ଆଠଗଡ଼ ଅଞ୍ଚଳରେ ଏକାଧିକ ଦୁର୍ଘଟଣା ୨ଗୁରୁତର
ଆଠଗଡ଼ (ଏନ୍.ଏମ୍.): ଆଠଗଡ଼ ଅଞ୍ଚଳରେ ଆଜି ଭିନ୍ନଭିନ୍ନ ସ୍ଥାନରେ ଦୁର୍ଘଟଣା ଘଟିବା ସହ ୨ଜଣ ଗୁରୁତର ଆହତ ହୋଇଛନ୍ତି । ଉଭୟଙ୍କ ଅବସ୍ଥା ଶଙ୍କଟାପର୍ଣ୍ଣ ହେବାରୁ ତାଙ୍କୁ ସ୍ଥାନୀୟ ଡାକ୍ତରଖାନାରୁ କଟକ ବଡ଼ମେଡ଼ିକାଲକୁ ସ୍ଥାନାନ୍ତର କରାଯାଇଥିବା ଜଣାପଡ଼ିଛି । ସୂଚନା ଅନୁଯାୟୀ ଆଠଗଡ଼ ଥାନା ଅନ୍ତର୍ଗତ ଖୁଣ୍ଟକଟା କାନାରା ବ୍ୟାଙ୍କ ସମ୍ମୁଖରେ ଏକ କାର ଦ୍ରୁତଗତିରେ ଆସି ଏକ୍ସେଲ ମୋପେଡକୁ ଧକ୍କା ଦେବାରୁ ଚାଳକ ଖୁଣ୍ଟକଟା ପଞ୍ଚାୟତ ରେଗେଡାପଡା ଗ୍ରାମର ଯୋଗୀ ନାଥ (୬୦) ବର୍ଷ ଛିଟିକି ପଡ଼ିବା ସହ ଗୁରୁତର ଆହତ ହୋଇଥିଲେ । ସ୍ଥାନୀୟ ଲୋକେ ଉଦ୍ଧାର କରି ୧୦୮ ଆମ୍ବୁଲାନ୍ସ ସହାୟତାରେ ଆଠଗଡ଼ ଡାକ୍ତରଖାନାରେ ଭର୍ତ୍ତି କରିଥିଲେ । ସେଠାରେ ତାଙ୍କ ଅବସ୍ଥା ଗୁରୁତର ହେବାରୁ ତାଙ୍କୁ ଅଧିକ ଚିକିତ୍ସା ପାଇଁ କଟକ ବଡ଼ ଡ଼ାକ୍ତରଖାନା ରେଫର କରାଯାଇଥିବା ଡାକ୍ତରଖାନା ସୂତ୍ରରୁ ଜଣାପଡିଛି । ତେବେ ଘଟଣା ଘଟାଇ ଉକ୍ତ କାରଟି ଫେରାର ହୋଇଯାଉଥିବା ବେଳେ ବୀରକିଶୋରପୁର ଛକ ଠାରେ କାରକୁ ସ୍ଥାନୀୟ ଲୋକେ ଅଟକ ରଖି ପୁଲିସକୁ ହସ୍ତାନ୍ତର କରିଛନ୍ତି । ସେହିଭଳି ବୀରକିଶୋର ପୁର ଆକ୍ସିସିସ ବ୍ୟାଙ୍କ ସମ୍ମୁଖରେ ହାଇୱା ଟ୍ରକ ଧକ୍କାରେ ଢେଙ୍କାନାଳ ଜିଲ୍ଲା ଶଙ୍କରପୁର ପଞ୍ଚାୟତ ପାମାଳ ଗ୍ରାମର ବିଜୟ କୁମାର ପ୍ରଧାନ (୪୫) ଗୁରୁତର ଆହତ ହୋଇଛନ୍ତି । ମିଳିଥିବା ସୂଚନା ଅନୁଯାୟୀ ଶ୍ରୀ ପ୍ରଧାନ ତାଙ୍କ ପୁଅ ଓମ୍ ପ୍ରକାଶକୁ ସାଇକେଲରେ ଧରି ଆଠଗଡ଼କୁ ଡ୍ରେସ୍ କିଣିବାକୁ ଆସୁଥିବା ବେଳେ ୬୫ ନମ୍ବର ରାଜ୍ୟ ରାଜପଥ ବୀରକିଶୋର ପୁର ଆକ୍ସିସିସ ବ୍ୟାଙ୍କ ସମ୍ମୁଖରେ ହାଇୱା ଟ୍ରକ ଧକ୍କା ଦେଇଥିଲା । ଶ୍ରୀ ପ୍ରଧାନ ସାଇକେଲରୁ ଖସିପଡିଥିବା ସମୟରେ ହାଇୱା ଟ୍ରକ୍ଟି ତାଙ୍କ ବାମ ହାତ ଉପରେ ଚଢ଼ି ଯିବା ବେଳେ ପୁଅ ଓମ୍ ଅଳ୍ପକେ ବର୍ତ୍ତି ଯାଇଛନ୍ତି । ତେବେ ଘଟଣା ଘଟାଇ ହାଇୱା ଘଟଣାସ୍ଥଳରୁ ଫେରାର ହୋଇଯାଇଥିବା ଜଣାପଡ଼ିଛି । ଖବର ପାଇ ଘଟଣା ସ୍ଥଳରେ ଆଠଗଡ଼ ପୁଲିସ ପହଞ୍ଚି ତଦନ୍ତ ଜାରି ରଖିଛି ।