ବାବା ଧବଳେଶ୍ୱରଙ୍କ ପୀଠରେ ଦର୍ଶନ ବିଭ୍ରାଟ
ପୂଜକ ଓ ପ୍ରଶାସନର ଅଛିଣ୍ଡା କଳିରେ ଧନ୍ଦି ହୋଇଗଲେ ଶ୍ରଦ୍ଧାଳୁ
#କଟକ(ଏନ୍.ଏମ୍.): କଟକ ଜିଲ୍ଲାର ଏକମାତ୍ର ପ୍ରଖ୍ୟାତ ଶୈବ ପୀଠ ଆଠଗଡ଼ ଅଞ୍ଚଳର ବାବା ଧବଳେଶ୍ୱର । ମହାନଦୀ ପଠାରେ ଅବସ୍ଥିତ ଏହି ଶୈବ ପୀଠକୁ କାର୍ତ୍ତିକମାସରେ ଲକ୍ଷାଧିକ ଶ୍ରଦ୍ଧାଳୁଙ୍କ ସମାଗମ ହୋଇଥାଏ । ମାତ୍ର ଚଳିତ ବର୍ଷ ପ୍ରଶାସନ ଓ ପୂଜକମାନଙ୍କ ମଧ୍ୟରେ ରହିଥିବା ଅଛିଣ୍ଡା କଳି ଭିତରେ ଦର୍ଶକମାନେ କେତେ ଆଶା କରି କାହିଁ କେତେ ବାଟରୁ ଧାଇଁ ଆସିଥିଲେ ମଧ୍ୟ ବାବା ଦର୍ଶନରୁ ବଞ୍ଚିତ ହୋଇଥିବା ଦେଖିବାକୁ ମିଳିଛି । କମାର କହୁଛି ଛାଡ଼ିବିନି କି ଲୁହା କହୁଛି ବଢ଼ିବିନି ଏହି ନ୍ୟାୟରେ ଅଧାରେ ଅଟକି ରହିଛି ପୂଜକ-ପ୍ରଶାସନ କଳି ସମାଧାନର ସ୍ଥିତି । ଅର୍ଥାତ ପୂଜକମାନେ ପ୍ରଶାସନର ଆଲୋଚନାରେ ଅସନ୍ତୁଷ୍ଟ ହୋଇ ବୈଠକରୁ ଉଠିଯିବା ପରେ ମଧ୍ୟ ପ୍ରଶାସନ ନିଜ ଯିଦ୍ରେ ଅଟଳ । ତେବେ ଆଉ କେତେଟା ଘଣ୍ଟା ପରେ ବାବା ଧବଳେଶ୍ୱରଙ୍କ ବଡ଼ଓଷା ଆରମ୍ଭ ହେବ । ଏଥିରେ ବାବାଙ୍କ ସ୍ୱତନ୍ତ୍ର ବେଶ ସହ ଗଜ ଭୋଗ ମଧ୍ୟ ଲାଗି ହେବ । ଏଥି ପାଇଁ ପୂଜକମାନଙ୍କ ପକ୍ଷରୁ ସମସ୍ତ ପ୍ରସ୍ତୁତି ଶେଷ ହୋଇଛି । ମାତ୍ର ଏହି ବିବାଦ ତୁଟୁନଥିବାବେଳେ ବାବାଙ୍କ ପୀଠରେ କିଭଳି ବଡ଼ଓଷା ପାଳନ ହେବ ସେ ନେଇ ଶ୍ରଦ୍ଧାଳୁଙ୍କ ମଧ୍ୟରେ ଆଶଙ୍କା ସୃଷ୍ଟି ହୋଇଛି । ଶୁକ୍ରବାର ଦିନ ବିଳମ୍ବିତ ରାତି ପର୍ଯ୍ୟନ୍ତ ଜିଲ୍ଲାପ୍ରଶାସନ ପକ୍ଷରୁ ଅତିରିକ୍ତ ଜିଲ୍ଲାପାଳ ଉମାକାନ୍ତ ରାଜ, ଆଠଗଡ଼ ଉପଜିଲ୍ଲାପାଳ, ତହସିଲଦାର, ଆଠଗଡ଼ ଏସଡିପିଓ, ସ୍ଥାନୀୟ ଥାନା ଅଧିକାରୀ ଉପସ୍ଥିତ ରହି ଏହି ବିବାଦର ସମାଧାନ ପାଇଁ ପୂଜକ ସମିତି ସହ ଆଲୋଚନା କରିଥିଲେ । ତେବେ ଚଳିତ ବର୍ଷ ପ୍ରଶାସନ କଂକ୍ରିଟ ପୋଲ ଠାରୁ ମନ୍ଦିର ପର୍ଯ୍ୟନ୍ତ ବ୍ୟାରିକେଟ ନିର୍ମାଣ କରିଥିବାବେଳେ ତାହା କେବଳ ଦର୍ଶନ ନିମିତ ରହିଛି । ତେଣୁ ଶ୍ରଦ୍ଧାଳୁଟିଏ କାର୍ତ୍ତିକମାସରେ ବାବାଙ୍କ ନିକଟରେ ଭୋଗରାଗ କରିପାରୁନଥିବାବେଳେ ମାନସିକ ପୂଜା ମଧ୍ୟ କରିବାରୁ ବଞ୍ଚିତ ରହୁଛି । ଏଥି ସହିତ ଶ୍ରଦ୍ଧାଳୁମାନେ ବାବାଙ୍କ ନିକଟରେ ପୂଜାର୍ଚ୍ଚନା କରି ନପାରିବା ଦ୍ୱାରା ପୂଜକମାନଙ୍କୁ ମିଳୁଥିବା ଦକ୍ଷିଣା ମଧ୍ୟ ହାତଛଡ଼ା ହୋଇ ଯାଉଛି । ଫଳରେ ବାବାଙ୍କ ପୂଜା କରି ଗୁଜୁରାଣ ଚଳାଉଥିବା ପୂଜକମାନେ ଜୀବିକା ହରାଉଥିବା ଅଭିଯୋଗ କରି ପ୍ରତିବାଦ କରିଥିଲେ । ଫଳରେ ଦିନ ୧୦ଟା ପରଠାରୁ ବାବାଙ୍କ ପହଡ଼ ପକାଯାଇ ଦର୍ଶକଙ୍କୁ ଦର୍ଶନର ସୂଯୋଗ ଦିଆଯାଇ ନଥିଲା । ଏପରିକି ସଂଧ୍ୟା ପର୍ଯ୍ୟନ୍ତ ବାବାଙ୍କ ପହଡ଼ ପଡ଼ିରହିବା ପରେ ଉପଜିଲ୍ଲାପାଳ ୧ଘଣ୍ଟା ମଧ୍ୟରେ କବାଟ ଖୋଲି ବାବାଙ୍କ ଦର୍ଶନ ବ୍ୟବସ୍ଥା କରିବାକୁ ପୂଜକମାନଙ୍କୁ ନିର୍ଦ୍ଦେଶ ଦେଇଥିଲେ । ମାତ୍ର ପୂଜକମାନେ ପ୍ରଶାସନର ଏଭଳି କୁଟୁମ୍ବମରା ନୀତିକୁ ପ୍ରତିବାଦ କରି ଉପଜିଲ୍ଲାପାଳଙ୍କ ନିର୍ଦ୍ଦେଶକୁ ପାଳନ କରିନଥିଲେ । ତେବେ ଆସନ୍ତାକାଲି ବାବାଙ୍କ ବଡ଼ ଓଷା କିଭଳି ହେବ ତାହା ସେହି ବାବା ଧବଳେଶ୍ୱରଙ୍କୁ ଜଣା ବୋଲି ଶ୍ରଦ୍ଧାଳୁମାନେ ନୈରାଶ୍ୟର ପ୍ରକାଶ କରିଛନ୍ତି । ତେବେ ଏ ନେଇ ପୂଜକ ଓ ପ୍ରଶାସନ ପକ୍ଷରୁ ହୋଇଥିବା ପ୍ରସ୍ତୁତି ବୈଠକରେ ସମାଧାନ କରାଯିବାର ଥିଲା । କେବଳ ପ୍ରଶାସନିକ ଅବହେଳା ଯୋଗୁଁ ରାଜ୍ୟର ବିଭିନ୍ନ ପ୍ରାନ୍ତରୁ ଆସିଥିବା ଲୋକେ ହଇରାଣ ହେଉଛନ୍ତି ବୋଲି ଶ୍ରଦ୍ଧାଳୁମାନେ ଅଭିଯୋଗ କରିଛନ୍ତି ।