ଜଗତପୁର ଭିଆଇପି ରୋଡରେ ଲହଡି ମାରୁଛିି ନିମପୁର ବସ୍ତି ବାସିନ୍ଦାଙ୍କ ଘରର ଆର୍ବଜନା ପାଣି
୩ ବର୍ଷ ବିତିଲା ହେଲାନି ଡ୍ରେନ
ଚାଲିଛି ଫଳକମରା ରାଜନୀତି
ଜଗତପୁର (ଏନ୍.ଏମ୍.): ସାଧାରଣ ନିର୍ବାଚନକୁ ଆଉ ଦିନ କେଇଟା ଥିଲା ବେଳେ ବିଜୁ ଜନତା ଦଳ ୨୦୨୩ ମସିହାରୁ ମାଳମାଳ ଫଳକ ଚୌଦ୍ୱାର କଟକ ନିର୍ବାଚନ ମଣ୍ଡଳୀ ଜଗତପୁର ଅଞ୍ଚଳରେ ଖୁନ୍ଦି ହୋଇଯାଇଛି । କେଉଠି ନୂଆ ଫଳକ ମରାଯାଉଛି ତ କେଉଁଠି ପୁରୁଣା ଫଳକରେ କାମଚଳା ପରିସ୍ଥିତିରେ ଗେଣ୍ଡୁ ହାର ଝୁଲାଇ ଦୁଇ ଦୁଇ ଥର ଶିଳାନ୍ୟାସ କରାଯାଉଛି । ମୁଖ୍ୟତଃ ଜଗତପୁର ଆଇ.ବି ରୋଡ ବା ଭିଆଇପି ରୋଡ କୁହାଯାଉଥିବା ରାସ୍ତା ଉପରେ ଗତ ୩ ବର୍ଷ ଧରି ଡ୍ରେନ ପାଣି ରାସ୍ତା ଉପରେ ଲହଡି ମାରୁଛି । ଯୋବ୍ରା ଆନିକଟ ବ୍ୟାରେଜ ଠାରୁ ଚୌଦ୍ୱାର ବ୍ୟାରେଜ ପର୍ଯ୍ୟନ୍ତ ରାସ୍ତାକୁ ଆଇ.ବି ରୋଡ ବା ଭିଆଇପି ରୋଡ କୁହାଯାଏ । ଏହି ଭିଆଇପି ରୋଡରେ ପ୍ରତିଦିନ ହଜାର ହଜାର ଗାଡି ମଟର, ମୋ’ ବସ, ସ୍କୁଲ ବସ, ଆମ୍ବୁଲାନ୍ସ ଓ ରାଜନେତାମାନଙ୍କ ଗାଡି ମଟର ଯାତୟାତ କରିଥାଏ । ହେଲେ କୌଣସି ରାଜନେତାଙ୍କ ଦୃଷ୍ଟି ପଡେନାହିଁ ଏହି କଦର୍ଯ୍ୟମୟ ରାସ୍ତା ଉପରେ । ଏହି ଭିଆଇପି ରୋଡରେ ୩ ଗୋଟି ସରକାରୀ ଡାକ ବଙ୍ଗଳା ମଧ୍ୟ ରହିଛି । ୨୦୨୧ ମସିହାରୁ ବଡ ମେଡିକାଲ ସଂପ୍ରସାରଣ ପାଇଁ ମେଡିକାଲ ବସ୍ତି ବାସିନ୍ଦାମାନଙ୍କୁ ସେଠାରୁ ବିସ୍ଥାପନ କରାଯାଇ ଜଗତପୁର ବିରୂପା ନଦୀ ପଠା ପୋତି ସେଠାରେ ସେମାନଙ୍କୁ ଥଇଥାନ କରାଗଲା । ପୁଣି ନାମ ଦିଆଗଲା ବିଜୁ ବାବୁ କଲୋନୀ । ମାତ୍ର କଲୋନୀ ବାସିନ୍ଦା ତାଙ୍କ ମୌଳିକ ସୁବିଧା କିଛି ପାଇପାରିଲେ ନାହିଁ । ଡ୍ରେନ ପାଣି ଉପରେ ଇଟା ବା ସ୍ଲାବ ପକାଇ ଲୋକମାନେ ଯାତୟାତ କରୁଥିବା ନଜରକୁ ଆସିଛି । ଏହି ଡ୍ରେନେଜ ସମସ୍ୟା ଦେଖି ଚୌଦ୍ୱାର-କଟକ ବିଧାୟକ ୨୦୨୩ ମସିହାରେ ନୂତନ ଡ୍ରେନ ନିର୍ମାଣ ପାଇଁ ତରବରିଆ ଭାବେ ଭିଆଇପି ରୋଡ କଡରେ ଏକ ଫଳକ ମାରି ଫଟୋ ଉଠାଇ ଚାଲି ଯାଇଥିଲେ । ମାତ୍ର ଉକ୍ତ ଫଳରେ ମାସ ତାରିଖ ମଧ୍ୟ ଉଲ୍ଲେଖ ରହିନାହିଁ । ଅନ୍ୟପକ୍ଷରେ ଏହି ଅଞ୍ଚଳରେ ସ୍ଥାନୀୟ ବିଧାୟକ କେବଳ ଫଳକ ଲଗାଇ ବାହା ବାହା ନେଉଥିବାବେଳେ କୌଣସି କାମ ହେଉନଥିବା ଭଳି ସଂଗୀନ ଅଭିଯୋଗ ଉଠାଇଛନ୍ତି ସ୍ଥାନୀୟ ଅଞ୍ଚଳବାସୀ । ତେବେ ଆଗାମୀ ନିର୍ବାଚନକୁ ଦୃଷ୍ଟିରେ ରଖି ବିଧାୟକ ଲୋକଙ୍କୁ କେବଳ ଲଲିପପ୍ ଭଣ୍ଡାଉଥିବା ଅଭିଯୋଗ ହୋଇଛି ।