ସମ୍ଭାବ୍ୟ ବାତ୍ୟା ‘ଆସାନି’ ନେଇ କଂଗ୍ରେସ କର୍ପୋରେଟର ଦଳ ପକ୍ଷରୁ ସିଏମସି କମିଶନରଙ୍କୁ ଦାବିପତ୍ର
କଟକ(ଏନ୍.ଏମ୍.): ଆଜି କଟକ ମହାନଗର ନିଗମ କଂଗ୍ରେସ କର୍ପୋରେଟର ଦଳ ପକ୍ଷରୁ ବିରୋଧୀ ଦଳ ନେତା ସନ୍ତୋଷ କୁମାର ଭୋଳଙ୍କ ନେତୃତ୍ୱରେ ଏକ ପ୍ରତିନିଧି ମଣ୍ଡଳ ସିଏମସି ଆୟୁକ୍ତଙ୍କୁ ଭେଟି ସମ୍ଭାବ୍ୟ ବାତ୍ୟା ‘ଆସାନି’ ବାତ୍ୟା ମୁକାବିଲା ପାଇଁ ପ୍ରତିକାର ଓ ପ୍ରସ୍ତୁତି ସମ୍ପର୍କରେ ଆଲୋଚନା କରି ଏକ ଦାବିପତ୍ର ପ୍ରଦାନ କରାଯାଇଛି । କଟକ ସହରର ମୁଖ୍ୟନାଳ ବକ୍ସି ବଜାର ଠାରୁ ମାତୃଭବନ ପର୍ଯ୍ୟନ୍ତ ପଙ୍କୋଦ୍ଧାର କାର୍ଯ୍ୟ ହେଉ ନଥିବା କାରଣରେ ବର୍ଷା ଓ ନାଳ ପାଣି ନିଷ୍କାସନରେ ସମସ୍ୟା ସୃଷ୍ଟି ହେବ ବୋଲି ସତର୍କ କରାଇବା ସହିତ ଜାଇକାର ବେପୁରିଆ ଖୋଳତାଡ କାର୍ଯ୍ୟ ଯୋଗୁଁ ବର୍ଜ୍ଜଜଳ ନିଷ୍କାସନ ଓ ଯାତାୟତରେ ଘୋର ବାଧା ସୃଷ୍ଟି କରୁଛି । ଆସାନି ବାତ୍ୟାର ସଙ୍ଗିନ ପରିସ୍ଥିତିକୁ ଦୃଷ୍ଟିରେ ରଖି ସିଏମସି କର୍ତ୍ତୃପକ୍ଷ ଦାୟିତ୍ୱରେ ଥିବା କର୍ମଚାରୀଙ୍କ ଛୁଟି ବାତିଲ କରିବା ସହିତ ସମ୍ବେଦନଶୀଳ ଅଞ୍ଚଳରୁ ଜଳ ନିଷ୍କାସନ ପାଇଁ ମୋଟର ପମ୍ପ ମହଜୁଦ ରଖିବା, ବୁଶ କଟର ଓ ଗଛ କଟାଳିଙ୍କୁ ପ୍ରସ୍ତୁତ ରଖିବା ସହିତ ଲୋକଙ୍କୁ ନିରାପଦ ସ୍ଥାନରେ ରଖିବା, ଶିଶୁ ଖାଦ୍ୟ, ପଶୁ ଖାଦ୍ୟ ଓ ପାନୀୟଜଳ ଆଦିର ସୁପରିଚାଳନ ପାଇଁ ଯତ୍ନବାନ ହେବାକୁ ଦାବି କରାଯାଇଅଛି । ତଳିଆ ଓ ଜଳ ବନ୍ଦୀ ଅଞ୍ଚଳର ପରିବାର ଗୁଡିକୁ ପର୍ଯ୍ୟାପ୍ତ ରିଲିଫ ଯୋଗାଇ ଦେବାର ବ୍ୟବସ୍ଥା କରିବାକୁ ମଧ୍ୟ କମିଶନରଙ୍କ ଦୃଷ୍ଟି ଆକର୍ଷଣ କରିଥିଲେ । ଅନ୍ୟମାନଙ୍କ ମଧ୍ୟରେ ଭାନୁ ସେନାପତି, ଲିଜାରାଣୀ ରାଉତ, ଜେ. କାମେଷ ରାଓ, ସୁବାଶିଷ ପଟ୍ଟନାୟକ, ସ୍ୱର୍ଣ୍ଣପ୍ରଭା ପଶାୟତ, ବଟକୃଷ୍ଣ ସାହୁ, ଜନାର୍ଦ୍ଦନ ପରିଡା ପ୍ରମୁଖ କର୍ପୋରେଟରମାନେ ପ୍ରତିନିଧି ମଣ୍ଡଳୀରେ ଅଂଶ ଗ୍ରହଣ କରିଥିଲେ ।