ଆଞ୍ଚଳିକ ସାମ୍ବାଦିକ ସଂଘର ୯ମ ସ୍ୱନକ୍ଷତ୍ର ଉତ୍ସବ
#ଚୌଦ୍ୱାର(ଏନ୍.ଏମ୍.): କଟକ ଜିଲ୍ଲାର ଅନ୍ୟତମ ଗଣମାଧ୍ୟମ ସଂଗଠନ ଆଞ୍ଚଳିକ ସାମ୍ବାଦିକ ସଂଘର ୯ମ ସ୍ୱନକ୍ଷତ୍ର ଉତ୍ସବ ଅନୁଷ୍ଠିତ ହୋଇଯାଇଛି । ସ୍ଥାନୀୟ ଗାନ୍ଧିଛକ ସ୍ଥିତ ଟାଉନ୍ହଲ ପରିସରରେ ସଂଘର ସଭାପତି ନରେଶ୍ କୁମାର ସାହୁଙ୍କ ସଭାପତିତ୍ୱରେ ଆୟୋଜିତ ଏହି ଉତ୍ସବରେ ଭାରତ ମସଲାର ପ୍ରତିଷ୍ଠାତା ଅଧ୍ୟକ୍ଷ ସୁରେନ୍ଦ୍ର ନାଥ ପଣ୍ଡା ଯୋଗଦେଇ ଉଦ୍ଘାଟନ କରିଥିଲେ । ମୁଖ୍ୟଅତିଥି ଭାବେ ଚୌଦ୍ୱାର-କଟକ ପୂର୍ବତନ ବିଧାୟକ ଡ. ପ୍ରଭାତ ରଞ୍ଜନ ବିଶ୍ୱାଳ ଯୋଗ ଦେଇଥିବା ବେଳେ ମୁଖ୍ୟବକ୍ତା ଭାବେ ଉତ୍କଳ ସାମ୍ବାଦିକ ସଂଘର ରାଜ୍ୟ ସଭାପତି ବିଭୂତି ଭୂଷଣ କର ଓ ସମ୍ମାନିତ ଅତିଥି ଭାବେ ଯୁବ ସଂଗଠକ ହିମାଂଶୁ କୁମାର ମହାନ୍ତି, ସମାଜସେବୀ ସୌମିତ୍ର ଲେଙ୍କା, ଯୁବ ସଂଗଠକ ବିରଜା ପ୍ରସାଦ ରାଉତ, ଉତ୍କଳ ସାମ୍ବାଦିକ ସଂଘର ଜିଲ୍ଲା ସଭାପତି ସତ୍ୟବ୍ରତ ଦାସ ଓ ସମସ୍ତ ସାମ୍ବାଦିକ ଯୋଗ ଦେଇ ସାମ୍ବାଦିକତା ଭଳି ପବିତ୍ର କାର୍ଯ୍ୟକୁ ଏକ ବ୍ରତ ଭାବେ ଗ୍ରହଣ କରିବା ନିମନ୍ତେ ଆହ୍ୱାନ ଦେଇଥିଲେ । କାର୍ଯ୍ୟକ୍ରମରେ ସଂଘର ସାଧାରଣ ସଂପାଦକ ମାନସ କୁମାର ପରିଡ଼ା ସଂପାଦକୀୟ ବିବରଣୀ ପାଠ କରିଥିଲେ । ଏହି ଅବସରରେ ଉପସ୍ଥିତ ଅତିଥିମାନଙ୍କ ଦ୍ୱାରା ସଂଘର ବାର୍ଷିକ ମୁଖପତ୍ର ‘କଲମ-୨୦୨୩’ର ଉନ୍ମୋଚନ ହୋଇଥିଲା । କାର୍ଯ୍ୟକ୍ରମରେ ସଂଘ ପକ୍ଷରୁ ସମାଜରେ ପ୍ରତିଷ୍ଠିତ ସମାଜସେବୀ, ଯୁବସଂଗଠକ, ଶିକ୍ଷକ, ମହିଳା ସଂଗଠନ, କ୍ରୀଡ଼ା ସଂଗଠକ, କ୍ଲବ, ଆଧ୍ୟାତ୍ମିକ ଓ ସାମ୍ବାଦିକତା କ୍ଷେତ୍ରରେ କୃତିତ୍ୱ ଅର୍ଜନ କରିଥିବା ସଫଳ ବ୍ୟକ୍ତିତ୍ୱମାନଙ୍କୁ ଅତିଥିମାନଙ୍କ ଦ୍ୱାରା ଉପଢୌକନ ଓ ମାନପତ୍ର ଦେଇ ସମ୍ବର୍ଦ୍ଧିତ କରାଯାଇଥିଲା । ସଂଘର ଉପଦେଷ୍ଟା ସୁବ୍ରତ କୁମାର ସାମଲ ମଞ୍ଚ ପରିଚାଳନା କରିଥିବାବେଳେ ସମ୍ପାଦକ ସଂଜୀବ କୁମାର ତିୱାରୀ ଧନ୍ୟବାଦ ଅର୍ପଣ କରିଥିଲେ । ଅନ୍ୟମାନଙ୍କ ମଧ୍ୟରେ ଉପସଭାପତି ପ୍ରୀତିରଞ୍ଜନ ବେହେରା, ସୁରେନ୍ଦ୍ର ନାଥ ସାହୁ, ନାରାୟଣ ଜେନା, ଶିବବ୍ରତ ଦାସ, କୋଷାଧ୍ୟକ୍ଷ ଦୀପକ କୁମାର ବେଉରା, ସଂଗଠନ ସଂପାଦକ କୁନା ନାୟକ, ସହ ସଂପାଦକ ରାଜେଶ ନାୟକ, ନବୀନ ରାଓ ଏବଂ କାର୍ଯ୍ୟକାରୀ ସଦସ୍ୟ ବିଶ୍ୱଜିତ୍ ବିଶ୍ୱାଳ, ପ୍ରଭାତ କୁମାର, ପରୀକ୍ଷିତ ଲେଙ୍କା ଓ ଜଗନ୍ନାଥ ଜେନା ପ୍ରମୁଖ ସହଯୋଗ କରିଥିଲେ ।
