ଆକାଶ ଛୁଆଁ ବଜାର ଦର ପ୍ରତିବାଦରେ ଖାଉଟି କଲ୍ୟାଣ ମନ୍ତ୍ରୀଙ୍କ ସରକାରୀ ବାସଭବନ ସମ୍ମୁଖରେ ଛାତ୍ର କଂଗ୍ରେସର ବିକ୍ଷୋଭ

#ଭୁବନେଶ୍ୱର (ଏନ୍‌.ଏମ୍‌.): ପ୍ରଦେଶ ଛାତ୍ର କଂଗ୍ରେସ ସଭାପତ ସୟଦ ୟାସିର ନୱାଜଙ୍କ ନେତୃତ୍ୱରେ ଛାତ୍ର କଂଗ୍ରେସର କର୍ମକର୍ତ୍ତାମାନେ ଆକାଶ ଛୁଆଁ ବଜାରଦର ପ୍ରତିବାଦରେ ଖାଉଟିକଲ୍ୟାଣ ମନ୍ତ୍ରୀ ଅତନୁ ସବ୍ୟସାଚିଙ୍କ ଭୁବନେଶ୍ୱର ସ୍ଥିତ ସରକାରୀ ବାସଭବନ ସମ୍ମୁଖରେ ବିକ୍ଷୋଭ ଅନୁଷ୍ଠିତ ହୋଇଯାଇଛି । ଛାତ୍ର କଂଗ୍ରେସର ଉଦ୍ଦେଶ୍ୟ ଥିଲା ବଜାରଦର ଉପରେ ମନ୍ତ୍ରୀ ନୀରବ କାହିଁକି? ମୁଖ୍ୟମନ୍ତ୍ରୀ ନୀରବ କାହିଁକି? ଖାଉଟି ପରିବାହାଟରେ ଲୁହ ଗଡ଼ାଉଥିବା ବେଳେ ନବୀନ ସରକାର ନିଘୋଡ଼ ନିଦରେ । ଟମାଟୋ କିଲୋ ୧୫୦ ଏବଂ ଅନ୍ୟ ସମସ୍ତ ପରିବା ୧୦୦ଟଙ୍କା ଦର ହୋଇପଡ଼ିଥିବା ବେଳେ ଜଣେ ସାଧାରଣ ଖାଉଟି ପରିବା ହାଟକୁ ଯିବାକୁ ଭୟ କରୁଛି । ଆଜି ଓଡ଼ିଶାରେ ପରିବାଦର ବଢ଼ିବାପାଇଁ କେବଳ ନବୀନ ସରକାରହିଁ ଦାୟୀ ବୋଲି ଅଭିଯୋଗ ହୋଇଛି । ଦୀର୍ଘ ୨୩ ବର୍ଷ ଭିତରେ ଆବଶ୍ୟକୀୟ ଶୀତଳ ଭଣ୍ଡାର କରିବା ପାଇଁ ନବୀନ ସରକାର ବ୍ୟବସ୍ଥା କଲେ ନାହିଁ । ଏବେ ବିଧାନସଭାରେ ଉପସ୍ଥାପିତ ତଥ୍ୟ ଅନୁଯାୟୀ ଓଡ଼ିଶାରେ ୧୩୧ଟି ଶୀତଳ ଭଣ୍ଡାରରୁ ୮୨ଟି ଅଚଳ । ୧୩ଟି ଜିଲ୍ଲାରେ ଆଦୌ ଶୀତଳ ଭଣ୍ଡାର ନାହିଁ । ୨୦୧୮ ମସିହା ଜାନୁଆରୀ ମାସରେ ନବୀନ ସରକାର ଘୋଷଣା କଲେ ପିପିପି ମୋଡ଼ରେ ୧୫୦ଟି ଶୀତଳ ଭଣ୍ଡାର କରିବାପାଇଁ; ମାତ୍ର ଲୋକମାନଙ୍କୁ ଭୁଆଁ ବୁଲାଇବା ପାଇଁ ଏବେ ନବୀନ ସରକାର ୧ହଜାର ଶୀତଳ ଭଣ୍ଡାର କରିବା ପାଇଁ ଘୋଷଣା କରିବା ଦୁର୍ଭାଗ୍ୟ ଜନକ ବୋଲି ବିକ୍ଷୋଭକାରୀମାନେ ପ୍ରକାଶ କରିଥିଲେ । ତେବେ ୨୦୧୫ ମସିହାରେ ସରକାର ଆଳୁ ମିଶନ ଗଠନ କଲେ । ୨୬୦ କୋଟି ଟଙ୍କାର ବ୍ୟୟବରାଦ ହେଲା ହେଲେ ଏବେବି ଆଳୁ ନିଅଣ୍ଟ । ରାଜ୍ୟରେ ୧୨.୮୮ ଲକ୍ଷ ମେଟ୍ରିକ ଟନ ଆଳୁ ଦରକାର ପଡ଼ୁଥିବା ବେଳେ ଆମ ସରକାର ୩.୦୯ ଲକ୍ଷ ମେଟ୍ରିକ ଟନ ଆଳୁ ଅମଳ କରୁଛନ୍ତି । ପଡ଼ୋଶୀ ରାଜ୍ୟ ଉପରେ ନିର୍ଭର କରିବାକୁ ପଡ଼ୁଛି । ଇଣ୍ଡିଆନ କାଉନସିଲ ଅଫ ଏଗ୍ରୀକଲଚର ରିସର୍ଚ୍ଚ ସର୍ଭେ ରିପୋର୍ଟ ଅନୁଯାୟୀ ଶୀତଳ ଭଣ୍ଡାର ଅଭାବରୁ ଓଡ଼ିଶାରେ ବାର୍ଷିକ ୧.