ନାବାଳିକାକୁ ଅସଦାଚରଣ ଓ ହତ୍ୟା ଧମକ : ଜଣେ ଗିରଫ
#ଜଗତପୁର(ଏନ୍.ଏମ୍.): ଜଗତପୁର ଥାନା ଅନ୍ତର୍ଗତ ଗୁଜରପୁର ଅଞ୍ଚଳରେ ଜଣେ ନାବାଳିକାକୁ ଅସଦାଚରଣ କରିବା ଅଭିଯୋଗରେ ଜଗତପୁର ଥାନା ପୁଲିସ ଜଣଙ୍କୁ ଗିରଫ କରି ଆଜି କୋର୍ଟଚାଲାଣ କରିଛି । ଗିରଫ ଅଭିଯୁକ୍ତର ନିଜ ଘର ସାଲେପୁର ହୋଇଥିଲାବେଳେ ତା’ର ନାମ ନୃସିଂହ ଚରଣ ବେହେରା(୪୦) ବୋଲି ଜଣାପଡ଼ିଛି । ନୃସିଂହ ଜଗତପୁର ଥାନା ଅନ୍ତର୍ଗତ ଗୁଜରପୁର ବସନ୍ତ ବିହାରରେ କିଛି ବର୍ଷ ଧରି ରହୁଥିଲା । ତେବେ ଗୁଜରପୁର ବସନ୍ତ ବିହାରରେ ରହୁଥିବା କେନ୍ଦୁଝର ଜିଲ୍ଲା ତେଲକୋଇ ଥାନା ଅନ୍ତର୍ଗତ କାଳିଆହାଟ ଗ୍ରାମର ଜଣେ ବ୍ୟକ୍ତିଙ୍କ ନାବାଳିକା କନ୍ୟାକୁ ନୃସିଂହ ଘରକୁ ଡାକି ତା ସହିତ ଅସଦାଚରଣ କରିଥିଲା । ଏଥି ସହିତ ଏ ବିଷୟରେ କାହାକୁ କହିଲେ ଜୀବନରୁ ମାରିବେଦାର ଧମକ ମଧ୍ୟ ଦେଇଥିବା ଘଟଣା ସମ୍ପର୍କରେ ଝିଅର ପିତା ଜଗତପୁର ଥାନାରେ ଅଭିଯୋଗ ଦେବା ପରେ ଜଗତପୁର ଥାନା ପୁଲିସ କେସ ନମ୍ବର ୭୨/୨୦୨୩ ରେ ଦଫା ୨୯୪/୩୫୪(ଏ)/୫୦୬/୩୪ ଆଇପିସି ଅନୁଯାଇ ଅଭିଯୁକ୍ତକୁ ଆଜି କୋର୍ଟଚାଲାଣ କରିଥିବା ଆଇଆଇସି ରବୀନ୍ଦ୍ର ମେହେର ସୂଚନା ଦେଇଛନ୍ତି ।