ବାସୁଦେବପୁର ଦେଉଳି ଗ୍ରାମରୁ ନକଲି ଦେଶୀ ମଦ କାରଖାନା ଉପରେ ଚଢ଼ାଉ, ୨ଗିରଫ
ଭଦ୍ରକ(ଏନ୍.ଏମ୍.): ନିଶାନିବାରଣ ପାଇଁ ସରକାରୀ ତଥା ବେସରକାରୀ ସଂସ୍ଥା ପକ୍ଷରୁ ଜୋରଦାର ଉଦ୍ୟମ କରାଯାଉଛି । ନିଶାମୁକ୍ତ ଓଡ଼ିଶା ପାଇଁ ଅନେକ ଅନୁଷ୍ଠାନ ଯୁଦ୍ଧଂଦେହୀ ଡାକରା ମଧ୍ୟ ଦେଉଛନ୍ତି । ହେଲେ ମଦ ମାଫିଆମାନଙ୍କୁ ରୋକିବା ସତେ ଯେମିତି ଏକପ୍ରକାର ଚାଲେଞ୍ଜ ସାବ୍ୟସ୍ତ ହୋଇଛି । ଗୋଟିଏ ପଟେ ଅବକାରୀ ବିଭାଗ ପକ୍ଷରୁ ରାଜ୍ୟର ବିଭିନ୍ନ ସ୍ଥାନରେ ଚଢ଼ାଉ କରି ଶହ ଶହ ଲିଟର ନକଲ ମଦ ଜବତ କରୁଥିଲେ ମଧ୍ୟ ସମ୍ପୂର୍ଣ୍ଣ ରୋକିବାରେ ବିଭାଗୀୟ ଅଧିକାରୀମାନେ ବିଫଳ ହୋଇଛନ୍ତି । ତେବେ ଭଦ୍ରକ ଅଞ୍ଚଳରେ ଚୋରାରେ ନକଲି ଦେଶୀ ଓ ବିଦେଶୀ ମଦ ପ୍ରସ୍ତୁତ ହେବା ଘଟଣା ଅଞ୍ଚଳବାସୀଙ୍କୁ ସ୍ତବ୍ଧ କରିଦେଇଛି । ଏପରିକି ନାମୀ ଦାମୀ ବିଦେଶୀ ମଦ କମ୍ପାନୀର ଅବିକଳ ନକଲ କରି ମଦ ତିଆରି କରାଯାଉଛି । ତେବେ ଏହି ମଦର ମାନ, କିମ୍ବା ଗୁଣବତ୍ତା ଯାଞ୍ଚ କରାଯାଉ ନଥିବା ଯୋଗୁଁ ଏହା ଜନସାଧାରଣଙ୍କ ପାଇଁ ପ୍ରାଣଘାତୀ ହୋଇଥିଲେ ମଧ୍ୟ ଲୋକେ ଅସଲି ନକଲି ନଦେଖି ପିଇ ଯାଉଛନ୍ତି । ତେଣୁ ଏହା ଦ୍ୱାରା ମଦମୃତ୍ୟୁ ଆଶଙ୍କାକୁ ଏଡ଼ାଇ ଦିଆଯାଇ ନପାରେ ବୋଲି ବିଭାଗ ପକ୍ଷରୁ କୁହାଯାଉଛି । ଏଥି ସହିତ ଏଭଳି ନକଲି ମଦ ତିଆରି ହେବା ସଂକ୍ରାନ୍ତରେ ଯେକୌଣସି ବ୍ୟକ୍ତି ଅବକାରୀ ବିଭାଗକୁ ସୂଚନା ଦେଲେ ଏହାକୁ ରୋକିବା କ୍ଷେତ୍ରରେ ସହଜ ହେବ ବୋଲି ଅବକାରୀ ବିଭାଗ ପକ୍ଷରୁ ସୂଚନା ଦିଆଯାଇଛି । ତେବେ ଭଦ୍ରକ ଜିଲ୍ଲା ବାସୁଦେବପୁର ବ୍ଲକ ଅଞ୍ଚଳରେ ଅବକାରୀ ବିଭାଗ ଏସପି ଓ ଜିଲ୍ଲାପାଳଙ୍କ ନିର୍ଦ୍ଦେଶ କ୍ରମେ ବାସୁଦେବପୁର ଅବକାରୀ ବିଭାଗ ପକ୍ଷରୁ ଏକ ନକଲି ମଦ ତିଆରି କାରଖାନା ଉପରେ ଚଢ଼ାଉ କରାଯାଇ ବିପୁଳ ପରିମାଣର ନକଲ ମଦ ସହ ନାମୀ ଦାମୀ କମ୍ପାନୀର ଅବିକଳ ବୋତଲ, ଲେବୁଲ, ଠିପି ଆଦି ଜବତ କରାଯାଇଛି । ସୂଚନା ଅନୁଯାୟୀ ଗ୍ରାମର ଗୋପବନ୍ଧୁ ନାୟକ ସମେତ ତାର ବାପା ନରସିଙ୍ଗ ନାୟକଙ୍କୁ ଗିରଫ କରିଛି ଅବକାରୀ ବିଭାଗ । ଏହି ନକଲି ମଦ କାରଖାନାରୁ ୨୩୦ଟି ଖାଲି ବୋତଲ । ବୋତଲ ଠିପି, ୩୦ଟି ନକଲି ବିଦେଶୀ ମଦ, ୫୦ଟି ନମ୍ବର ୱାନ ଖାଲି ବୋତଲ, ବ୍ୟବହୃତ ସିରିଞ୍ଜ ଆଦି ଜବତ କରାଯାଇଥିଲା । ଏଥିସହିତ ସେମାନେ ଚୋରାରେ ଜିଞ୍ଜର ପ୍ରସ୍ତୁତ କରୁଥିବା ମଧ୍ୟ ଜଣାପଡ଼ିଥିବା ବାସୁଦେବପୁର ଅବକାରୀ ବିଭାଗ ଅଧବକାରୀ ବ୍ରଜମୋହନ ମଲ୍ଲିକ ପ୍ରକାଶ କରିଛନ୍ତି ।