ମହାନଦୀକୁ ଡେଇଁ ଯୁବକ ନିଖୋଜ
ଆଠଗଡ଼(ଏନ୍.ଏମ୍.): ଆଜି ପୂର୍ବାହ୍ନ ପ୍ରାୟ ୮ଘଟିକା ସମୟରେ ମୁଣ୍ଡଳୀ ବ୍ରିଜରୁ ଜଣେ ଯୁବକ ମହାନଦୀକୁ ଡେଇଁ ନିଖୋଜ ହୋଇଯାଇଛନ୍ତି । ତେବେ ଖବର ପାଇ ଅଗ୍ନିଶମ ବିଭାଗର କର୍ମଚାରୀ ଘଟଣା ସ୍ଥଳରେ ପହଞ୍ଚି ଖୋଜିବା ସହ ଆଠଗଡ଼ ପୁଲିସ ମଧ୍ୟ ପହଞ୍ଚି ଅନୁସନ୍ଧାନ ଆରମ୍ଭ କରିଛି । ନିଖୋଜ ଯୁବକଙ୍କ ଘର ଖୋର୍ଦ୍ଧା ଜିଲ୍ଲା ତୁରଂତୁରା ବୋଲି ଜଣାପଡ଼ିଛି । ସେ ଶୈଳଶ୍ରୀ ବିହାରରେ ରହି ବ୍ୟବସାୟ କରୁଥିଲେ । ଯୁବକଙ୍କ ନାମ ବିଶ୍ୱଦେବ ଦାସ ବୟସ ୪୧ବର୍ଷ ବୋଲି ଜଣାପଡ଼ିଛି । ଦାମ୍ପତ୍ୟ କଳିରୁ ସମ୍ପୃକ୍ତ ଯୁବକ ଜଣକ ଏଭଳି କାଣ୍ଡ କରିଥିବା ସମ୍ପର୍କୀୟଙ୍କ ସୁତ୍ରରୁ ଜଣାପଡିଛି । ଘଟଣା ସ୍ଥଳରେ ନିଖୋଜ ଯୁବକଙ୍କ ଓଡ଼ି ୩୩ଜ ୯୨୭୦ ନମ୍ବର ବିଶିଷ୍ଟ ସ୍କୁଟି, ମୋବାଇଲ ଫୋନ ଓ ମନିପର୍ସ ଛାଡି ନଦୀକୁ ଡେଇଁ ପଡିଛନ୍ତି । ଏହି ସମୟରେ ନଦୀରେ ମାଛ ଧରୁଥିବା ଧୀବର ମାନେ ଦେଖି ପୁଲିସକୁ ଖବର ଦେଇଥିଲେ । ମହାନଦୀରେ ପାଣି ସ୍ରୋତ ଅଧିକ ଥିବାରୁ ଅଗ୍ନିଶମ ବାହିନୀକୁ ସମସ୍ୟା ହେଉଥିବା କର୍ମଚାରୀମାନେ କହିଛନ୍ତି ।