ଓ.ଟି.ଏମ୍. ଶ୍ରମିକ ବସ୍ତି ଥଇଥାନ ଦାବିରେ ଜିଲ୍ଲାପାଳଙ୍କ ଅଫିସରେ ବିକ୍ଷୋଭ ଓ ଧାରଣା
ଚୌଦ୍ୱାରବାସୀଙ୍କ ସ୍ୱାର୍ଥ ପାଇଁ ସମୂହ ଏକାଠି ହେଲେ
#କଟକ(ଏନ୍.ଏମ୍.): କଟକ ଜିଲ୍ଲାର ଶିଳ୍ପନଗରୀ ଚୌଦ୍ୱାରର ଓ.ଟି.ଏମ୍. ଶ୍ରମିକ କଲୋନୀ, ଷ୍ଟାପ୍ କଲୋନୀ ଏବଂ ତତ୍ସଂଲଗ୍ନ ବସ୍ତି ଦୁର୍ଗାବଜାର, ମୁଣ୍ଡାସାହି, ଜୟନ୍ତୀନଗର, ମୁଣ୍ଡମାଳ ବସ୍ତି ଓ ଗୋପାଳନଗର ବସ୍ତି ସମେତ ଚୌଦ୍ୱାର ପୌରପାଳିକାର ୪ଟି ୱାର୍ଡର ଜନସାଧାରଣଙ୍କ ଥଇଥାନ ଓ ସେହି ଅଞ୍ଚଳରେ ଥିବା ୨ଟି ସରକାରୀ ହାଇସ୍କୁଲ, ୩ଟି ପ୍ରାଥମିକ ବିଦ୍ୟାଳୟ, ୧୧ରୁ ଉର୍ଦ୍ଧ୍ୱ ଠାକୁରଙ୍କ ମନ୍ଦିର ସମେତ ପୁରାଣ ପ୍ରସିଦ୍ଧ ବଧିମନ୍ଦିର ସଂଲଗ୍ନ ପ୍ରତ୍ନତତ୍ତ୍ୱ ବିଭାଗର ଐତିହ୍ୟଗୁଡିକର ବିକାଶ ଓ ସୁରକ୍ଷାକୁ ଅଗ୍ରାଧିକାର ଦେବା ଏବଂ ଅଧାବୟସରେ ଚାକିରୀ ହରାଇ ଅତ୍ୟନ୍ତ ଦୁର୍ବିସହ ଜୀବନଯାପନ କରିଆସୁଥିବା ଓ.ଟି.ଏମ୍. ଶ୍ରମିକମାନଙ୍କ ପରିବାରର ସଦସ୍ୟମାନଙ୍କୁ ପ୍ରସ୍ତାବିତ କମ୍ପାନୀମାନଙ୍କରେ ନିଯୁକ୍ତି କ୍ଷେତ୍ରରେ ଅଗ୍ରାଧିକାର ଦେବା ପାଇଁ ନୀତିଗତ ନିଷ୍ପତ୍ତି କରି ଅବଶିଷ୍ଟ ଶହ ଶହ ଏକର ଜମିରେ ଶିଳ୍ପ ପ୍ରତିଷ୍ଠା କରିବା ଦାବିରେ ଆଜି ଓ.ଟି.ଏମ୍. ଶ୍ରମିକ ବସ୍ତି ଥଇଥାନ ସଂଗଠନ ପକ୍ଷରୁ କଟକ ଜିଲ୍ଲାପାଳଙ୍କ ନିକଟରେ ଦାବି କରାଯାଇଛି ।
ଦିନ ପ୍ରାୟ ୧୧ଘଟିକା ସମୟରେ ପୁରୀଘାଟସ୍ଥିତ ମହାତ୍ମା ଗାନ୍ଧୀଙ୍କ ପ୍ରତିମୂର୍ତ୍ତିରେ ଆନ୍ଦୋଳନକାରୀମାନେ ପୁଷ୍ପମାଲ୍ୟ ପ୍ରଦାନ କରିବା ପରେ ଏକ ସୁସଜ୍ଜିତ ଶୋଭାଯାତ୍ରାରେ ଜିଲ୍ଲାପାଳଙ୍କ ଅଫିସ ସମ୍ମୁଖରେ ପହଞ୍ôଚ ପରିଚାଳନା କମିଟି ପକ୍ଷରୁ ବିଶ୍ୱରଞ୍ଜନ କର ଆନ୍ଦୋଳନର ଉଦ୍ଦେଶ୍ୟ ସଂପର୍କରେ ବକ୍ତବ୍ୟ ରଖି କହିଥିଲେ ଯେ, ଯେଉଁ ଶ୍ରମିକମାନଙ୍କ ଝାଳ, ରକ୍ତ ଓ ଜୀବନ ବିନିମୟରେ ଚୌଦ୍ୱାର ଆଜି ସମୃଦ୍ଧଶାଳୀ ହୋଇଛି ସେହି ଶ୍ରମିକମାନଙ୍କୁ ଆଜି ସରକାର କ୍ଷୀରରୁ ମାଛି କାଢିଲା ଭଳି