ବିଜେପିରେ ମିଶିଲେ ଟାଣୁଆ ସରପଞ୍ଚ ପବିତ୍ର ଉପାଧ୍ୟାୟ: ଶଙ୍ଖ ଶିବିରରେ ଆତଙ୍କ
#ଚୌଦ୍ୱାର (ଏନ୍.ଏମ୍.): ଚୌଦ୍ୱାର-କଟକ ନିର୍ବାଚନ ମଣ୍ଡଳୀ ତଥା ଟାଙ୍ଗୀ-ଚୌଦ୍ୱାର ବ୍ଲକର ଜଣେ ଟାଣୁଆ ରାଜନୈତିକ ବ୍ୟକ୍ତିବିଶେଷ ଭାବେ ବେଶ ପରିଚିତ ପବିତ୍ର ଉପାଧ୍ୟାୟ ଆଜି ରାଜ୍ୟ ବିଜେପିରେ ସାମିଲ ହୋଇଛନ୍ତି । ଆଜି ରାଜ୍ୟ ବିଜେପି କାର୍ଯ୍ୟାଳୟରେ କଟକ ଜିଲ୍ଲା ବିଜେପି ସଭାପତି ପ୍ରକାଶ ବେହେରାଙ୍କ ନେତୃତ୍ୱରେ ଶ୍ରୀ ଉପାଧ୍ୟାୟ ରାଜ୍ୟବିଜେପି ସଭାପତିଙ୍କ ନିକଟରେ ଦଳରେ ସାମିଲ ହୋଇଥିଲେ । ସେ ବହୁବାର ଧରି ନଖରା ପଞ୍ଚାୟତ ସରପଞ୍ଚ ଭାବେ ନିର୍ବାଚିତ ହୋଇଥିବାବେଳେ ସମ୍ପ୍ରତି ଶାଳଗାଁ ପଞ୍ଚାୟତରେ ସରପଞ୍ଚ ଅଛନ୍ତି । ତାଙ୍କ ପତ୍ନୀ ମଧ୍ୟ ନଖରା ସରପଞ୍ଚ ଅଛନ୍ତି । ଟାଙ୍ଗୀ-ଚୌଦ୍ୱାର ଅଞ୍ଚଳରେ ନଖରା ଓ ଶାଳଗାଁ ବିଜେଡିର ଗଡ଼ ଥିବାବେଳେ ଶ୍ରୀ ଉପାଧ୍ୟାୟ ଉଭୟ ପଞ୍ଚାୟତରେ ଗଡ଼ ଭାଙ୍ଗି ନିଜର ସାମ୍ରାଜ୍ୟ ପ୍ରତିଷ୍ଠା କରିବାରେ ସଫଳ ହୋଇଛନ୍ତି । ଅନ୍ୟପକ୍ଷରେ ବିଜେଡିକୁ ନାକେଦମ କରି ରଖିଥିବା ଶ୍ରୀ ଉପାଧ୍ୟାୟ ବିଜେପିରେ ସାମିଲ ହେବା ପରେ ଚୌଦ୍ୱାର-କଟକ ନିର୍ବାଚନ ମଣ୍ଡଳୀରେ ବିଜେପି ଭଲ ପ୍ରଦର୍ଶନ କରିବ ବୋଲି ବିଭିନ୍ନ ମହଲରେ ଆଲୋଚନା ହେଉଛି । ଏପରିକି ଆଗାମୀ ସାଧାରଣ ନିର୍ବାଚନରେ ବିଜେପି ପକ୍ଷରୁ ସେ ଟିକେଟ ପାଇ ପାରନ୍ତି ବୋଲି ରାଜନୈତିକ ମହଲରେ ଚର୍ଚ୍ଚା ହେଉଛି ।