ଆଠଗଡ଼ରେ ଦୁର୍ଗାପୂଜା ଓ ଭଷାଣୀ ଉତ୍ସବ ପାଇଁ ପ୍ରଶାସନିକ ପ୍ରସ୍ତୁତି ବୈଠକ

#ଆଠଗଡ଼(ଏନ୍‌.ଏମ୍‌.): ଶାରଦୀୟ ଦୁର୍ଗାପୂଜା ଓ ଭଷାଣୀ ଉତ୍ସବକୁ ଶାନ୍ତି ଶୃଙ୍ଖଳାର ସହ ସମାପନ କରିବାକୁ ଏକ ପ୍ରଶାସନିକ ପ୍ରସ୍ତୁତି ବୈଠକ ଆଠଗଡ଼ ଉପଜିଲ୍ଲାପାଳ ପ୍ରଶାନ୍ତ କୁମାର ତରାଇଙ୍କ ଅଧ୍ୟକ୍ଷତାରେ ଉପଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମିଳନୀ କକ୍ଷରେ ଅନୁଷ୍ଠିତ ହୋଇଯାଇଛି । ପୂଜା ପୂର୍ବରୁ ସହରର ସମସ୍ତ ୱାର୍ଡରୁ ଅଳିଆ ଆବର୍ଜନା ସଫେଇ କରିବା ସହ ବ୍ଳଚିଂ ପକେଇବା, ରାସ୍ତା ଉପରେ ଗଦା ହୋଇଥିବା ବାଲି, ଗୋଡି ଆଦି ଅବରୋଧ ହଟାଇବା ପାଇଁ ବିଜ୍ଞାପିତ ଅଞ୍ଚଳ ପରଷଦର କାର୍ଯ୍ୟ ନିର୍ବାହୀ ଅଧିକାରୀଙ୍କୁ ନିର୍ଦେଶ ଦିଆଯାଇଛି । ପୂଜା ସମୟରେ ପାନୀୟ ଜଳ ଯୋଗାଣ ବ୍ୟବସ୍ଥାକୁ ତ୍ୱରାନ୍ୱିତ କରିବା ସହ ଏ ସଂକ୍ରାନ୍ତରେ ନିଆଯାଇଥିବା ପଦକ୍ଷେପ ସମ୍ପର୍କରେ ଉପଜିଲ୍ଲାପାଳଙ୍କୁ ଅବଗତ କରିବା ପାଇଁ ଜନସ୍ୱାସ୍ଥ୍ୟ ବିଭାଗକୁ ନିର୍ଦ୍ଦେଶ ଦିଆଯାଇଛି । ପୂଜା ପୂର୍ବରୁ ସହରର ରାସ୍ତାଘାଟଗୁଡିକୁ ସଠିକ ଭାବେ ମରାମତି କରିବା ପାଇଁ ରାସ୍ତା ଓ କୋଠାବାଡ଼ି ବିଭାଗକୁ ଉପଜିଲ୍ଲାପାଳ ନିର୍ଦ୍ଦେଶ ଦେଇଛନ୍ତି । ଅଗ୍ନିଶମ ବିଭାଗ ପୂଜା ସମୟରେ ପ୍ରସ୍ତୁତ ରହିବା ସହ ଅବକାରୀ ବିଭାଗ ଦ୍ୱାରା ମଦ ଦୋକାନ ଗୁଡିକୁ ସିଲ କରିବା ବେଆଇନ ମଦ କାରବାରକୁ ରୋକିବାକୁ ପୂଜା ସମୟରେ ଅବକାରୀ ବିଭାଗ ଚଢ଼ାଉକୁ ବ୍ୟାପକ କରିବାକୁ ନିର୍ଦେଶ ଦେଇଛନ୍ତି । ପୂଜା ପୂର୍ବରୁ ଆବଶ୍ୟକୀୟ ମରାମତି କାର୍ଯ୍ୟ ଶେଷ କରି ପୂଜା ସମୟରେ ବିଦ୍ୟୁତ ସରବରାହ ସ୍ୱଭାବିକ କରିବାକୁ ବିଦ୍ୟୁତ ବିଭାଗକୁ ଉପଜିଲ୍ଲାପାଳ ନିର୍ଦେଶ ଦେଇଛନ୍ତି । ଚଳିତ ବର୍ଷ ପୂଜା ଓ ଭଷାଣୀ ଉତ୍ସବରେ ଡି.ଜେ. ସାଉଣ୍ଡ ବ୍ୟବହାରକୁ ପ୍ରଶାସନ ତରଫରୁ ସମ୍ପୂର୍ଣ୍ଣ ବାରଣ କରାଯାଇଛି ଓ ଭଷାଣି ଉତ୍ସବରେ ପାରମ୍ପରିକ ବାଦ୍ୟ ବ୍ୟବହାର ପାଇଁ ବୈଠକରେ ନିଷ୍ପତ୍ତି ଗ୍ରହଣ କରାଯାଇଛି । ସାପୁଆ ନଦୀ ସନ୍ନିକଟରେ ଅସ୍ଥାୟୀ ବିସର୍ଜନ ପୁସ୍କରଣୀରେ ମର୍ତ୍ତି ଗୁଡିକ ବିସର୍ଜନ କରାଯିବ । ଆଇନ ଶୃଙ୍ଖଳା ରକ୍ଷା କରିବାକୁ ଆରକ୍ଷୀ ବିଭାଗକୁ ଉପଜିଲ୍ଲାପାଳ ନିର୍ଦ୍ଦେଶ ଦେଇଥିଲେ । ଆଠଗଡ଼ର ଏହି ପାରମ୍ପରିକ ଗଣପର୍ବ ଦୁର୍ଗାପୂଜାକୁ ଶୃଙ୍ଖଳିତ ଓ ବ୍ୟବସ୍ଥିତ ଢଙ୍ଗରେ ପାଳନ କରିବାକୁ ସମସ୍ତ ପୂଜାକମିଟିର କାର୍ଯ୍ୟକର୍ତ୍ତାମାନଙ୍କୁ ଉପଜିଲ୍ଲାପାଳ ଅନୁରୋଧ କରିଥିଲେ । ଏହି ବୈଠକରେ ଉପଖଣ୍ଡ ଆରକ୍ଷୀ ଅଧିକାରୀ ରବୀନ୍ଦ୍ର କୁମାର ମଲ୍ଲିକ, ତହସିଲଦାର ଆଠଗଡ଼ ପ୍ରିୟବ୍ରତ ଦାସ, ନିର୍ବାହୀ ଅଧିକାରୀ ଦୀପ୍ତିମୟୀ ବେହେରା, ସହକାରୀ ନିର୍ବାହୀ ଯନ୍ତ୍ରୀ ରାସ୍ତା ଓ କୋଠାବାଡ଼ି ଦିନେଶ ସାହୁ, ବିଜ୍ଞାପିତ ଅଞ୍ଚଳ ପରିଷଦର ଅଧ୍ୟଷା ସସ୍ମିତା ରାଉତଙ୍କ ସମେତ ବିଭିନ୍ନ ବିଭାଗର ଅଧିକାରୀ, ଗଣମାଧ୍ୟମ ପ୍ରତିନିଧି, ପୂଜା କମିଟିର କାର୍ଯ୍ୟକର୍ତ୍ତା ଯୋଗଦେଇ ଆଲୋଚନାରେ ଅଂଶଗ୍ରହଣ କରିଥିଲେ ।