ଚୌଦ୍ୱାର-କଟକ ବିଧାୟକଙ୍କ ଦ୍ୱାରା ସରକାରୀ କାର୍ଯ୍ୟର ସମୀକ୍ଷା ଓ ବିଭିନ୍ନ ପ୍ରଳ୍ପର ଶିଳାନ୍ୟାସ
#ଚୌଦ୍ୱାର(ଏନ୍.ଏମ୍.): ଟାଙ୍ଗୀ-ଚୌଦ୍ୱାର ବ୍ଲକ ଅନ୍ତର୍ଗତ କୟଳପଡ଼ା ପଞ୍ଚାୟତରେ ବିଭିନ୍ନ ସରକାରୀ ପ୍ରକଳ୍ପର ଶିଳାନ୍ୟାସ କରାଯିବା ସହ କାର୍ଯ୍ୟ ସମ୍ପର୍କରେ ସମୀକ୍ଷା କରିଛନ୍ତି ଚୌଦ୍ୱାର-କଟକ ବିଧାୟକ ସୌଭିକ ବିଶ୍ୱାଳ । ରାଜ୍ୟସରକାରଙ୍କ ଆମ ଓଡ଼ିଶା ନବୀନ ଓଡ଼ିଶା ମାଧ୍ୟମରେ ୫୦ଲକ୍ଷ ଏବଂ ମୁଖ୍ୟମନ୍ତ୍ରୀଙ୍କ ସ୍ୱତନ୍ତ୍ର ସହାୟତା ଯୋଜନାରେ ୨୫ଲକ୍ଷ ସମୁଦାୟ ୭୫ ଲକ୍ଷ ଟଙ୍କା କାର୍ଯ୍ୟର ସମୀକ୍ଷା ସହ ବିଭିନ୍ନ ପ୍ରକଳ୍ପର ଶିଳାନ୍ୟାସ କରିଥିଲେ । ପ୍ରଥମେ ବ୍ରାହ୍ମଣ ଶ୍ମଶାନରେ ଦାହ ଗୃହ ନିର୍ମାଣ ନିମନ୍ତେ ୪ ଲକ୍ଷ ଟଙ୍କା ବ୍ୟୟ ଅଟକଳରେ ପ୍ରକଳ୍ପ କାର୍ଯ୍ୟର ଶିଳାନ୍ୟାସ କରିବା ସହିତ ଜଗନ୍ନାଥ ମନ୍ଦିରର ଉନ୍ନତି କରଣ ନିମନ୍ତେ ୧୪ ଲକ୍ଷ ଟଙ୍କାର ବ୍ୟୟରେ ହେବାକୁ ଥିବା ପ୍ରକଳ୍ପର ଶିଳାନ୍ୟାସ କରିଥିଲେ । ଏଥି ସହିତ ୧୦ଲକ୍ଷ ଟଙ୍କା ବ୍ୟୟରେ ରଘୁନାଥ ଜୀଉ କମ୍ୟୁନିଟି ସେଣ୍ଟରର ଶିଳାନ୍ୟାସ ଏବଂ ବାଲୁଙ୍କେଶ୍ୱର ମନ୍ଦିର ଉନ୍ନତିକରଣ ନିମନ୍ତେ ୯ଲକ୍ଷ ଟଙ୍କା ବ୍ୟୟରେ ପ୍ରକଳ୍ପର ଶିଳାନ୍ୟାସ ହୋଇଥିଲା । ଏଥିସହ ପୂର୍ବରୁ ଜାଗୁଲେଇ ମନ୍ଦିର ନିମନ୍ତେ ୪ ଲକ୍ଷ ଟଙ୍କାର ଉନ୍ନତି କରଣ କାର୍ଯ୍ୟ ଶେଷ ହୋଇ ଉଦ୍ଘାଟନ କରାଯାଇଥିବାବେଳେ ଭାଗବତ ଗୋସେଇଁ ପୀଠ ନିମନ୍ତେ ୪ ଲକ୍ଷ ଟଙ୍କା ଓ ନୂଆପାଟଣା ଗୋପାଳ କୃଷ୍ଣ ମନ୍ଦିର ନିମନ୍ତେ ୪ଲକ୍ଷ ଟଙ୍କାର ପ୍ରକଳ୍ପ ନିମନ୍ତେ ସହାୟତା ପ୍ରଦାନ ସମ୍ପର୍କରେ ସମୀକ୍ଷା କରିଥିଲେ । ଏହାପରେ ଅନ୍ୟାନ୍ୟ କାର୍ଯ୍ୟର ସମୀକ୍ଷା ସହ କାର୍ଯ୍ୟର ଅଗ୍ରଗତି ଓ ଉନ୍ନତି ନିମନ୍ତେ ସମସ୍ତ ଗ୍ରାମବାସୀମାନଙ୍କ ସହ ପଞ୍ଚାୟତ ଅଫିସ ପରିସରରେ ଏକ ରିଭ୍ୟୁ ମିଟିଙ୍ଗ କରି ତୁରନ୍ତ ସମସ୍ତ କାର୍ଯ୍ୟକୁ ସଠିକ୍ ଭାବେ ସାରିବାକୁ ନିର୍ଦ୍ଦେଶ ଦେଇଥିଲେ । ଏଥିସହ ପଞ୍ଚାୟତର ବିଭିନ୍ନ ସମସ୍ୟା ଉପରେ ଆଲୋଚନା କରି ସେଗୁଡ଼ିକର ଖୁବ ଶୀଘ୍ର ସମାଧାନ କରାଯିବ ବୋଲି ବିଧାୟକ ପ୍ରତିଶ୍ରୁତି ଦେଇଥିଲେ । ଏହି କାର୍ଯ୍ୟକ୍ରମରେ ପଞ୍ଚାୟତର ସରପଞ୍ଚଙ୍କ ପ୍ରତିନିଧି ପିତାମ୍ବର ନାୟକ, ସମିତିସଭ୍ୟଙ୍କ ପ୍ରତିନିଧି ପ୍ରତାପ ସ୍ୱାଇଁ, ପଞ୍ଚାୟତର ବିଜେଡି ସଭାପତି ସୁଧାକର ନାୟକଙ୍କ ସମେତ ସମସ୍ତ ୱାର୍ଡର ୱାର୍ଡ ମେମ୍ବର, ସାହି ମୂରବୀ, ଦଳୀୟ କର୍ମୀ ଓ ଗ୍ରାମବାସୀ ଉପସ୍ଥିତ ଥିଲେ ।