ବିଧାନସଭା ଆଗରେ ଅଭିନବ ଧାରାରେ ଗାଁସାଥୀ (ମେଟ୍)ଙ୍କ ଶକ୍ତି ପ୍ରଦର୍ଶନ
ଉକ୍ତ ଆନ୍ଦୋନକୁ ଏକାଧିକ ସଂଗଠନ ଓ ସାମାଜିକ କର୍ମୀଙ୍କ ସମର୍ଥନ
#ଭୁବନେଶ୍ୱର(ଏନ୍.ଏମ୍.): ମାସିକ ୧୦ ହଜାର ଟଙ୍କାର ପ୍ରୋତ୍ସାହନ ରାଶି ପ୍ରାପ୍ତି ଓ ଗାଁସାଥୀ (ମେଟ୍)ଙ୍କ ପାଇଁ ଥିବା ସମସ୍ତ ସରକାରୀ ସକାରାତ୍ମକ ଚିଠିକୁ ପଞ୍ଚାୟତସ୍ତରରେ ସଠିକ୍ କାର୍ଯ୍ୟକାରୀ କରିବା ଲାଗି ସ୍ୱତନ୍ତ୍ର ନିର୍ଦ୍ଦେଶନାମା ଜାରି ଆଦି ୨ଦଫା ଦାବି ନେଇ ଚଳିତ ସେପ୍ଟେମ୍ବର ୨୫ରୁ ଗଣଧାରଣାରେ ବସିଛନ୍ତି ଗାଁସାଥୀ । ଗାଁ ସାଥୀ (ମେଟ୍) ସଂଘ ମିଳିତ କ୍ରିୟାନୁଷ୍ଠାନ କମିଟି, ଓଡ଼ିଶା ପ୍ରଦେଶର ରାଜ୍ୟ, ଜିଲ୍ଲା ଓ ବ୍ଲକର ସଂଗଠନ ଗୁଡ଼ିକ ଦୀର୍ଘ ୫ ଦିନର ଅବଧି ମଧ୍ୟରେ ସରକାର ଉକ୍ତ ସଂଘର ଦାବି ପୂରଣ ପାଇଁ ସେପରି କୌଣସି ସରକାରୀ ଆଲୋଚନା ବା ପ୍ରଶାସନିକ ସମାଧାନ ପୂର୍ବକ ବ୍ୟବସ୍ଥା ନକରିବାରୁ ଆଜି କିଛି ସ୍ୱତନ୍ତ୍ର ତଥା ଅଭିନବ ଧାରାରେ ବିଧାନସଭା ବ୍ୟାରିକେଡ୍ ଆଗରେ ଆନ୍ଦୋଳନ କରିଛି ଗାଁସାଥୀ (ମେଟ୍) ସଂଘ ମିଳିତ କ୍ରିୟାନୁଷ୍ଠାନ କମିଟି । ସଂଘର ରାଜ୍ୟ ସଭାପତି ଲକ୍ଷ୍ମୀଧର ବିଶ୍ୱାଳଙ୍କ ନେତୃତ୍ୱରେ ହଜାର ହଜାର ଗାଁସାଥୀ (ମେଟ୍) ମୁଣ୍ଡରେ ରିବନ ବାନ୍ଧି ରାସ୍ତା ସଫେଇ କରିବା ସହିତ ସମସ୍ତେ ଆଣ୍ଠେଇ ଆଣ୍ଠେଇ ଦଣ୍ଡବତ ପ୍ରଣାମ ଜଣାଇ କରି ନିଜ ଧାରଣାସ୍ଥଳରୁ ବିଧାନସଭା ବ୍ୟାରିକେଡ୍ ଯାଏ ଏକ ଏ୍ୟୌଶ୍ୱରୀୟ ଧାରାରେ ଆସିଥିଲେ । ଆସିବା ବେଳେ ସଂଘର ନିଜସ୍ୱ କିଛି ସଂଗ୍ରାମୀ ଗୀତ ସହିତ ଗାନ୍ଧିଜୀଙ୍କ ରାମଧୂନ ମଧ୍ୟ ପରିବେଣ ହୋଇଥିଲା । ବ୍ୟାରିକେଡ୍ ନିକଟରେ ପହଞ୍ଚିବା ପରେ ଦାବି ପୂରଣ ପାଇଁ ରାଜ୍ୟ ପଞ୍ଚାୟତିରାଜ ବିଭାଗ ତରଫରୁ ଅହେତୁକ ବିଳମ୍ବ କରିବାର କାରଣ ଦର୍ଶାଇ, ମୁଖ୍ୟମନ୍ତ୍ରୀ ଓ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟର ପ୍ରତ୍ୟକ୍ଷ ହସ୍ତକ୍ଷେପ ଦାବି କରି ଗାଁସାଥୀ (ମେଟ୍) ମାନେ ଗଣତାନ୍ତ୍ରିକ ଧାରାରେ ସେଠାରେ ସାମୁହିକ ଆମରଣ ଅନଶନରେ ବସିଥିଲେ । ଏକାଧିକ ଦଳ ଓ ସଂଗଠନ ତଥା ସାମାଜିକ କର୍ମୀମାନେ ଉକ୍ତ ସଂଘର ଦାବିକୁ ସମର୍ଥନ ଜଣାଇ ସେହି ସ୍ଥାନରେ ଉପସ୍ଥିତ ହୋଇ ସେମାନଙ୍କ ଦାବି ଯଥାର୍ଥ ଓ ସରକାର ତୁରନ୍ତ ସେହି ଦାବିକୁ ପୂରଣ କରିବା ଉଚିତ୍ ବୋଲି ମତବ୍ୟକ୍ତ କରିଥିଲେ । ଆଜିର କାର୍ଯ୍ୟକ୍ରମ ବାବଦରେ ସଂଘର ସଭାପତି ଶ୍ରୀ ବିଶ୍ୱାଳଙ୍କ ମତ ଥିଲା ଯେ, ସରକାରଙ୍କ ପକ୍ଷରୁ ଆଜି ୧୪ ବର୍ଷର ଅପେକ୍ଷା ତଥା ବାରମ୍ବାର ସରକାରୀ ପ୍ରତିଶ୍ରୁତି ଏବଂ ତା’ ପରେ ପ୍ରତାରଣାର ଶିକାର ହେବାକୁ ପଡୁଛି । ଶେଷରେ ଗଣତନ୍ତ୍ରର ସର୍ବୋଚ୍ଚ ମନ୍ଦିର ରାଜ୍ୟ ବିଧାନସଭା ଆଗରେ ଥିବା ଏହି ଗଣତାନ୍ତ୍ରିକ ବଡ଼ଦାଣ୍ଡରେ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଆମ୍ଭମାନଙ୍କୁ ଭୋକ ଉପାସରେ ଅଧିଆ ପଡ଼ିବାକୁ ବାଧ୍ୟ ହେଉଛୁ ବୋଲି କହିଥିଲେ । ଜୀବନ ଯୌବନର ମୂଲ୍ୟବାନ୍ ୧୪ ବର୍ଷ ଏହି ଗାଁସାଥୀ ଭାବରେ କଟିଯିବା ପରେ ଆଜି ତ୍ରିଶଙ୍କୁ ଅବସ୍ଥାରେ ବଡ଼ଯନ୍ତ୍ରଣାସିକ୍ତ ଭାବରେ ଆର୍ଥିକ ଅନାଟନ ମଧ୍ୟରେ ଗତି କରିବା ସମ୍ପର୍କରେ ବିକ୍ଷୋଭକାରୀମାନେ କହିଥିଲେ । ତେଣୁ ଏହି ଦାବିକୁ ସରକାର ପୂରଣ କରନ୍ତୁ, ନଚେତ୍ ଏ ଯୁବଶକ୍ତି ହତାଶା ଭିତରକୁ ଠେଲି ହୋଇଯିବ; ଏଥି ପାଇଁ ଯାହା ହେବ, ସରକାର ଦାୟୀ ରହିବେ ବୋଲି ସଂଘ ପକ୍ଷରୁ ଚେତାବନୀ ମଧ୍ୟ ଦିଆଯାଇଛି । ଆଜିର କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ଗାଁସାଥୀ ସଂଗଠକ ଶ୍ରୀ ବିଶ୍ୱାଳ, ବିବେକାନନ୍ଦ ଠାକୁର, ଅନୀଲ କୁମାର ଜେନା, ଗଦାଧର ସିକ୍କା, କର୍ଣ୍ଣ ଦୁରିଆ, ରାମସ୍ୱାମୀ ପିଡିକା, ସନାଧର ମୁଦୁଲି, ସୁଶାନ୍ତ କୁମାର ନିଲକମଲ, ନୟାନ ନାୟକ, ମିନାରାଣୀ ସିଂହ, ଅନନ୍ତ ମୁର୍ମୁ, ଉମେଶ ମୁଣ୍ଡା, ଉପେନ୍ଦ୍ର ସାହୁ, ଅୟସକାନ୍ତି ନାଏକ, ବିନୋଦ କୁମାର ବେହେରା, ଉମାକାନ୍ତ ସାମନ୍ତରାୟ, ଭାନୁ ଅପା, ଅଜୟ ସ୍ୱାଇଁ, ଶେଷଦେବ ସେଠୀ, ବିଶ୍ୱନାଥ ରାଉତ ପ୍ରମୁଖ ଉପସ୍ଥିତ ଥିଲେ ।
