ମଧୁସୂଦନ ସେତୁ ଆଲୋକୀକରଣ ଧର୍ମକୁ ଆଖିଠାର: ଜେନରେଟର ହିଁ ସାହା ଭରଷା
#କଟକ(ଏନ୍.ଏମ୍.): ଠିକ ସମୟରେ କାମ ନକରି ଶେଷ ସମୟରେ ଅବଧି ମଧ୍ୟରେ ସାରିବା ପାଇଁ ତାଗିଦ ପାଇବା ପରେ ଯେନତେନ ପ୍ରକାର କାମ କରାଯାଉଛି । ଫଳରେ ସରକାରୀ ଅର୍ଥ ଲୋକଙ୍କ କାମରେ ଆସୁନଥିବା ସାଧାରଣରେ ଚର୍ଚ୍ଚାର ବିଷୟ ହୋଇଛି । ଏଭଳି ଅଭାବନୀୟ ଘଟଣା ଦେଖିବାକୁ ମିଳିଛି କଟକ-ନୂଆପାଟଣା ସଂଯୋଗ କରୁଥିବା ମଧୁସୂଦନ ସେତୁରେ । ଦୀର୍ଘ ଦିନ ଧରି ମଧୁସୂଦନ ସେତୁ ଅନ୍ଧାରରେ ରହିବା ଦ୍ୱାରା ଅପରାଧୀଙ୍କ ସାମ୍ରାଜ୍ୟ ପାଲଟି ଯିବାପରେ ଜନସାଧାରଣଙ୍କ ବାରମ୍ବାର ଦାବି ପରେ ଏହାକୁ ଆଲୋକୀକରଣ ବ୍ୟବସ୍ଥା କରାଗଲା । ମାତ୍ର ସେତୁରେ ଲାଗିଥିବା ଆଲୋକ ନିମନ୍ତେ ବିଦ୍ୟୁତ ସଂଯୋଗ ନହୋଇ ଜେନେରେଟର ଦ୍ୱାରା ଆଲୋକୀକରଣ କରାଯାଉଛି । ଏଠାରେ ପ୍ରଶ୍ନ ଉଠୁଛି ଜେନେରେଟରରେ ବ୍ୟବହୃତ ଇନ୍ଧନ ଆସୁଛି କେଉଁଠୁ । ଅନ୍ୟପକ୍ଷରେ ଏଥି ପାଇଁ ସ୍ଥାୟୀ ବିଦ୍ୟୁତ ସଂଯୋଗ କରାନଯାଇ ଜେନେରେଟର ଦ୍ୱାରା ପରିଚାଳିତ କରିବା ଦ୍ୱାରା ଅଧିକ ବ୍ୟୟବହୁଳ ହେଉଥିବାବେଳେ ଜେନେରେଟର ସୁରକ୍ଷା ପାଇଁ ଅଧା ଆଲୋକ ବନ୍ଦ କରାଯାଉଛି । ଫଳରେ ସେତୁଟି ଅନ୍ଧକାର ରହୁଛି ବୋଲି ଅଞ୍ଚଳବାସୀ ଅଭିଯୋଗ କରିଛନ୍ତି ।
ସୂଚନା ଅନୁଯାୟୀ, ମହାନଦୀ ଉପରେ ଏହି ସେତୁ ତିଆରି ହେବାରୁ ଗମନାଗମନର ସୁବିଧା ସହ ଦୁରତ୍ୱର ହ୍ରାସପାଇଲା । ମାତ୍ର ସେତୁ ହେବାର ୫ବର୍ଷ ପରେ ଅଲୋକୀକରଣ କରାଗଲା । ହେଲେ ଏଥି ପାଇଁ ଏବେ ଏକମାତ୍ର ଭରସା ସାଜିଛି ଜେନେରେଟର । କଟକ ସିଡିଏ ଠାରୁ ନୂଆପାଟଣାକୁ ସଂଯୋଗ କରୁଥିବା ମଧୁସୂଦନ ସେତୁରେ ତରବରିଆ ଭାବେ କାର୍ଯ୍ୟକରି ଅଲୋକୀକରଣ ଉଦ୍ଘାଟନ କରାଗଲା । କିନ୍ତୁ ଏବେ ବି ସଂପୂର୍ଣ୍ଣ ଭାବେ କାର୍ଯ୍ୟ ସମାପ୍ତ ହୋଇନାହିଁ । କେଉଁ ଖୁଣ୍ଟରେ ଲାଇଟ୍ ଜଳୁଛି ତ କେଉଁ ଖୁଣ୍ଟରେ ଲାଇଟ୍ ଜଳୁନାହିଁ । ବିଶେଷ କରି ସଂଧ୍ୟା ସମୟରେ ଲାଇଟ୍ ଜଳୁଥିବା ବେଳେ ରାତି ପ୍ରାୟ ୯ଟାରୁ ୧୦ ବେଳେ ଅଧା ଲାଇଟ ବନ୍ଦ କରାଯାଉଛି । ଏହି ସେତୁରେ ଆଲୋକୀକରଣ ବ୍ୟବସ୍ଥାର ଉଦ୍ଘାଟନ ହୋଇଥିଲେ ମଧ୍ୟ ତାହା ସମ୍ପୂର୍ଣ୍ଣ ହୋଇନାହିଁ ତେଣୁ ଜେନେରେଟର ସାହାଯ୍ୟରେ ଆଜକୁ ୪ଦିନ ଧରି ଆଲୋକୀକରଣ କରାଯାଉଥିବା ବିଭାଗୀୟ କର୍ମଚାରୀ କଥା ପ୍ରସଙ୍ଗରେ କହିଛନ୍ତି । ତେବେ ଏହି ସେତୁକୁ ଆଲୋକୀକରଣ କରିବା ନିମନ୍ତେ ସିଏମସି ପକ୍ଷରୁ ଓଡ଼ିଶା କ୍ଷୁଦ୍ର ନିଗମକୁ ଏହି ଦାୟିତ୍ୱ ଦିଆଯାଇଥିଲା ୨କୋଟି ୮୮ଲକ୍ଷ ଟଙ୍କାର ଅର୍ଥ ବରାଦ କରାଯାଇଥିଲା । ୫ମାସ ମଧ୍ୟରେ କାର୍ଯ୍ୟ ଶେଷ ହେବ ପାଇଁ ଓଏସଆଇସିକୁ ନିର୍ଦ୍ଦେଶ ଦିଆଯାଇଥିଲା । କାର୍ଯ୍ୟର ମନ୍ଥର ଗତି ଓ ବିଳମ୍ବ ଯୋଗୁ ଏ ପର୍ଯନ୍ତ କାମ ସମ୍ପୂର୍ଣ୍ଣ ହୋଇ ନାହିଁ । ତେବେ ସର୍ବସାଧରଣଙ୍କ ଅଭିଯୋଗ ଅନୁଯାୟୀ ଧାର୍ଯ୍ୟ ଅବଧିର ୨ଦିନ ପୂର୍ବରୁ ତରବରିଆ ଉଦଘାଟନ କରା ଯାଇଥିଲା । ମାତ୍ର ଆଜି ପର୍ଯ୍ୟନ୍ତ ବିଦ୍ୟୁତ ଟ୍ରାନ୍ସଫରମରକୁ ସଂଯୋଗ ଦିଆଯାଇ ନାହିଁ; ତେଣୁ ଏଭଳି ଦାୟିତ୍ୱହୀନତା ତଥା ତରବରିଆ କାମକୁ ନେଇ ସିଏମସିର ବିଭାଗୀୟ କର୍ତ୍ତୃପକ୍ଷଙ୍କ ଉପରେ ପ୍ରଶ୍ନ ଉଠିଛି । ଏ ନେଇ ସିଏମସି ମେୟରଙ୍କୁ ଯୋଗାଯୋଗ କରାଯାଇଥିଲେ ମଧ୍ୟ ତାହା ସମ୍ଭବ ହୋଇ ପାରିନଥିଲା ।