ସାବତ ମା’ ମାଡ଼ରେ ଦୁଇ ଶିଶୁ ଗୁରୁତର, ଉଦ୍ଧାର ପରେ ମେଡ଼ିକାଲରେ ଭର୍ତ୍ତି

ଆଠଗଡ଼ (ଏନ୍‌.ଏମ୍‌.): କଥାରେ ଅଛି ମା’ ନାହିଁ ଯାହାର ସାହା ନାହିଁ ତାହାର । ପିଲାମାନଙ୍କ ଉପରେ ମା’ ସ୍ନେହମମତା ଅଦ୍ୱିତୀୟ । ତେବେ ବେଳେବେଳେ ମା’ ଠାରୁ ଅଧିକ ସ୍ନେହ ମମତା ମଧ୍ୟ ସାବତ ମା’ ଠାରୁ ମିଳିଥାଏ । ତେବେ ଏସବୁ ବିରଳ । ତେବେ ସାବତ ମା’ର ପିଲାମାନଙ୍କ ଉପରେ କିଭଳି ପ୍ରଭାବ ପଡ଼େ ତାହାର ଏକ ସଦ୍ୟ ନମୂନା ଦେଖିବାକୁ ମିଳିଛି କଟକ ଜିଲ୍ଲା ଆଠଗଡ଼ ଅଞ୍ଚଳରେ । ସାବତ ମା’ଙ୍କ ମାଡ଼ରେ ଦୁଇ ଶିଶୁ ଗୁରୁତର । ଏପରିକି ବିସ୍କୁଟ ଖଣ୍ଡେ ଖାଇଦେଇଥିବା ପିଲାମାନଙ୍କ ପାଇଁ ବଡ଼ ଅପରାଧ ହୋଇ ପଡ଼ିଛି । ଆଉ ତାକୁ ଦଣ୍ଡିତ କରିଛି ସାବତ ମା’ । କଥାଟା ଶୁଣିବା ବେଳକୁ ଅତ୍ୟନ୍ତ ଦୁଃଖ ଲାଗୁଥିଲେ ମଧ୍ୟ ସାବତ ମା’ର ମାଡ଼ କିନ୍ତୁ ଅଟକି ଯାଇନଥିଲା । ସ୍ଥାନୀୟ ଲୋକଙ୍କ ଦ୍ୱାରା ଦୁଇ ଶିଶୁ ଉଦ୍ଧାର ହେବା ପରେ ସାବତ ମା’ର ଏଭଳି ନିର୍ଯ୍ୟାତନା ଲୋକଲୋଚନକୁ ଆସିଛି । ଗୁରୁତର ଭାବରେ ଆଠଗଡ଼ ମେଡିକାଲରେ ଭର୍ତ୍ତି ହୋଇଛନ୍ତି ଦୁଇ ଶିଶୁ । ତାଙ୍କର ଦେହର ସମସ୍ତ ଅଙ୍ଗପ୍ରତ୍ୟେଙ୍ଗରେ ଲାଗିଛି ଗଭୀର ଆଘାତ, ଏପରିକି ଜଣେ ଶିଶୁର ଆଖିରେ ମଧ୍ୟ ଗଭୀର ଆଘାତ ଲାଗି ରକ୍ତ ଜମାଟ ବାନ୍ଧିଯାଇଥିବା ଡାକ୍ତର ଯାଞ୍ଚବେଳେ ଜାଣିବାକୁ ପାଇଥିଲେ । କେବଳ ସେତିକି ନୁହେଁ ଦୁଇଦିନ ଧରି ଶିଶୁ ଦ୍ୱୟଙ୍କୁ ସାବତ ମା’ କିଛି ଖାଇବାକୁ ଦେଇନଥିବା ଜଣାପଡ଼ିଥିଲା । ତେବେ ଏଭଳି ଅଭାବନୀୟ ଘଟଣା ଘଟିଛି ଆଠଗଡ଼ ଥାନା ଅନ୍ତର୍ଗତ ଅଶୋକ ନଗର ଅଞ୍ଚଳରେ । ଶିଶୁ ଦୁଇ ଜଣଙ୍କୁ ଅତି ନିର୍ମମ ଭାବରେ ମାଡ଼ ମାରିଥିବା ଅଭିଯୋଗ ହୋଇଛି । ରଶିରେ ବାନ୍ଧି ବାଡିରେ ମାରିଥିବା ଶିଶୁମାନେ ବିଭାଗୀୟ ଅଧିକାରୀଙ୍କ ନିକଟରେ କାନ୍ଦି କାନ୍ଦି କହିଥିଲେ । ତେବେ ସାବତ ମା’କୁ ପୁଲିସ ଅଟକ ରଖି ପଚରା ଉଚରା କରୁଥିବା ଜଣାପଡ଼ିଛି ।