କେନ୍ଦ୍ର ସରକାରଙ୍କ ଅବହେଳା ପ୍ରତିବାଦରେ ଇପିଏଫ ପେନସନଭୋଗୀଙ୍କ ଧାରଣା

#ଭୁବନେଶ୍ୱର(ଏନ୍‌.ଏମ୍‌.): ଅଲ ଓଡିଶା ଇପିଏଫ ପେନସନର୍ସ ଆସୋସିଏସନର ନିଷ୍ପତ୍ତି କ୍ରମେ ଓଡିଶାର ଇପିଏଫ ପେନସନଭୋଗୀ ବରିଷ୍ଠ ନାଗରିକମାନେ ଜିଲ୍ଲାପାଳମାନଙ୍କ କାର୍ଯ୍ୟାଳୟ ସମ୍ମୁଖରେ ଏବଂ ଅବଶିଷ୍ଟ ୪ଟି ଜିଲ୍ଲାର ଇପିଏଫ କାର୍ଯ୍ୟାଳୟ ସମ୍ମୁଖରେ ଧାରଣା ଓ ବିକ୍ଷୋଭ ପ୍ରଦର୍ଶନ କରିଛନ୍ତି । ୧୦୯୫ ମସିହା ନମ୍ବେମ୍ବର ୧୬ତାରିଖର ଏହି ପେନସନ ଯୋଜନା ତତ୍କାଳୀନ କେନ୍ଦ୍ରସରକାର ଆରମ୍ଭ କରି ପେନସନଭୋଗୀଙ୍କୁ ଅନେକ ସୁନେଲି ସ୍ୱପ୍ନ ଦେଖାଇଥିଲେ । କିନ୍ତୁ ପରବର୍ତ୍ତୀ ସମୟରେ ଏହାକୁ ପ୍ରତାରଣାରେ ପରିଣତ କରିଥିଲେ । ତା’ର ପ୍ରତିବାଦରେ ସାରା ଦେଶ ତଥା ରାଜ୍ୟରେ ସମସ୍ତ ଜିଲ୍ଲାପାଳ ଓ ଇପିଏଫ କାର୍ଯ୍ୟାଳୟ ସମୁଖରେ ଧାରଣା ଦିଆଯାଇଛି । ଏହିକ୍ରମରେ ଆସୋସିଏସନର ଖୋର୍ଦ୍ଧା ଜିଲ୍ଲା କମିଟି ତରଫରୁ ଭୁବନେଶ୍ୱରସ୍ଥ କର୍ମଚାରୀ ଭବିଷ୍ୟନିଧି ସଂଗଠନ କାର୍ଯ୍ୟାଳୟ ସମ୍ମୁଖରେ ଜିଲ୍ଲାର ଶତାଧିକ ଇପିଏଫ ପେନସନଭୋଗୀ ବରିଷ୍ଠ ନାଗରିକମାନେ ଧାରଣାରେ ବସିଥିଲେ । ଏହି ଧାରଣା କାର୍ଯ୍ୟକ୍ରମକୁ ଖୋର୍ଦ୍ଧା ଜିଲ୍ଲା କମିଟି ସଭାପତି ପ୍ରଫୁଲ୍ଲ କୁମାର ଦାସ ପରିଚାଳନା କରିଥିଲେ । ଏଥିରେ ସର୍ବଭାରତୀୟ ଉପସଭାପତି ତଥା ରାଜ୍ୟ ସାଧାରଣ ସମ୍ପାଦକ ଭାଗ୍ୟଧର ବ୍ରହ୍ମା ଉଦବୋଧନ ଦେଇ ଇପିଏଫ ପେନସନ ଭୋଗି ବରିଷ୍ଠ ନାଗରିକଙ୍କ ପ୍ରତି କେନ୍ଦ୍ରସରକାର କରିଆସୁଥିବା କ୍ରମାଗତ ଅବହେଳା ବାବଦରେ ଆଲୋକପାତ କରିଥିଲେ । କେନ୍ଦ୍ର ସରକାରଙ୍କ ଏତାଦୃଶ ପକ୍ଷପାତିତାକୁ ଘୋର ନିନ୍ଦା ମଧ୍ୟ କରିଥିଲେ । ସର୍ବନିମ୍ନ ପେନସନ ୯୦୦୦ଟଙ୍କାକୁ ବୃଦ୍ଧିସହ ମହଙ୍ଗା ଭତ୍ତା ପ୍ରଦାନ ସର୍ବୋଚ୍ଚ ନ୍ୟାୟାଳୟଙ୍କ ଆଦେଶ ଆଧାରରେ ଯଥାଶୀଘ୍ର ବର୍ଦ୍ଧିତ ପେନସନ ପ୍ରଦାନ ସହ ସମସ୍ତ ଇପିଏଫ ପେନସନ ଭୋଗୀଙ୍କୁ ନିଃଶୁଳ୍କ ଚିକିତ୍ସା ସୁବିଧା ଯୋଗାଇଦେବା ଦାବିକୁ କେନ୍ଦ୍ର ସରକାର ପୂରଣ ନକଲେ ଆଗାମୀ ଦିନରେ ଆନ୍ଦୋଳନକୁ ତୀବ୍ରତର କରାଯିବ ବୋଲି ଚେତାବନୀ ଦିଆଯାଇଛି । କେନ୍ଦ୍ର ସରକାର ୨୦୨୪ ନିର୍ବାଚନ ପୂର୍ବରୁ ଯଦି ଏହି ଦାବି ପୂରଣ ନକରନ୍ତି ଦେଶର ୭୬ ଲକ୍ଷ ଇପିଏଫ ପେନସନଭୋଗୀ ପରିବାର “ପେନସନ ନାହିଁତ ଭୋଟ ନାହିଁ’ ନିତି ଆପଣେଇବାକୁ ବାଧ୍ୟ ହେବେ ବୋଲି କୁହାଯାଇଛି । ସି. ଟି. ୟୁ. ଓଡିଶା ନେତା ଦୁଷ୍ମନ୍ତ ଦାସ ଓ ଏଆଇଟିଇସି ନେତା ଡକ୍ଟର ପୂର୍ଣ୍ଣ ଚନ୍ଦ୍ର ବେହେରା ଧାରଣା କାର୍ଯ୍ୟକ୍ରମରେ ଯୋଗଦାନ କରି ନିଜ ନିଜର ବକ୍ତବ୍ୟ ରଖି କେନ୍ଦ୍ର ସରକାରଙ୍କ ଏତାଦୃଶ ଅବହେଳାକୁ ଘୋର ନିନ୍ଦା କରିଥିଲେ । ଆସୋସିଏସନର ଏକ ପ୍ରତିନିଧି ମଣ୍ଡଳୀ ଭୁବନେଶ୍ୱର ଆଞ୍ଚଳିକ ପ୍ରୋଭିଡେଣ୍ଟଫଣ୍ଡ ଆଯୁକ୍ତଙ୍କ ଜରିଆରେ ପ୍ରଧାନମନ୍ତ୍ରୀଙ୍କ ଉଦେଶ୍ୟରେ ଏକ ଦାବିପତ୍ର ପ୍ରଦାନ କରିଥିଲେ । ଏହି ଧାରଣା କାର୍ଯ୍ୟକ୍ରମରେ ସଙ୍ଘର ରାଜ୍ୟ ସଭାପତି ବିଜୟ କୁମାର ଜେନା, ଜିଲ୍ଲା ସମ୍ପାଦକ ମାୟାଧର ମଲ୍ଲିକ, ଉପଦେଷ୍ଟା ନଟବର ଆଚାର୍ଯ୍ୟ, ମୁକ୍ତିକାନ୍ତ ମହାପାତ୍ର, ରାଜ୍ୟ ନିଗମ କର୍ମଚାରୀ ମହାସଂଘ ଅଧ୍ୟକ୍ଷ ସତ୍ୟରଂଜନ ପଟ୍ଟନାୟକ, ମହାସଚିବ ସରୋଜ କାନ୍ତ ମଲ୍ଲିକ, ,ସଚ୍ଚିଦାନନ୍ଦ ସାମନ୍ତରାୟ, ପ୍ରକାଶ ପଟନାୟକ, ବସନ୍ତ କୁମାର ପରିଡା, ଗୀତାଞ୍ଜଳି ପାତ୍ର, ଅର୍ଚ୍ଚନା ପଟ୍ଟନାୟକ, ପ୍ରଭାକର ପରିଡା, ପଞ୍ଚାନନ ବେହେରା, ଶିବଶଙ୍କର ପ୍ରଧାନ ପ୍ରମୁଖ ଉପସ୍ଥିତ ଥିଲେ ।