ଇପିଏଫ ପେନସନର୍ସ ସଙ୍ଘର ରାଜ୍ୟ କାର୍ଯ୍ୟକାରିଣୀ ବୈଠକ
ସର୍ବନିମ୍ନ ପେନସନ ୯ ହଜାର ଟଙ୍କାକୁ ବୃଦ୍ଧି ଏବଂ ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନାରେ ସାମିଲି ପାଇଁ ଦାବି

#କଟକ (ଏନ୍‌.ଏମ୍‌.): ସ୍ଥାନୀୟ ଖାନନଗର ଜଗନ୍ନାଥ ମନ୍ଦିର ପରିସରରେ ଇପିଏଫ ପେନସନର୍ସ ସଙ୍ଘର ରାଜ୍ୟ କାର୍ଯ୍ୟକାରିଣୀ ବୈଠକ ଅନୁଷ୍ଠିତ ହୋଇଥିଲା । ଇଂ. ବିଜୟ କୁମାର ଜେନାଙ୍କ ସଭାପତିତ୍ୱରେ ଏହି ସଭାକାର୍ଯ୍ୟରେ ବିଭିନ୍ନ ଜିଲ୍ଲାର ନେତୃତ୍ୱ ମାନେ ଯୋଗଦେଇଥିଲେ । କେନ୍ଦ୍ର ସରକାର ସର୍ବନିମ୍ନ ପେନସନ ୯ହଜାର ଟଙ୍କାକୁ ବୃଦ୍ଧି ସହ ମହଙ୍ଗାଭତ୍ତା ପ୍ରଦାନ ଦାବିକୁ ଅଣଦେଖା କରୁଥିବାରୁ ବୈଠକରେ ଘୋର ଅସନ୍ତୋଷ ଓ ଉଦବେଗ ପ୍ରକାଶ ପାଇଥିଲା । ସେହିପରି ଓଡିଶା ସରକାର ଇପିଏଫ ପେନସନ ଭୋଗୀ ବରିଷ୍ଠ ନାଗରିକମାନଙ୍କୁ ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନାରେ ସାମିଲି କରି ନିଶୁକ୍ଳ ଚିକିତ୍ସା ସୁବିଧା ଯୋଗାଇଦେବା ପାଇଁ ଓଡିଶାର ମୁଖ୍ୟମନ୍ତ୍ରୀଙ୍କ ନିକଟରେ ଦୀର୍ଘ ଦିନରୁ ଆସୋସିଏସନ ଦାବି କରିଆସୁଛି; କିନ୍ତୁ ଘୋର ପରିତାପର କଥା ରାଜ୍ୟ ସରକାର ଏହି ଦାବି ପ୍ରତି ଧ୍ୟାନଦେଉନଥିବାରୁ ଓଡିଶାରେ ଥିବା ୨ ଲକ୍ଷ ଇପିଏଫ ପେନସନ ଭୋଗୀ ଏହି ସୁବିଧାରୁ ବଞ୍ଚିତ ହେଉଛନ୍ତି । ସର୍ବଭାରତୀୟ ଉପସଭାପତି ତଥା ସାଧାରଣ ସମ୍ପାଦକ ଭାଗ୍ୟଧର ବ୍ରହ୍ମା ଗତ ଜୁନ ମାସ ୧୮ତାରିଖରେ ଭୋପାଳ ଠାରେ ଅନୁଷ୍ଠିତ କେନ୍ଦ୍ରକାର୍ଯ୍ୟକାରିଣୀ ବୈଠକର ନିଷ୍ପତ୍ତିକ୍ରମେ ଦେଶ ମଧ୍ୟରେ ଥିବା ସମଭାବପୂର୍ଣ୍ଣ ସଂଗଠନ ମାନଙ୍କୁ ଏକମଞ୍ଚରେ ଏକତ୍ରିତ କରି ଦେଶଭରି ଆନ୍ଦୋଳନକୁ ତୀବ୍ରତର କରିବାପାଇଁ ଆହ୍ୱାନ ଦେଇଥିଲେ । ପ୍ରଥମ ଦଫାରେ ରାଜ୍ୟ ମଧ୍ୟରେ ଥିବା ଆର.ଡି. ସି.ମାନଙ୍କ ଜରିଆରେ ଆସନ୍ତା ୨୦ତାରିଖ ଦିନ ପ୍ରଧାନମନ୍ତ୍ରୀଙ୍କ ଉଦେଶ୍ୟରେ ସ୍ମାରକପତ୍ର ପ୍ରଦାନ ନିମନ୍ତେ ନିଷ୍ପତ୍ତି ନିଆଗଲା । ସଭାପ୍ରାରମ୍ଭରେ ଦିବଂଗତ ସଭ୍ୟମାନଙ୍କ ଉଦେଶ୍ୟରେ ୨ମିନିଟ ନିରବ ପ୍ରାର୍ଥନା କରାଯାଇଥିଲା । ଏହି ସଭାରେ କଟକ, ଖୋର୍ଦ୍ଧା, ନୟାଗଡ, ପୁରୀ, ଯାଜପୁର, କେନ୍ଦୁଝର, ଜଗତସିଂହପୁର, ବ୍ରହ୍ମପୁର ଇଦ୍ୟାଦି ଜିଲ୍ଲାର ନେତୃତ୍ୱମାନେ ଯୋଗଦେଇ ଆଲୋଚନାରେ ଭାଗ ନେଇଥିଲେ । ଶେଷରେ କାର୍ଯ୍ୟକାରି ସଭାପତି ପ୍ରଫୁଲ୍ଲ କୁମାର ଦାସ ଧନ୍ୟବାଦ ଅର୍ପଣ କରିଥିଲେ ।