କଲରାବାଙ୍କ ଉଚ୍ଚ ବିଦ୍ୟାଳୟ ରୌପ୍ୟ ଜୟନ୍ତୀ ସମାରୋହ
#କଟକ(ଏନ୍.ଏମ୍.): କଟକ ଜିଲ୍ଲା ନିଶ୍ଚିନ୍ତକୋଇଲି ବ୍ଲକ ଅନ୍ତର୍ଗତ ଆଦର୍ଶ ଗ୍ରାମ କଲରାବାଙ୍କ ଉଚ୍ଚ ବିଦ୍ୟାଳୟର ରୌପ୍ୟ ଜୟନ୍ତୀ(୨୫ ବର୍ଷ) ସମାରୋହ ଅନୁଷ୍ଠିତ ହୋଇଯାଇଛି । ମୁଖ୍ୟଅତିଥି ଭାବେ ଓଡିଶା ରାଜ୍ୟପାଳ ରଘୁବର ଦାସ ଯୋଗଦେଇ ରାଜ୍ୟର ଆଦିବାସୀ ଓ ଅଧ୍ୟୁଷିତ ଅଞ୍ଚଳରେ ଆଦର୍ଶ ଗ୍ରାମ କଲରାବାଙ୍କ ଭଳି ସମସ୍ତ ପ୍ରକାର ସୁବିଧା, ସୁଯୋଗ ସୃଷ୍ଟି କରିବାକୁ କନ୍ଧମାଳ ସାଂସଦ ଡକ୍ଟର ଅଚ୍ୟୁତ ସାମନ୍ତଙ୍କୁ ଆହ୍ୱାନ ଦେଇଥିଲେ । ସମ୍ମାନିତ ଅତିଥି ଭାବେ ଖାଉଟି ବ୍ୟାପାର, ଖାଦ୍ୟ ଓ ସାଧାରଣ ବିଭାଗ, ପରିବେଶ ଓ ଜଙ୍ଗଲ, ଜଳବାୟୁ ପରିବର୍ତ୍ତନ କେନ୍ଦ୍ର ରାଷ୍ଟ୍ରମନ୍ତ୍ରୀ ଅଶ୍ୱିନୀ ଚୌବେ ଯୋଗଦେଇ କଲରାବାଙ୍କକୁ ଆଗାମୀ ଦିନରେ ସୋଲାର ଭିଲେଜ୍ରେ ପରିଣତ କରିବାକୁ ଡ଼ ସାମନ୍ତଙ୍କୁ ପରାମର୍ଶ ଦେଇଥିଲେ । ଏଥିପାଇଁ ସେ ସମସ୍ତ ସହଯୋଗ କରିବେ ବୋଲି ସେ କହିଥିଲେ । ଅନ୍ୟତମ ଅତିଥି ଭାବେ କଟକ ସାଂସଦ ଭର୍ତ୍ତୁହରି ମହତାବ, କଟକ ସଦର ବିଧାୟକ ଚନ୍ଦ୍ରସାରଥି ବେହେରା, ଓଡିଶା ମଣ୍ଡଳ ମୁଖ୍ୟ ଡାକପାଳ ଶୁଭେନ୍ଦୁ ସ୍ୱାଇଁ ଏବଂ ବିଦ୍ୟାଳୟର ପ୍ରଧାନଶିକ୍ଷକ ଯତୀନ୍ଦ୍ର ଲେଙ୍କା ଯୋଗ ଦେଇଥିଲେ । କାଦମ୍ବିନୀର ଇତିରାଣୀ ସାମନ୍ତ ଅତିଥି ପରିଚୟ ପ୍ରଦାନ ଓ କନ୍ଧମାଳ ସାଂସଦ ଡ. ଅଚ୍ୟୁତ ସାମନ୍ତ ସ୍ୱାଗତ ଅଭିଭାଷଣ ରଖିଥିଲେ । କଟକ ଗ୍ରାମାଞ୍ଚଳ ଏସପି ମିହିର ପଣ୍ଡା, କିଶନନଗର ତହସିଲଦାର ମଧୁସୂଦନ ନାୟକ, ସାଲେପୁର ଏସଡିପିଓ ନିହାର ରଞ୍ଜନ ପ୍ରଧାନ, ଥାନା ଭାରପ୍ରାପ୍ତ ଅଧିକାରୀ ରଶ୍ମିରଞ୍ଜନ ଦାସଙ୍କ ସମେତ ଅନ୍ୟ ଉଚ୍ଚପଦସ୍ଥ ଅଧିକାରୀମାନେ ଉପସ୍ଥିତ ଥିଲେ । ଏହି ଅବସରରେ ଅବସରପ୍ରାପ୍ତ ପ୍ରଧାନଶିକ୍ଷକ ତଥା ଗ୍ରାମର ବୟୋଜ୍ୟେଷ୍ଠ ବ୍ୟକ୍ତି ଗିରିଶ ଚନ୍ଦ୍ର ହାଜରା (ସ୍କୁଲ ପ୍ରତିଷ୍ଠାତା ସଦସ୍ୟ), ସାଂସଦ ଡକ୍ଟର ସାମନ୍ତଙ୍କ ବଡ଼ ଭାଇ ଅନ୍ତର୍ଯ୍ୟାମୀ ସାମନ୍ତ ଓ ଭଉଣୀ ନିରୁପମା ସାମନ୍ତ, ବିଜୟ କୁମାର ଗୁପ୍ତା, ଅଭିନ୍ନ ଚନ୍ଦ୍ର କେଶ, ଦୂର୍ଗା ଚରଣ ସାମନ୍ତ, ନାରାୟଣ ପରିଡା, ଅଞ୍ଜନ କୁମାର ସାମନ୍ତଙ୍କୁ ରାଜ୍ୟପାଳ ଓ କେନ୍ଦ୍ରମନ୍ତ୍ରୀ ସମ୍ବର୍ଦ୍ଧିତ କରିଥିଲେ । ସନ୍ଧ୍ୟାରେ କେମ୍ସ ଓ ଉଚ୍ଚ ବିଦ୍ୟାଳୟର କୁନି କୁନି ପିଲା ମାନଙ୍କ ଦ୍ୱାରା ଚିତ୍ତାକର୍ଷକ ନୃତ୍ୟ, ଗୀତ ପରିବେଷଣ କରଯାଇଥିଲା ।