୪୫ ଲକ୍ଷ ଟନ୍ କଳ ଏବଂ ୪.୫ ଲକ୍ଷ ଟନ୍ ପରିବା ନଷ୍ଟ ହେଉଛି । ଅମଳ ସମୟରେ ଟମାଟୋ କିଲୋ ୫୦ ପଇସା ହେଉଥିବାରୁ ଚାଷୀ ହାଟରେ ଟମାଟୋ ଗଦେଇ କାନ୍ଦି କାନ୍ଦି ଘରକୁ ଫେରୁଛି । ସୁତରାଂ ଆଜିର ପନିପରିବାର ଆକାଶ ଛୁଆଁ ଦରବୃଦ୍ଧି ପାଇଁ ଛାତ୍ର କଂଗ୍ରେସ ନବୀନ ସରକାରକୁ ଦାୟୀ କରିଛି । ଅନ୍ୟପକ୍ଷରେ ତୈଳ ଦର ବୃଦ୍ଧି ମଧ୍ୟ ନିତ୍ୟ ବ୍ୟବହାର୍ଯ୍ୟ ଦ୍ରବ୍ୟ ଦର ବୃଦ୍ଧିର ଅନ୍ୟତମ କାରଣ । ପେଟ୍ରୋଲ ଓ ଡିଜେଲ ଦର ବୃଦ୍ଧି ପରିବହନ ଉପରେ ଏପରି ପ୍ରଭାବ ପକାଉଛି ଯେ, ଯାହାଫଳରେ ଅଟା, ଡାଲି, ତେଲ ଓ ଜିରା ପ୍ରଭୃତିର ମୂଲ୍ୟ ଆକାଶ ଛୁଆଁ ହୋଇପଡ଼ିଛି । ସାଧାରଣ ଚୁଡ଼ା, ମୂଢ଼ି, ଖଇ ଓ ଉଖୁଡ଼ା ମଧ୍ୟ ମୋଦୀ ଟ୍ୟାକ୍ସ ବା ଜି.ଏସ୍‌.ଟି ମୁକ୍ତ ନୁହେଁ । ୨୦୧୪ ନିର୍ବାଚନ ପୂର୍ବରୁ ନରେନ୍ଦ୍ର ମୋଦୀ ଏବଂ ବିଜେପି ଦଳ ଦରଦାମ ବୃଦ୍ଧିକୁ ନେଇ କୁମ୍ଭୀର କାନ୍ଦଣା କାନ୍ଦୁଥିଲେ । ଆଜି ମୋଦୀ ସରକାର ଅମଳରେ ଦର ବୃଦ୍ଧି ଐତିହାସିକ ହୋଇପଡ଼ୁଛି । ଆଜି ଯାହା ପରିସ୍ଥିତି ପାଇଁ କେନ୍ଦ୍ରରେ ମୋଦୀ ଓ ରାଜ୍ୟରେ ନବୀନ ସରକାର କ୍ଷମତାରେ ରହିବାର ଅଧିକାର ହରାଇଛି ବୋଲି ଶ୍ରୀ ନୱାଜ କହିଛନ୍ତି । ପରିଶେଷରେ ଛାତ୍ର କଂଗ୍ରେସ ପକ୍ଷରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଓ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ କୁଷପୁତଳିକା ଦାହ କରାଯାଇଥିଲା ଏବଂ ସେଠାରେ ଟାମାଟୋ ମାଡ଼ କରାଯାଇଥିଲା । ଛାତ୍ର କଂଗ୍ରେସର କର୍ମୀମାନେ ଲଙ୍କା, ଭେଣ୍ଡି, ଟମାଟୋ, ଜହ୍ନି ପ୍ରଭୂତି ହାର କରି ବେକରେ ପିନ୍ଧିଥିଲେ । କାର୍ଯ୍ୟକ୍ରମରେ ପ୍ରକାଶ ମିଶ୍ର, ସୁନିଲ ମାଟିଆ, ରଜନୀ ମହାନ୍ତି, ସୁବ୍ରତ ମହାପାତ୍ର, ରଣଜିତ୍ ପାତ୍ର, ପ୍ରଭାତ ପ୍ରତାପ ସିଂ, ନିରାହ ବେହେରା, ଅଖିଳେଷ ଯାଦବ, ନଳିନୀକାନ୍ତ ନାୟକ, ବିଶ୍ୱଭୂଷଣ ମହାପାତ୍ର, ମହମ୍ମଦ ଗୁଲ୍‌‘ାମ୍‌, ଉଦିତ୍ ପ୍ରଧାନ, ସ୍ପନ୍ଦନ କୁମାର ସ୍ୱାଇଁ, କୈଳାସ ସାହୁ, ବିରଞ୍ôଚ ବାରିକ, ରାଜଦିପ୍ ବେହେରା, ଆର୍ଯ୍ୟାନ ସାସମଲ, ବଳରାମ ନନ୍ଦ, ଅବିନାଶ ନନ୍ଦ, ମହମ୍ମଦ୍ ତାକୱିନ୍ ଓ ସୌମେନ୍ଦ୍ର ମହାନ୍ତି ପ୍ରମୂଖ ବହୁ ଛାତ୍ର କଂଗ୍ରେସ କର୍ମୀ ଉପସ୍ଥିତ ଥିଲେ ।