତଳ ପଡ଼ିଆରେ ଆୟୋଜିତ ଯୁବ ଆକ୍ରୋଶ ସମାବେଶରେ ରାଜ୍ୟସରକାର ଯୁବପୀଢ଼ି ମାନଙ୍କୁ କିଭଳି ମିଥ୍ୟା ପ୍ରତିଶ୍ରୁତି ଦେଇ ଧୋକା ଦେଇଛନ୍ତି ତାହାର ଅବତାରଣା କରାଯାଇଥିଲା । ଏହି ସମାବେଶରେ କଟକ ସହରର ବହୁ ଯୁବ ଛାତ୍ରମାନଙ୍କ ସହିତ ବିଭିନ୍ନ ୱାର୍ଡର ବହୁ କାର୍ଯ୍ୟକର୍ତ୍ତା ସାମିଲ ହୋଇଥିଲେ । ଏଥିରେ ମୁଖ୍ୟଅତିଥି ଭାବେ ବରିଷ୍ଠ ବିଜେପି ନେତା ତଥା ପୂର୍ବତନ ମନ୍ତ୍ରୀ ସମୀର ଦେ ଯୋଗଦେଇ କାର୍ଯ୍ୟକର୍ତ୍ତା ମାନଙ୍କୁ ଉତ୍ସାହିତ କରିବା ସହିତ ଆଗାମୀ ନିର୍ବାଚନରେ ଜୋରଦାର ଲଢେଇ ପାଇଁ ପ୍ରସ୍ତୁତ ହେବାକୁ ଯୁବ ଗୋଷ୍ଠୀଙ୍କୁ ଆହ୍ୱାନ ଦେଇଥିଲେ । ସମ୍ମାନିତ ଅତିଥି ଭାବେ କଟକ ମହାନଗର ଶାନ୍ତି କମିଟି ସାଧାରଣ ସମ୍ପାଦକ ଭିକାରୀ ଡାସ, କଟକ ନଗର ଜିଲ୍ଲା ସଭାପତି ଲଲାଟେନ୍ଦୁ ବଡୁ, ବରିଷ୍ଠ ଆଇନଜୀବୀ ସୌରଚନ୍ଦ୍ର ମହାପାତ୍ର, ଓମପ୍ରକାଶ ରାୟ, ଗୀତାରାଣୀ ଦାସ, ଦୟାନିଧି ଲେଙ୍କା, ଅକ୍ଷୟ ଆଚାର୍ଯ୍ୟ, ବିଜେପି ସଂଖ୍ୟାଲଘୁ ସଭାପତି ସିକନ୍ଦର ଅଲ୍ଲୀ, କର୍ପୋରେଟର ଲକ୍ଷ୍ମୀଧର ବେହେରା, ଦେବାଶିଷ ରାୟ, ମୁକେଶ ସାହୁ, ମୀନକେତନ ଦାସ, ଦିଲୀପ ଦାସ, କଳ୍ପନା ବେହେରା, ରାକେଶ ସାହୁ, ଅମିତ ମିତ୍ର, ବିଶ୍ୱରୂପା ଜେନା ପ୍ରମୁଖ ଯୋଗ ଦେଇଥିଲେ । ଅନ୍ୟମାନଙ୍କ ମଧ୍ୟରେ ଦେବାଶିଷ ସାମନ୍ତରାୟ, ସୟଦ ସାହାନବାଜ ଅଲ୍ଲୀ, ଶେଖ ନସିମ, ପ୍ରିୟବ୍ରତ ଦେବତା, ସନ୍ତୋଷ ପାତ୍ର, ରତନ କୁମାର ବେହେରା, ସେକ ଫୟାଜ, ଅସଦ ରାଜ ପ୍ରମୁଖ ସଭା ପରିଚାଳନା କରିଥିଲେ ।