କାଳୀ ଭସାଣିରେ ମନ ମୋହିଲା ପାରମ୍ପରିକ ବାଦ୍ୟ ସାଙ୍ଗକୁ ଅଘୋରୀ ବାବାଙ୍କ ନୃତ୍ୟ
କଟକ(ଏନ୍.ଏମ୍.): ଚଳିତ ବର୍ଷ କଟକ କାଳୀ ଭସାଣିରେ ପାରମ୍ପରିକ ବାଦ୍ୟ ସାଙ୍ଗକୁ ଅଘୋରୀ ବାବାଙ୍କ ନୃତ୍ୟ ବେଶ ଆକର୍ଷଣ ସୃଷ୍ଟି କରିଛି । ବିଭିନ୍ନ ବାଦ୍ୟର ତାଳେ ତାଳେ ଦୁଲୁକୁଛି କଟକ ସହର । ଘଣ୍ଟ, ଶଙ୍ଖ, ମହୁରୀ, ଦୁଲୁଦୁଲି ସହିତ ବ୍ରାସବ୍ୟାଣ୍ଡର ତାଳେ ତାଳେ ହୋଇଛି ଶକ୍ତିମୟୀ ପାପନାସିନୀ ମା’ କାଳୀଙ୍କ ଭସାଣି ଶୋଭାଯାତ୍ରା ଅନୁଷ୍ଠିତ ହୋଇଯାଇଛି । ଶାନ୍ତିଶୃଙ୍ଖଳାର ସହ ବଡ଼ ଆନନ୍ଦ ଉଲ୍ଲାସରେ ମଣ୍ଡପର କର୍ମକର୍ତ୍ତା ଓ ଶ୍ରଦ୍ଧାଳୁମାନେ ମା’ଙ୍କୁ ଦେଇଛନ୍ତି ମେଳାଣି । ମା’ଙ୍କ ଭସାଣି ଯାତ୍ରା ପାଇଁ କଟକ ସହର ହୋଇ ଉଠିଛି ଉତ୍ସବ ମୁଖର । କଲେଜଛକ ଠାରୁ ଦେବୀଗଡ଼ା ପର୍ଯ୍ୟନ୍ତ ମେଢ଼ ଶୋଭାଯାତ୍ରା ଲମ୍ବିଥିବାବେଳେ ଶୃଙ୍ଖଳାକୁ ଦୃଷ୍ଟିରେ ରଖି ୪୫ପ୍ଲାଟୁନ ଫୋର୍ସ ନିୟୋଜିତ ଅଛନ୍ତି । ଏଥି ସହିତ ୬୦ଟି ଏଡପୋଷ୍ଟ ଖୋଲାଯାଇଥିବାବେଳେ ୨୩୦ଜଣ ପୁଲିସ ଅଧିକାରୀ ମଧ୍ୟ ମୁତୟନ ହୋଇଛନ୍ତି । ବିଭିନ୍ନ ସ୍ଥାନରେ ମା’ କାଳୀଙ୍କ ମୂର୍ତ୍ତି ଶୋଭାଯାତ୍ରାରେ ଯାଉଥିବାବେଳେ ଶ୍ରଦ୍ଧାଳୁଙ୍କ ମଧ୍ୟରେ ଭାବବିହ୍ୱଳ ପରିବେଶ ସୃଷ୍ଟି ହୋଇଥିଲା । ତେବେ ଚଳିତ ବର୍ଷ କାଳୀ ଭସାଣି ସମୟରେ ଅଘୋରୀ ବାବା ମୁଖ୍ୟ ଆକର୍ଷଣ ପାଲଟିଥିବା ଦେଖିବାକୁ ମିଳିଥିଲା । ଚଳିତ ବର୍ଷ ସହରରେ ୭୫ଟି ମଣ୍ଡପରେ ମା’ କାଳୀଙ୍କ ପ୍ରତିମୂର୍ତ୍ତି ପୂଜା ପାଇଥିଲା । ଆଜି ମୂର୍ତ୍ତିମାନଙ୍କୁ ଦେବୀଗଡ଼ାରେ ବିସର୍ଜନ କରାଯିବା ପରିପ୍ରେକ୍ଷୀରେ କଟକ ସହର ଲୋକାରଣ୍ୟ ହୋଇ ପଡ଼ିଥିବା ଦେଖିବାକୁ ମିଳିଥିଲା । ଭସାଣି ଶୋଭାଯାତ୍ରା ସମୟରେ କଟକର ସମସ୍ତ ରାଜନେତାମାନେ ମଧ୍ୟ ଜାତି, ଧର୍ମ, ବର୍ଣ୍ଣ, ଦଳ ତଥା ଗୋଷ୍ଠୀ ଭୁଲି ଏକକାର ହୋଇ ପଡ଼ିଥିଲେ । ଏହା କଟକ ଭାଇଚାରା ସଂସ୍କୃତିର ଏକ ନିଦର୍ଶନ ।