ଆନ୍ଦୋଳନ ନେଇ ପରିବହନ କମିଶନରଙ୍କ ସହ ଘରୋଇ ବସ ମାଲିକ ସଂଘର ଆଲୋଚନା ବିଫଳ
ଭୁବନେଶ୍ୱର(ଏନ୍.ଏମ୍.): ରାଜ୍ୟ ସରକାରଙ୍କ ଲକ୍ଷ୍ମୀ ଯୋଜନାକୁ ନେଇ ରାଜ୍ୟରେ ବସ ମାଲିକ ସଂଘର ଅସନ୍ତୋଷ ବଢ଼ିବାରେ ଲାଗିଛି । ଲକ୍ଷାଧିକ ଟଙ୍କା ଋଣ କରି ବସ ବ୍ୟବସାୟରେ ପାଦ ଥାପି ଆତ୍ମ ନିର୍ଭରଶୀଳ ହେବାକୁ ଚାହିଁଥିବା ବ୍ୟକ୍ତିଙ୍କ ପାଇଁ ରାଜ୍ୟସରକାର ପୂର୍ଣ୍ଣଛେଦ ପକାଇବାକୁ ବସିଥିବା ଅଭିଯୋଗ କରିଛି ବସ ମାଲିକ ସଂଘ । ପ୍ରଥମେ ମୋ ବସ ଏବଂ ପରେ ଲକ୍ଷ୍ମୀଯୋଜନାରେ ବସ ଚଳାଚଳ ଯୋଗୁଁ ଘରୋଇ ବସ ସମ୍ପୂର୍ଣ୍ଣ ଅଚଳ ହୋଇଯିବ ବୋଲି ସଂଘ ପକ୍ଷରୁ କୁହାଯାଇଛି । ଏହି ପରିପ୍ରେକ୍ଷୀରେ ବସ ମାଲିକ ସଂଘ ଆନ୍ଦୋଳନକୁ ଓହ୍ଲାଇବା ପାଇଁ ଚରମ ନିଷ୍ପତ୍ତି ନେଇଛି । ତେବେ ଅଲ୍ ଓଡ଼ିଶା ବସ ମାଲିକ ସଂଘ ଆନ୍ଦୋଳନ ପ୍ରସଙ୍ଗରେ ଆଜି ପରିବହନ କମିଶନରଙ୍କ ସହ ଘରୋଇ ବସ ସଂଘର ଆଲୋଚନା ହୋଇଛି । ହେଲେ ପୂର୍ବ ନିଷ୍ପତ୍ତି ଅନୁଯାୟୀ ୨ ତାରିଖରେ ମାଲକାନଗିରି ଓ ୧୦ ତାରିଖରେ ବସ୍ ଚଳାଚଳ ବନ୍ଦ ଏବେ ବି ବଳବତ୍ତର ରହିଛି ବୋଲି କହିଛି ସଂଘ । ମାତ୍ର ଏହି ଆଲୋଚନା ବିଫଳ ହୋଇଥିବା ଜଣାଯାଇଛି । ଅନ୍ୟପଟେ ଲକ୍ଷ୍ମୀ ଯୋଜନାରେ ବହୁ ଲୋକଙ୍କ ଗମନାଗମନ ସୁଗମ ହେବ ବୋଲି କହିଛନ୍ତି ପରିବହନ କମିଶନର ଅମିତାଭ ଠାକୁର । ଅନ୍ୟପଟେ କୌଣସି ଡ୍ରାଇଭର ବା ବସ ମାଲିକଙ୍କ କୌଣସି ଅସୁବିଧା ହେବନି ବୋଲି ମଧ୍ୟ ସେ କହିଛନ୍ତି । ସେହିଭଳି ଆଗକୁ ଆଞ୍ଚଳିକ ପରିବହନ ଅଧିକାରୀଙ୍କ ସହ ଆଲୋଚନା କରିବା ପାଇଁ ସଂଘ ନିଷ୍ପତ୍ତି ନେଇଛି । ଏନେଇ ଜୟପୁର ଘରୋଇ ବସ୍ ମାଲିକ ସଂଘର ସଂପାଦକ ନରେନ୍ଦ୍ର କୁମାର ମହାନ୍ତି ସୂଚନା ଦେଇଛନ୍ତି ।