ପ୍ରାୟ ଦେଢ଼ ଘଣ୍ଟା ଧରି ଦେଖିବାକୁ ମିଳିଲା ମହାଜାଗତିକ ଦୃଶ୍ୟ ସୂର୍ଯ୍ୟପରାଗ
ଭୁବନେଶ୍ୱର/କଟକ (ଏନ୍.ଏମ୍.): ଚଳିତ ବର୍ଷର ଶେଷ ସୂର୍ଯ୍ୟୋପରାଗ ଦେଖିବା ପାଇଁ ପିଲାଙ୍କ ଠାରୁ ବୟସ୍କଙ୍କ ପର୍ଯ୍ୟନ୍ତ ବ୍ୟାକୁଳ ହୋଇ ପଡ଼ିଛନ୍ତି । ବିଶେଷ କରି କଟକ ଭୁବନେଶ୍ୱର ଭଳି ଦ୍ୱୈତ ନଗରୀରେ ବହୁ ଲୋକ ଛାତ ଉପରେ ଏହି ମହାଜାଗତିକ ଦୃଶ୍ୟକୁ ଉପଭୋଗ କରିଥିଲେ । ଏହି ଆଂଶିକ ସୂର୍ଯ୍ୟୋପରାଗ ଭାରତରେ ୪ଟା ୨୯ ମିନିଟରୁ ଦେଖାଯାଇଛି । ତେବେ ଓଡ଼ିଶାରେ କେତୁଗ୍ରସ୍ତ ଖଣ୍ଡଗ୍ରାସ (ଆଂଶିକ) ସୂର୍ଯ୍ୟୋପରାଗ ଅପରାହ୍ନ ୪.୫୬ ମିନିଟ ୫୨ ସେକେଣ୍ଡରେ ସ୍ପର୍ଶ କରଥିଲା । ଏହା ସନ୍ଧ୍ୟା ୬ଟା ୨୬ ମିନିଟ ୫୨ ସେକେଣ୍ଡ ପର୍ଯ୍ୟନ୍ତ ରହିବା ପରେ ମୋକ୍ଷପ୍ରାପ୍ତି ହୋଇଥିଲା । ତେବେ ମୋକ୍ଷ ପ୍ରାପ୍ତି ବେଳକୁ ସୂର୍ଯ୍ୟ ଅସ୍ତ ହୋଇ ଯାଇଥିବାରୁ ସର୍ବମୋକ୍ଷ ଦେଖିବାକୁ ମିଳିନଥିଲା । ତେଣୁ ପରାଗ ମୋକ୍ଷ ପରେ ମଧ୍ୟ ଆସନ୍ତା କାଲି ସୂର୍ଯ୍ୟୋଦୟ ପର୍ଯ୍ୟନ୍ତ ଦେବକାର୍ଯ୍ୟକୁ ବାରଣ କରାଯାଇଛି ।
ଜ୍ୟୋତିଷ ଶାସ୍ତ୍ର ଅନୁଯାୟୀ ଚନ୍ଦ୍ର ଗ୍ରହଣ ବା ସୂର୍ଯ୍ୟ ପରାଗକୁ ଅଶୁଭ ବୋଲି ବିବେଚନା କରାଯାଏ । ତେଣୁ ପରାଗ ବା ଗ୍ରହଣ ସମୟରେ ଶୁଭ କାର୍ଯ୍ୟ ଓ ପୂଜାପାଠ ବାରଣ କରାଯାଇଥାଏ । ତେବେ ପରାଗ ଓ ଗ୍ରହଣର ଯଥେଷ୍ଟ ପୂର୍ବରୁ ମଧ୍ୟ ପାକ ନିଷେଧ (ହାଣ୍ଡିଛାଡ଼)ବୋଲି ପାଳନ କରାଯାଏ । ସେହି ସମୟରୁ ମୋକ୍ଷପ୍ରାପ୍ତି ପର୍ଯ୍ୟନ୍ତ ଲୋକଙ୍କୁ ଖାଦ୍ୟଗ୍ରହଣ କରିବା ପାଇଁ ବାରଣ କରାଯାଇଛି । ତେବେ ଗ୍ରହଣ ବା ପରାଗ ସର୍ବମୋକ୍ଷ ପରେ ସ୍ନାନାଦି ପବିତ୍ରୀକରଣ ପରେ ପାକ ପ୍ରସ୍ତୁତ ଓ ଖାଦ୍ୟ ଗ୍ରହଣ ବିଧେୟ । ସେହିଭଳି ଚଳିତ ବର୍ଷ କାର୍ତ୍ତିକ ପୂର୍ଣ୍ଣିମାରେ ମଧ୍ୟ ଚନ୍ଦ୍ରଗ୍ରହଣ ଲାଗିବ ବୋଲି ଜୋତିଷ ଶାସ୍ତ୍ରରୁ ଜଣାପଡ଼ିଛି ।