ଅସ୍ତ ହୋଇଗଲେ ମିଶ୍ର ସାର

#ଚୌଦ୍ୱାର (ଏନ୍ ଏମ): ଆଉ ନାହାନ୍ତି ମଣିଷ ଗଢା କାରଖାନାର ସଫଳ ବିନ୍ଧାଣୀ ମିଶ୍ର ସାର । ଦିନେ ପଢ଼ଉ ପଢ଼ଉ ବୃତ୍ତିରେ ହୋଇଗଲେ ଶିକ୍ଷକ । ଆଉ ଗାଁର ଚାଳ ଛପର ଘରରୁ ପାଠ ପଢୁଥିବା ଶିକ୍ଷକ ହୋଇଗଲେ ପିଲାମାନଙ୍କ ମିଶ୍ର ସାର । ହଁ ଆଜ୍ଞା ଆମେ କହଛୁ ସେଇ ସାରଙ୍କ କଥା କଟକ ଜିଲ୍ଲା ଚୌଦ୍ୱାର ଥାନା ଅନ୍ତର୍ଗତ କୟଳପଡ଼ା ପଞ୍ଚାୟତର ରହିଥିବା ସ୍ୱର୍ଗତ ପଣ୍ଡିତ ନାରାୟଣ ମିଶ୍ରଙ୍କ ସୁପୁତ୍ର ପର୍ଶୁରାମ ମିଶ୍ର ସାରଙ୍କ କଥା । ଏକଦା ଦିନ ଶିକ୍ଷକତା ଏତେ ନିଶା ଥିଲା ଯେ, ନିଜର କୌଳିକ ବୃତ୍ତିକୁ ସମୟ କମଦେଇ ଶିକ୍ଷକତାରେ ମଜି ଯାଇଥିଲେ ମିଶ୍ର ସାର । ଦୀର୍ଘ ୪ ଦଶନ୍ଧି ଧରି ନିଜର ନିଷ୍ଠାପର କର୍ତ୍ତବ୍ୟ କରି ଆଜି ଶେଷ ନିଶ୍ୱାସ ତ୍ୟାଗ କରିଛନ୍ତି ପର୍ଶୁରାମ ମିଶ୍ର । କୟଳପଡ଼ା ଅଧିବାସୀ ମିଶ୍ର ସାର ଆଉ ନାହାନ୍ତି ୯୧ ବର୍ଷରେ ବାର୍ଦ୍ଧକ ଜନିତ ରୋଗରେ ପରଲୋକ ଗମନ କରିଛନ୍ତି । ୧୯୫୧ ମସିହାରୁ ନିଜର ଶିକ୍ଷକତା ଆରମ୍ଭ କରିଥିବ ମିଶ୍ର ସାର ଦୀର୍ଘ ୪୦ ବର୍ଷ ଧରି ନିଜର ଶିକ୍ଷକତା ପ୍ରଦାନ ବଳରେ କାହିଁ କେତେ ଯେ ଛାତ୍ରଛାତ୍ରୀଙ୍କୁ ଉଚ୍ଚ ଶିକ୍ଷିତ କରିଛନ୍ତି ତାହାର କଳନା ନାହିଁ । ତାଙ୍କ ହାତ ତିଆରି କେତେ ଯେ ଛାତ୍ର ଇଂଜିନିୟର, ଡାକ୍ତର, ଓଏଏସ, ଶିକ୍ଷକ, ଓକିଲ ସହ ଅନ୍ୟାନ୍ୟ ବିଭାଗରେ ମଧ୍ୟ ବହୁ ବଡ଼ ବଡ଼ ପଦବୀରେ ଅବସ୍ଥିତ ଅଛନ୍ତି । ସେ ଟାଙ୍ଗୀ ଚୌଦ୍ୱାର ବ୍ଲକର ବିଭିନ୍ନ ପଞ୍ଚାୟତରେ ଥିବା ବିଦ୍ୟାଳୟମାନଙ୍କରେ ଶିକ୍ଷକତା କରି ପ୍ରଧାନ ଶିକ୍ଷକ ଭାବରେ ଶେଷରେ ନିଜ ଗାଁ ସ୍କୁଲରେ ଅବସର ଗ୍ରହଣ କରିଥିଲେ । ତେବେ ଶ୍ରୀ ମିଶ୍ର ଏକାଧାରରେ ଜଣେ ମିଷ୍ଟଭାଷୀ ଓ ମେଳାପି ଲୋକ ଥିଲେ । ତାଙ୍କର ଶେଷ ଶଯ୍ୟା ନିକଟରେ ତିନି ଝିଅ, ଜ୍ୱାଇଁ, ନାତୀନାତୁଣୀ ବନ୍ଧୁ ପରିଜନ ଉପସ୍ଥିତ ଥିଲେ । ତାଙ୍କ ପରଲୋକଗତ ଖବର ପାଇ ଅନେକ ଛାତ୍ରଛାତ୍ରୀ, ବହୁ ଶିକ୍ଷକଗଣ, ଗ୍ରାମବାସୀ ତଥା ତାଙ୍କ ଆତ୍ମୀୟ ସ୍ୱଜନ ତାଙ୍କର ବାସ ଭବନରେ ପହଞ୍ଚି ଶେଷ ଦର୍ଶନ କରିଥିଲେ । ଏଥି ସହିତ ସ୍ଥାନୀୟ ସରପଞ୍ଚ ଶୈଳବାଳା ନାୟକ ପହଞ୍ଚି ଶେଷ ଦର୍ଶନ କରିବା ସହିତ ମିଶ୍ର ସାରଙ୍କ ପରଲୋକ ଏହି ପଞ୍ଚାୟତ ଏକ ଆଦର୍ଶ ଶିକ୍ଷକଙ୍କୁ ହରାଇଲା ବୋଲି ମତବ୍ୟକ୍ତ କରିଥିଲେ । ପରିଶେଷରେ ସାହି ପରିକ୍ରମା କରି ତାଙ୍କୁ ନିଜ ଗ୍ରାମ ଶ୍ମଶାନରେ ଶେଷକୃତ୍ୟ ସମ୍ପନ୍ନ କରାଯାଇଥିଲା । ନାତି ପ୍ରକାଶ ମିଶ୍ର ମୁଖାଗ୍ନି ଦେଇଥିଲେ ।