ଘନକୁହୁଡ଼ି ଯୋଗୁ ଡିଭାଇଡରରେ ପିଟି ହୋଇ ବସ ଦୁର୍ଘଟଣା: ୨୧ ଆହତ

#ଚୌଦ୍ୱାର(ଏନ୍‌.ଏମ୍‌.): ଆଜି ଭୋରୁ ଭୋରୁ ୫୫ନମ୍ବର ଜାତୀୟ ରାଜପଥ ଚୌଦ୍ୱାର ଥାନା ଅନ୍ତର୍ଗତ ନୂଆପାଟଣା ନିକଟରେ ଏକ ମର୍ମନ୍ତୁଦ ସଡକ ଦୁର୍ଘଟଣା ଘଟିଛି । ଭୋର ପ୍ରାୟ ସାଢେ ୩ଟା ସମୟରେ ଓଡି ୦୫ ବିକେ ୫୪୭୫ ନମ୍ବର ବିଶିଷ୍ଟ ଶ୍ରୀ ଲକ୍ଷ୍ମୀ ନାମକ ଏକ ଘରୋଇ ବସ୍ ଦେବଗଡ଼ ଅଞ୍ଚଳରୁ ଭୁବନେଶ୍ୱର ଆସୁଥିବା ସମୟରେ ସ୍ଥାନୀୟ ନୂଆପାଟଣା କଫିବାର ଛକ ନିକଟରେ ଦୁର୍ଘଟଣା ଘଟିଥିଲା । ବସଟି ପ୍ରାୟ ୪୦ରୁ ଉର୍ଦ୍ଧ୍ୱ ଯାତ୍ରୀଙ୍କ ନେଇ ଭୁବନେଶ୍ୱର ଅଭିମୁଖେ ଯାଉଥିବାବେଳେ ରାସ୍ତାର ଡିଭାଇଡରରେ ଫିଟି ହୋଇ ଦୁର୍ଘଟଣା ହୋଇଛି । ଖବର ପାଇ ଚୌଦ୍ୱାର ଥାନା ପୁଲିସ ଓ ସ୍ଥାନୀୟ ଲୋକେ ଘଟଣାସ୍ଥଳରେ ପହଞ୍ଚି ଆହତ ଯାତ୍ରୀମାନଙ୍କୁ ତୁରନ୍ତ ଚିକିତ୍ସା ନିମନ୍ତେ କଟକ ବଡ ଡାକ୍ତରଖାନା ପଠାଇଛନ୍ତି । ସେମାନଙ୍କ ମଧ୍ୟରୁ ୨୧ଜଣ ଆହତ ହୋଇଥିବାବେଳେ ଜଣକ ଅବସ୍ଥା ଗୁରୁତର ରହିଥିବା ଜଣାପଡ଼ିଛି । ବସରେ ମହିଳା ଓ ଶିଶୁଙ୍କ ସଂଖ୍ୟା ଅଧିକ ରହିଥିବା ଦେଖିବାକୁ ମିଳିଛି । ଦେବଗଡ଼ ଅଞ୍ଚଳରୁ ଯାତ୍ରୀମାନେ ବସକୁ ରିଜର୍ଭ କରି ଭୁବନେଶ୍ୱର ଆଦିବାସୀ ମେଳା ଦେଖିବାକୁ ଯାଉଥିଲେ ବୋଲି ଜଣାପଡ଼ିଛି । ରାସ୍ତାରେ ଘନ କୁହୁଡ଼ି ଯୋଗୁଁ ଏହି ଦୁର୍ଘଟଣା ଘଟିଥିବା ଡ୍ରାଇଭର କହିଛନ୍ତି । ଦୁର୍ଘଟଣାଗ୍ରସ୍ତ ବସକୁ ଚୌଦ୍ୱାର ଥାନା ଜବତ କରିବା ସହ ଡ୍ରାଇଭରଙ୍କୁ ଅଟକ ରଖି ପୁଲିସ ଅଧିକ ତଦନ୍ତ ଚଳାଇଛି ।