େ‘ାପାଡି ଦେବା ଭଳି ଉଦ୍ୟମ ଅତ୍ୟନ୍ତ ଅମାନବୀୟ ଅଟେ । ତେଣୁ ଦୀର୍ଘ ୭୫ବର୍ଷ ଧରି ରହି ଆସିଥିବା ଶ୍ରମିକମାନଙ୍କ ପରିବାର ଏବଂ ସେମାନଙ୍କୁ ବିଭିନ୍ନ ପ୍ରକାର ସେବା ଯୋଗାଇ ଦେବା ପାଇଁ ଗଢି ଉଠିଥିବା ବସ୍ତିଗୁଡିକର ଥଇଥାନ ପାଇଁ ସରକାର କୌଣସି ଆଶ୍ୱାସନା ନ ଦେଇ ସମସ୍ତ ଜମି ଇଡିକୋକୁ ହସ୍ତାନ୍ତର କରିବା ଅତ୍ୟନ୍ତ ଅମାନବୀୟ ପରିଚୟ ସୃଷ୍ଟି କରୁଛି । ତେଣୁ ସେମାନଙ୍କୁ ଥଇଥାନ କରିବା ପାଇଁ ସ୍ୱଳ୍ପ କିଛି ଜମି ଛାଡି ଦେବା ସହ ସମସ୍ତ ଆବଶ୍ୟକୀୟ ସହରୀ ବ୍ୟବସ୍ଥା ଉପଲବ୍ଧ କରାଇବା ଅତ୍ୟନ୍ତ ଜରୁରୀ ଅଟେ । ସଂଗଠନର ଅନ୍ୟତମ ସଦସ୍ୟ ଜୟ ସିଂ ତାଙ୍କ ବକ୍ତବ୍ୟରେ ଚୌଦ୍ୱାରରେ ସୃଷ୍ଟି ହେବାକୁ ଯାଉଥିବା ମାନବିକ ବିପର୍ଯ୍ୟୟ ସଂପର୍କରେ ରାଜ୍ୟ ସରକାର ଗୁରୁତ୍ୱ ଦେବା ପାଇଁ ଅନୁରୋଧ କରିଥିଲେ । ସଂଗଠନର ଏହି ଦାବିକୁ ସମର୍ଥନ କରି ଓଡ଼ିଶାର ବରିଷ୍ଠ ଜନନେତା ଜନାର୍ଦ୍ଦନ ପତି, ବରିଷ୍ଠ ସାମ୍ବାଦିକ ରବି ଦାସ, ଲୋକଶକ୍ତି ଅଭିଯାନର ପ୍ରଫୁଲ୍ଲ ସାମନ୍ତରାୟ, ବାରବାଟି-କଟକର ବିଧାୟକ ଇଂ. ମହମ୍ମଦ ମୋକିମ, କଂଗ୍ରେସ ନେତା ସୁରେଶ ମହାପାତ୍ର, ଚୌଦ୍ୱାର କଂଗ୍ରେସ ସଭାପତି ବିଜୟ ବେହେରା, ସିପିଆଇ ନେତା ଆଡଭୋକେଟ ପ୍ରଶାନ୍ତ ମିଶ୍ର, ଚୌଦ୍ୱାରର ବରିଷ୍ଠ କମ୍ୟୁନିଷ୍ଟ ନେତା ବଳରାମ ସ୍ୱାଇଁ, ଜିଲ୍ଲା ସଂପାଦକ ବିନୋଦ ବେହେରା, ଅମରେନ୍ଦୁ ମହାନ୍ତି, ଆପ୍ର ଜିଲ୍ଲା ସଭାପତି ଦୁର୍ଗା ପ୍ରସାଦ ପରିଡ଼ା, ସିପିଆଇ(ଏମ୍)ର ଜିଲ୍ଲା ସଂପାଦକ ବଦ୍ରିନାରାୟଣ ଦାଶ, ଚୌଦ୍ୱାର ଆଞ୍ଚଳିକ କମିଟି ସଂପାଦକ ବିଷ୍ଣୁ ବେହେରା, କଟକ ମହାନଗର ସଂପାଦକ ପ୍ରତାପ ମହାପାତ୍ର, ବରିଷ୍ଠ ନେତା ରବିନାରାୟଣ ମଲ୍ଲିକ, ଆଇନଜୀବୀ ଚିତ୍ତ ମହାନ୍ତି ଅନ୍ୟାନ୍ୟ ବହୁ ସାମାଜିକ କର୍ମୀ ଏହି ଆନ୍ଦୋଳନକୁ ସମର୍ଥନ କରି ବକ୍ତବ୍ୟ ରଖିବା ପରେ ବରିଷ୍ଠ ନେତୃମଣ୍ଡଳୀ ଜିଲ୍ଲାପାଳଙ୍କୁ ଦାବିପତ୍ର ଦେଇ ଆଲୋଚନା କରିଥିଲେ ।