ପୁଲିସ୍ ଜାଲରେ ନକଲି ଘଣ୍ଟା ବ୍ୟବସାୟୀ
କଟକ(ଏନ୍.ଏମ୍.): ଅସଲି କହି ନକଲି ଘଣ୍ଟା ବିକ୍ର କରୁଥିବା ଜଣେ ଅସାଧୁ ବ୍ୟବସାୟଙ୍କୁ କଟକ ବାଦାମବାଡି ଥାନା ପୋଲିସ ଗିରଫ କରିଛି । ଗିରଫ ବ୍ୟକ୍ତିଜଣକ କାଳିପ୍ରସାଦ ମହାନ୍ତି ବୋଲି ଜଣାପଡ଼ିଛି । ବାଦାମବାଡି ବସଷ୍ଟାଣ୍ଡରେ ଏକ ଦୋକାନରେ ଏହି ବ୍ୟବସାୟୀ ଜଣକ ବିଭିନ୍ନ ବ୍ରାଣ୍ଡର ଘଣ୍ଟା ବିକୁଥିଲେ । ଗତକାଲି ଜଣେ ଗ୍ରାହକ ଫାଷ୍ଟଟ୍ରାକ୍ ଘଣ୍ଟା କିଣିବାକୁ ଯାଇଥିବା ବେଳେ ଦୋକାନୀ ତାଙ୍କୁ ଅସଲି ଘଣ୍ଟା କହି ଅଧିକ ଟଙ୍କା ଦେବାକୁ କହିଥିଲେ । ଗ୍ରାହକ ଜଣକ ସନ୍ଦେହ ବଢିବାରୁ ବାଦାମବାଡି ଥାନାରେ ଅଭିଯୋଗ କରିଥିଲେ । ଅଭିଯୋଗ ପାଇବା ପରେ ସମ୍ପୃକ୍ତ ଦୋକାନରେ ପୁଲିସ ଅତର୍କିତ ରେଡ୍ କରିଥିଲା । ଚଢାଉ ବେଳେ ବିଭିନ୍ନ ବ୍ରାଣ୍ଡର ୮୮୪ ଟି ନକଲି ଘଣ୍ଟା ଜାଣିପାରି ପୁଲିସ ସେଗୁଡ଼ିକୁ ଜବତ କରିଥିଲା । ପୁଲିସ୍ ସୂଚନା ମୁତାବକ ବସଷ୍ଟାଣ୍ଡ ସମ୍ମୁଖରେ ଥିବା ଆର.କେ. ୱାଚ କୋ ନାମକ ଏକ ଘଣ୍ଟା ଦୋକାନରେ ବିଭିନ୍ନ ନାମିଦାମୀ କମ୍ପାନୀର ଘଣ୍ଟା ବିକ୍ରି ହେଉଥିଲା । କଲିକତାରୁ ଶସ୍ତା ଦରରେ କିଣାଯାଉଥିବା ନକଲି ଘଣ୍ଟାକୁ ଅସଲି ଦର୍ଶାଇ ଚଢା ଦରରେ ବିକ୍ରି କରି ଲୋକଙ୍କୁ ଠକୁଥିଲେ । ଆଉ ଏହି ଘଣ୍ଟା ଗ୍ରାମାଞ୍ଚଳରେ ଅଧିକ ବିକ୍ରି ହେଉଥିବାର ମଧ୍ୟ ଜଣାପଡିଛି । ତେବେ ଏହି ଘଟଣାରେ କାଳୀପ୍ରସାଦକୁ ଗିରଫ କରି କୋର୍ଟ ଚାଲାଣ କରାଯାଇଥିବା ଜୋନ୍-୨ ଏ.ସି.ପି ଶୁଭ ନାରାୟଣ ମୁଦୁଲି ସୂଚନା ଦେଇଛନ୍ତି ।