ଗଣିଆ ଅଞ୍ଚଳରେ ଭୟାବହ ଅଗ୍ନିକାଣ୍ଡ: ୮ ବଖରା ଘର ଭସ୍ମୀଭୁତ
#ଗଣିଆ (ଏନ୍.ଏମ୍.): ନୟାଗଡ଼ ଜିଲ୍ଲା ଗଣିଆ ବ୍ଲକ ଅଞ୍ଚଳରେ ଭୟାବହ ଅଗ୍ନିକାଣ୍ଡ ଘଟି ୮ବଖର ଘର ଭଷ୍ମିଭୂତ ହୋଇଯାଇଛି । ଗଣିଆ ବ୍ଳକ ଅନ୍ତର୍ଗତ କରଡ଼ାପଡ଼ା ପଞ୍ଚାୟତର ଗୌଡ଼ତୁମାଣ୍ଡି ଗ୍ରାମରେ ଏହି ଅଗ୍ନିକାଣ୍ଡ ଘଟିଥିବା ଜଣାପଡ଼ିଛି । ଉକ୍ତ ଗ୍ରାମର ବିଶ୍ୱନାଥ ବେହେରା ଘରେ ଶୋଇଥିବା ସମୟରେ ପ୍ରାୟ ଭୋର ୫ଟା ସମୟରେ ଅଗ୍ନିକାଣ୍ଡ ଘଟିଥିଲା । ତେବେ ଘର ପୋଡ଼ିଯାଉଥିବା ଦେଖି ସ୍ଥାନୀୟ ଗାଁ ଲୋକ ହୋହାଲା ହୋଇଥିଲେ । ଅଗ୍ନିର ପ୍ରକୋପ ପ୍ରଖର ଥିବାରୁ ଏହାକୁ ଆୟତ କରିବା ସମ୍ଭବପର ନଥିଲା । ଫଳରେ ଦମକଳ ବାହିନୀ ପହଞ୍ଚିବା ବେଳକୁ ନିଆଁ ୮ଟି ଘରକୁ ବ୍ୟାପି ସାରିଥିଲା । ତେବେ ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ନିଆ ନିଭାଇବା କାର୍ଯ୍ୟରେ ଲାଗିପଡ଼ିଥିଲେ । ଅଗ୍ନିଶମ ଅଧିକାରୀ ବିଜୟାନନ୍ଦ ପରିଡାଙ୍କ ନେତୃତ୍ୱରେ ଅଗ୍ନିଶମ କର୍ମଚାରୀମାନେ ଦୀର୍ଘ ସମୟ ଧରି ସଂଘର୍ଷ କରିବା ପରେ ନିଆଁକୁ ଆୟତ କରିଥିଲେ । ତେବେ ବିଶ୍ୱନାଥଙ୍କ କହିବା ମୁତାବକ ଧାନ ୨ଡୋଲି, ୨ଟି ସାଇକେଲ, ୪ଗୋଟି ଛେଳିଛୁଆ, ଓ ଘରର ସମସ୍ତ ଆସବାବପତ୍ର ପୋଡ଼ି ଯାଇଛି । ଖବର ପାଇ ଘଟଣାସ୍ଥଳରେ ଆଡ଼କଟା ରାଜସ୍ୱ ନିରୀକ୍ଷକ ପହଞ୍ଚି କ୍ଷୟକ୍ଷତିର ଆକଳନ କରିବା ସହିତ ଜରିପାଲ ପ୍ରଦାନ କରିଥିଲେ । ତେବେ ବିଶ୍ୱନାଥ ଜଣେ ଗରୀବ ଶ୍ରେଣୀର ଲୋକ ହୋଇ ଥିବାରୁ ଛେଳି ଚରାଇ ନିଜର ଜୀବିକା ନିର୍ବାହ କରୁଥିଲେ । ତେଣୁ ତାଙ୍କୁ ସରକାରଙ୍କ ତରଫରୁ ସହାୟତା ଯୋଗାଇଦେବାକୁ ସାଧାରଣରେ ଦାବି ହେଉଛି ।