ପିକଅପ ଗାଡି ଧକ୍କାରେ ବାପଝିଅ ମୃତ
କଟକ(ଏନ୍.ଏମ୍.): ଜଗତପୁର ଥାନା ଅନ୍ତର୍ଗତ ପାଗା ଫାଣ୍ଡି କାଜି ବଜାର ଛକଠାରେ ଆଜି ଭୋର ପ୍ରାୟ ୪ଟା ସମୟରେ ଏକ ପରିବା ବୋଝେଇ ପିକଅପ ଗାଡି ଏକ ବାଇକକୁ ଧକ୍କା ଦେବାରୁ ଘଟଣାସ୍ଥଳରେ ବାପଝିଅ ମୃତ୍ୟୁ ବରଣ କରିଛନ୍ତି । ମୃତକ ଦୁଇଜଣ ହେଲେ ସତ୍ୟଭାମାପୁର ଗ୍ରାମର ଅନୁପ ସାମଲ (୬୨) ଓ ତାଙ୍କ ଝିଅ ଅଞ୍ଜଳି ସ୍ୱାଇଁ(୩୯) ବୋଲି ପୁଲିସ ସୁତ୍ରରୁ ଜଣାପଡିଛି । ଘଟଣାରୁ ପ୍ରକାଶ ଯେ, ବାପ ଝିଅ ନିଜ ଘର ସତ୍ୟଭାମାପୁର ବାଇକ ଯୋଗେ କଟକ ରେଳ ଷ୍ଟେସନକୁ ଯାଉଥିଲେ । ସ୍ଥାନୀୟ କାଜି ବଜାର ଛକ ନିକଟରେ ଓଡି୦୨ସିସି-୧୨୪୧ ନମ୍ବର ଯୁକ୍ତ ପିକଅପ କଟକରୁ ସାଲେପୁର ଅଭିମୁଖେ ଆସୁଥିବାବେଳେ ଭାରସ୍ୟାମ ହରାଇ ସାମ୍ନାପଟୁ ବାଇକଟିକୁ ଧକ୍କା ଦେବା ଫଳରେ ଘଟଣାସ୍ଥଳରେ ବାପଝିଅଙ୍କର ମୃତ୍ୟୁ ଘଟିଥିଲା । ଭାରସ୍ୟାମ ହରାଇ ପରିବା ବୋଝେଇ ପିକଅପ ଭ୍ୟାନଟି ଘଟଣାସ୍ଥଳରେ ଓଲଟି ପଡିଥିଲା । ଖବର ପାଇ ଜଗତପୁର ଥାନା ପୁଲିସ ଓ ପାଗା ଫାଣ୍ଡି ପୁଲିସ ଅଧିକାରୀ ଘଟଣାସ୍ଥଳରେ ପହଁଞ୍ଚି ଦୁଇ ମୃତ ଦେହକୁ ଜବତ କରି ଶବ ବ୍ୟବଚ୍ଛେଦ ନିମନ୍ତେ କଟକ ବଡ ଡାକ୍ତଖାନାକୁ ପଠାଇବା ସହ ଦୁର୍ଘଟଣାଗ୍ରସ୍ତ ବାଇକ ଓ ପିକଅପ ଭ୍ୟାନକୁ ଜବତ କରିଛି । ଘଟଣାସ୍ଥଳରୁ ପିକଅପ ଗାଡିର ଡ୍ରାଇଭର ଫେରାର ହୋଇଯାଇଥିବା ପୁଲିସ ପକ୍ଷରୁ ସୂଚନା ଦିଆଯାଇଛି ।