ପରଲୋକରେ ବରିଷ୍ଠ ସମାଜସେବୀ ଫିରଦୋଷ ଅଲ୍ଲୀ: କଟକ ସଦର ଅଞ୍ଚଳରେ ଶୋକର ଛାୟା
#କଟକ ସଦର(ଏନ୍.ଏମ୍.): କଟକ ସଦର ବ୍ଲକ ଅଞ୍ଚଳର ବିଶିଷ୍ଟ ଜନନେତା ତଥା ସମାଜସେବୀ କଟକ ସଦର ବ୍ଲକ ଅନ୍ତର୍ଗତ ପ୍ରହରାଜପୁର, ପୋଖରୀ ହୁଡ଼ା ଗ୍ରାମର ଶେଖ ଫିରଦୋଷ ଅଲ୍ଲୀଙ୍କ ୬୮ ବର୍ଷ ବୟସରେ ଆଜି ପରଲୋକ ହୋଇଯାଇଛି । ସେ ଦୀର୍ଘ ଦିନ ଧରି ବାର୍ଦ୍ଧକ୍ୟ ଜନିତ ଅସୁସ୍ଥତା ଯୋଗୁଁ ଚିକିତ୍ସାଧୀନ ଅବସ୍ଥାରେ ଥିଲେ । ତାଙ୍କର ପରଲୋକଗତ ଖବର ଜାଣିବା ପରେ ସମଗ୍ର ଅଞ୍ଚଳରେ ଶୋକର ଛାୟା ଖେଳିଯାଇଛି । ସୂଚନା ଯୋଗ୍ୟ ଯେ, ସେ ଫିଦ ଭାଇ ଭାବେ ଅଞ୍ଚଳରେ ବେଶ ପରିଚିତ ଥିଲେ । ତାଙ୍କର ଜାଆଁଳା ଭାଇ ପୂର୍ବତନ ସରପଞ୍ଚ ଜାହାଙ୍ଗୀର ଅଲ୍ଲୀ ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କ ଏକାନ୍ତ ସହଯୋଗୀ ଥିଲେ । ଫିରଦୋଷ ଜନତା ଦଳରୁ ତାଙ୍କର ରାଜନୈତିକ ଜୀବନ ଆରମ୍ଭ କରିଥିବାବେଳେ ସମୟ କ୍ରମେ ବିଜେପି ଓ ପରେ ସମାଜବାଦୀ ପାର୍ଟିରେ ସାମିଲ ହୋଇ ତତ୍କାଳୀନ କିଶନନଗର ନିର୍ବାଚନ ମଣ୍ଡଳୀରୁ ବିଧାୟକ ପ୍ରାର୍ଥୀ ହୋଇଥିଲେ । ସବୁବେଳେ ଲୋକମାନଙ୍କ ସମସ୍ୟା ପାଇଁ ଲଢେଇ କରିବା ତାଙ୍କର ସବୁଠାରୁ ଭଲ ଗୁଣ ଥିଲା । ଆସନ୍ତା କାଲି ରବିବାର ଫିରଦୋଷଙ୍କ ମରଶରୀରକୁ କଟକରୁ ପ୍ରହରାଜପୁର ଅଣାଯାଇ କବର ଦିଆଯିବ ବୋଲି ପରିବାର ପକ୍ଷରୁ ସୂଚନା ଦିଆଯାଇଛି ।