ବଜ୍ରକବାଟି ବକ୍ସଡ୍ରେନ ଉପରେ ନିର୍ମାଣ କାର୍ଯ୍ୟର ସ୍ଥିତି ଅନୁଧ୍ୟାନ କଲେ ସିଏମସି ମେୟର ଓ କମିଶନର

#କଟକ(ଏନ୍‌.ଏମ୍‌.): କଟକ ସହରରେ ବିଭିନ୍ନ ଉନ୍ନତି କରଣ କାର୍ଯ୍ୟମଧ୍ୟରେ ଅନ୍ୟତମ ପାଲଟିଛି ବକ୍ସଡ୍ରେନ ପ୍ରକଳ୍ପ । ଏହି ପ୍ରକଳ୍ପ ଦ୍ୱାରା ସହରରେ ରାସ୍ତାଘାଟ ଓ ବର୍ଜ୍ୟଜଳ ନିଷ୍କାସନ ବ୍ୟବସ୍ଥା ସୁଧୁରି ଯିବ । ତେଣୁ ଯୁଦ୍ଧକାଳୀନ ଭିତ୍ତିରେ ବକ୍ସଡ୍ରେନ କାର୍ଯ୍ୟ ଚାଲିଥିବାବେଳେ ଆଜି ସିଏମସି ମେୟର ଓ କମିଶନରଙ୍କ ସମେତ ବିଭାଗୀୟ ଅଧିକାରୀ ଓ ଲୋକପ୍ରତିନିଧି ସ୍ଥିତି ଅନୁଧ୍ୟାନ କରିଛନ୍ତି । ଏହି ପରିପ୍ରେକ୍ଷୀରେ ଆଜି ସିଏମସି ମେୟର ସୁବାସ ସିଂ, କମିଶନର ନିଖିଲ ପବନ କଲ୍ୟାଣ, ୱାର୍କସ ଷ୍ଟାଣ୍ଡିଙ୍ଗ କମିଟି ଚେୟାରମ୍ୟାନ ପ୍ରଦୀପ କିଶୋର ଖୁଣ୍ଟିଆ, ସ୍ୱାସ୍ଥ୍ୟ ଷ୍ଟାଣ୍ଡିଙ୍ଗ କମିଟି ଚେୟାରମ୍ୟାନ ଦିପ୍ତିମୟୀ ମୂଳିଆ ପ୍ରମୁଖ ବଜ୍ରକବାଟି ବକ୍ସଡ୍ରେନ ନିର୍ମାଣ କାର୍ଯ୍ୟ ସମସ୍ତ ଅଧିକାରୀଙ୍କ ଉପସ୍ଥିତିରେ ସମୀକ୍ଷା କରିଥିଲେ । ଡିସେମ୍ବର ୨୫ ତାରିଖ ସୁଦ୍ଧା ଗୋଟିଏ ନିର୍ମାଣଧୀନ ପୋଲର ଗୋଟିଏ ପାଖ କାର୍ଯ୍ୟ ଶେଷ ହୋଇ ୨ୟ ପାଶ୍ୱର୍ କାର୍ଯ୍ୟ ଆରମ୍ଭ ହେବ । ଦିବାରାତ୍ରି ସ୍ୱତନ୍ତ୍ର କରାଯାଇ ଏହି କାର୍ଯ୍ୟ ଯୁଦ୍ଧକାଳୀନ ଭିତ୍ତିରେ ଆଗେଇ ଚାଲିଥିବା ଜଣାପଡ଼ିଛି । କଟକ ସହରର ହଜାର ବର୍ଷର ମୌଳିକ ସମସ୍ୟା ମୁଖ୍ୟ ଡ୍ରେନ ବକ୍ସିବଜାର ଠାରୁ ଛତ୍ରବଜର ପର‌୍ୟ୍ୟନ୍ତ ୩କିମି ଖୋଲା ଡ୍ରେନ, ପଚା ଶଢା ଦୁର୍ଗନ୍ଧ ମଶା ବଂଶ ବୃଦ୍ଧି କେନ୍ଦ୍ର ଭାବରେ କାର୍ଯ୍ୟ କରୁଥିଲା । ତେବେ ବକ୍ସ ଡ୍ରେନ ନିର୍ମାଣ ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନିର୍ଦ୍ଦେଶ ଦେଇଥିଲେ । ୯ବର୍ଷ ଧରି ପୂର୍ବ ଠିକାଦାର କାର୍ଯ୍ୟରୁ ଅପସରି ଯିବା ଫଳରେ କାର୍ଯ୍ୟ ବନ୍ଦ ରହିଥିଲା । କିନ୍ତୁ ମୁଖ୍ୟମନ୍ତ୍ରୀ ପୁନର୍ବାର କ୍ୟାବିନେଟ୍ ବୈଠକରେ ଅନୁମୋଦନ କରି ୪୫୦ କୋଟି ଟଙ୍କା ବ୍ୟୟଅଟକଳ କରି ଟେଣ୍ଡର ଜରିଆରେ କାର୍ଯ୍ୟ ଆରମ୍ଭ ହୋଇଥିଲା ୨ବର୍ଷ ଧରି ସିଏମସି ଏହି କାର୍ଯ୍ୟ ତଦାରଖ କରି କାମକୁ ତ୍ୱରାନିତ କରିଆସୁଛି । ମାର୍ଚ୍ଚ ୩୧ ତାରିଖ ୨୦୨୪ ସୁଦ୍ଧା ଏହି କାର୍ଯ୍ୟ ସମ୍ପୂର୍ଣ୍ଣ ହେବାକୁ ଧାର୍ଯ୍ୟ ହୋଇଥିଲା । ସେଥିପାଇଁ ପ୍ରତି ମାସରେ କାର୍ଯ୍ୟର ସମୀକ୍ଷା କରାଯାଉଛି । ଡିସେମ୍ବର ୧୦ତାରିଖରୁ ବଜ୍ରକବାଟି ଓ ବକ୍ସିବଜାର ମୁଖ୍ୟ ଡ୍ରେନ ପୋଲର ପୁନଃନିର୍ମାଣ କାର୍ଯ୍ୟ ଆରମ୍ଭ ହୋଇଛି । ବକ୍ସିବଜାର ଗୋପବନ୍ଧୁ ଭବନ ପାଖରୁ ଗମ୍ଭାଢିଆ ପର୍ଯ୍ୟନ୍ତ ଦୁଇ ଲେନ ଏବଂ ଗମ୍ଭାଢିଆ ଠାରୁ ଛତ୍ର ବଜାର ପର୍ଯ୍ୟନ୍ତ ଚାରି ଲେନ କାର୍ଯ୍ୟ ଶେଷହେବ । ଦୁଇ ପଟରେ ଫ୍ଲେବର ବ୍ଲକ ନୂଆ ରାସ୍ତା, ଡ୍ରେନ ବ୍ୟବସ୍ଥା, ବୃକ୍ଷ ରୋପଣ ଓ ରାସ୍ତା ମଝିରେ ଷ୍ଟ୍ରିଟ ଲାଇଟବ୍ୟବସ୍ତା କାର୍ଯ୍ୟକାରୀ କରିବାକୁ ଦିବା ରାତ୍ରି କାର୍ଯ୍ୟ ଚାଲିଛ । ଏହି କାର୍ଯ୍ୟ ସମ୍ପୂର୍ଣ୍ଣ ହେଲେ ମୁଖ୍ୟମନ୍ତ୍ରୀଙ୍କର ରୂପାନ୍ତରୀକରଣ କାର୍ଯ୍ୟ ଏକ ଇତିହାସ ରଚିବ ବୋଲି ମେୟର ଶ୍ରୀ ସିଂହ ପ୍ରକାଶ କରିଛନ୍ତି । ଏହି କାର୍ଯ୍ୟକ୍ରମରେ ସ୍ଥାନୀୟ କର୍ପୋରେଟର ପ୍ରଦୀପ କୁମାର ସାହୁ, ପଦ୍ମିନୀ ସାହୁ, ଚନ୍ଦନ ଜେନା, କେ.ଜେ. ଆଫ୍ରିନ, ଡେପୁଟି ନିର୍ବାହୀ ଯନ୍ତ୍ରୀ ଅର୍ନ୍ତମୟୀ ପାତ୍ର, ଜାଇକା ଯନ୍ତ୍ରୀ ଅଚ୍ୟୁତ ବିଜୟାନନ୍ଦ ବେହେରା, ବିଜୟ ପଣ୍ଡା, ନାଳନ୍ଦା ଠିକା ସଂସ୍ଥାର କାର୍ଯ୍ୟ ନିର୍ବାହୀ ଅଧିକାରୀ ଓ ସ୍ଥାନୀୟ ଜନସାଧାରଣ ଉପସ୍ଥିତ ଥିଲେ ।