କାର୍ତ୍ତିକ ମାସର ପ୍ରଥମ ସୋମବାର: ଧବଳେଶ୍ୱର ପୀଠରେ ଶ୍ରଦ୍ଧାଳୁଙ୍କ ପ୍ରବଳ ସମାଗମ, ଅବକାଶ ବେଶ ଦର୍ଶନ

#ଆଠଗଡ଼/ଚୌଦ୍ୱାର (ଏନ୍‌.ଏମ୍‌.) : ଆଜି କାର୍ତ୍ତିକ ମାସର ପ୍ରଥମ ସୋମବାର ଅବସରରେ ରାଜ୍ୟର ପ୍ରତ୍ୟେକ ଶୈବ ପୀଠରେ ଶ୍ରଦ୍ଧାଳୁଙ୍କ ସମାଗମ ଦେଖିବାକୁ ମିଳିଛି । ଏହି ପରିପ୍ରେକ୍ଷୀରେ କଟକ ଜିଲ୍ଲା ଆଠଗଡ଼ ବ୍ଲକ ଅନ୍ତର୍ଗତ ବାବା ଧବଳେଶ୍ୱରଙ୍କ ପୀଠରେ ନାହିଁ ନଥିବା ଭିଡ ଦେଖିବାକୁ ମିଳିଥିଲା । ଭୋରୁ ଭୋରୁ ହଜାର ହଜାର ସଂଖ୍ୟାରେ ଶ୍ରଦ୍ଧାଳୁ ଓଁ ନମଃ ଶିବାୟ ଜପ କରି ଧବଳେଶ୍ୱର ପୀଠକୁ ଯାଉଥିବା ଦେଖିବାକୁ ମିଳିଥିଲା । ତେବେ ଏହି ଐତିହାସିକ ପୀଠରେ କାର୍ତ୍ତିକମାସର ପ୍ରତ୍ୟେକ ସୋମବାର ସହିତ ବଡ଼ ଓଷା କରାଯାଏ । ଏହି ମନ୍ଦିରର ବଡ଼ଓଷାରେ ଗଜଭୋଗର ସ୍ୱତନ୍ତ୍ରତା ରହିଛି । ତେବେ ବାବାଙ୍କ ଗଜଭୋଗ ପାଇବା ପାଇଁ କେବଳ କଟକ କାହିଁକି ରାଜ୍ୟର କୋଣ ଅନୁକୋଣରୁ ଶ୍ରଦ୍ଧାଳୁ ଧାଇଁ ଆସିଥାନ୍ତି । କାର୍ତ୍ତିକମାସର ପହିଲି ସୋମବାର ହେତୁ ଆଜି ବାବା ଧବଳେଶ୍ୱରଙ୍କ ସ୍ୱତନ୍ତ୍ର ପୂଜାର୍ଚ୍ଚନା କରାଯାଇଥିଲା । ଭୋର ୪ଘଟିକାରେ ପହଡ଼ ଖୋଲାଯିବା ସହ ୧୦୮ଗରା ସୁଗନ୍ଧିତ ଜଳରେ ବାବାଙ୍କୁ ମାଘସ୍ନାନ କରାଯିବା ପରେ ଅବକାଶ ନୀତି ହୋଇଥିଲା । ଏହି ଅବସରରେ ବାବାଙ୍କ ଅବକାଶ ବେଶ ହୋଇଥିଲା । ତା’ପରେ ମଙ୍ଗଳ ଆଳତୀ କରାଯାଇ ପହିଲି ଭୋଗ ଲଗାଯାଇଥିଲା । ଏହାପରେ ଶ୍ରଦ୍ଧାଳୁ ବାବାଙ୍କ ଦର୍ଶନ କରିଥିଲେ । ଏହି ସମୟରେ ଶ୍ରଦ୍ଧାଳୁଙ୍କ ଓଁ ନମଃ ଶିବାୟ ଧ୍ୱନୀରେ ପୀଠ ପ୍ରକମ୍ପିତ ହୋଇ ଉଠିଥିଲା । ତେବେ ଲୋକକଥା ଅନୁଯାୟୀ ବାବା ଧବଳେଶ୍ୱରଙ୍କ ମହିମା ଅପାର ରହିଛି । ବାବାଙ୍କ ବିଷୟରେ ଅଧିକ ଅନୁସନ୍ଧାନ କଲେ ବହୁ ଅଲୌକିକ ଘଟଣା ମାନ ଘଟିଥିବା ଜଣାପଡେ । ଏପରିକି ଭକ୍ତର ଆକୁଳ ନିବେଦନକୁ ଗ୍ରହଣ କରି ବାବା କଳା ବଳଦକୁ ଧଳା ରଙ୍ଗରେ ପରିବର୍ତ୍ତନ କରାଇ ଦେଇଥିବାରୁ ତାଙ୍କର ନାମ ଧବଳେଶ୍ୱର କୁହାଯାଏ ବୋଲି ବହୁ ପୁରୁଖା ଲୋକଙ୍କ ମତ ରହିଛି । ତେବେ କାର୍ତ୍ତିକମାସର ପ୍ରତ୍ୟେକ ସୋମବାରରେ ବାବାଙ୍କ ଦର୍ଶନ କଲେ କାମ, କ୍ରୋଧ, ରୋଗ, ଶୋକ ଆଦି ଦୂର ହୁଏ ବୋଲି ବିଶ୍ୱାସ ରହିଛି । ବିଶେଷ କରି ଏହି ମାସଟି ଧର୍ମମାସ ହୋଇଥିବାବେଳେ ବାବାଙ୍କ ସ୍ୱତନ୍ତ୍ର ପୂଜା ପାଇଁ ଆଜି କଟକ ଜିଲ୍ଲା ସମେତ ପଡୋଶୀ ଢେଙ୍କାନାଳ, କେନ୍ଦ୍ରାପଡ଼ା, ଖୋର୍ଦ୍ଧା, ଯାଜପୁର, ଅନୁଗୋଳ ଆଦି ଜିଲ୍ଲାରୁ ଶ୍ରଦ୍ଧାଳୁମାନେ ଛୁଟି ଆସିଥିବା ଦେଖିବାକୁ ମିଳିଛି । ତେବେ ପୂର୍ବରୁ ବାବା ଧବଳେଶ୍ୱରଙ୍କ ପୀଠକୁ ଝୁଲାପୋଲ ଦେଇ ଯିବାକୁ ପଡ଼ୁଥିବାବେଳେ କାଳକ୍ରମେ ତାହା ଅସୁରକ୍ଷିତ ହୋଇପଡ଼ିଥିଲା । ତେଣୁ ଦୀର୍ଘ ଦିନର ବ୍ୟବଧାନ ପରେ ଏବେ ସ୍ଥାୟୀ କଂକ୍ରିଟ ପୋଲରେ ଶ୍ରଦ୍ଧାଳୁ ଯିବା ବ୍ୟବସ୍ଥା ହୋଇଛି । ପୀଠରେ ହଜାର ହଜାର ଶ୍ରଦ୍ଧାଳୁଙ୍କ ସମାଗମକୁ ଦୃଷ୍ଟିରେ ରଖି ଆଠଗଡ଼ ପୁଲିସ ପ୍ରଶାସନ, ଦେବତ୍ତୋର ବିଭାଗ, ଜିଲ୍ଲାପ୍ରଶାସନ ଓ ପୂଜକ ସମିତି ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି ।