ଅସହାୟ ଲୋକଙ୍କୁ ଶୀତ ବସ୍ତ୍ର ବଣ୍ଟନ
#କଟକ(ଏନ୍.ଏମ୍.): ସମ୍ପ୍ରତି ପ୍ରବଳ ଶୀତର ପ୍ରକୋପ ଜନଜୀବନକୁ ଅସ୍ତବ୍ୟସ୍ତ କରିଦେଉଥିବାବେଳେ ଅସହାୟ ବ୍ୟକ୍ତିମାନଙ୍କ ପାଇଁ ଏହା ଦୁର୍ବିସହ ହୋଇ ପଡ଼ିଛି । ପ୍ରବଳ ଶୀତରେ ଥରୁଥିବା ଅସହାୟ, ଗରିବ ଲୋକମାନଙ୍କୁ ଏଥିରୁ ସୁରକ୍ଷା ଦେବା ନିମନ୍ତେ ଆଜି ସ୍ଥାନୀୟ କାଳିଆବୁଦା ସ୍ଥିତ ମା’ ଶ୍ୟାମା କାଳି ମନ୍ଦିର ପରିସରରେ ଶୀତ ବସ୍ତ୍ର ବିତରଣ କାର୍ଯ୍ୟକ୍ରମ ଅନୁଷ୍ଠିତ କରାଯାଇଛି । ବିଶେଷ କରି ଏହି ମନ୍ଦିର ପରିସରରେ ବହୁ ଗରିବ, ଅସହାୟ, ଭିନ୍ନକ୍ଷମ ବ୍ୟକ୍ତିମାନେ ଭିକ୍ଷାବୃତ୍ତି କରି ପେଟ ପୋଷୁଥିବା ଲୋକଙ୍କୁ ଶୀତବସ୍ତ୍ର ପ୍ରଦାନ କରାଯାଇଥିଲା । ଏହି କାର୍ଯ୍ୟକ୍ରମରେ ସମାଜସେବୀ ରୁପାଲୀ ଲେଙ୍କାଙ୍କ ସହଯୋଗରେ ଦୟନୀୟ ଅବସ୍ଥାରେ ଥିବା ଲୋକମାନଙ୍କୁ କମ୍ବଳ ଦିଆଯାଇଥିଲା । ତେବେ ସମାଜସେବୀଙ୍କ ଏଭଳି ପ୍ରୟାସକୁ ବିଭିନ୍ନ ମହଲରେ ସ୍ୱାଗତ କରାଯିବା ସହ ଉଚ୍ଚ ପ୍ରଶଂସା କରାଯାଇଛି । ଏହି କାର୍ଯ୍ୟକ୍ରମରେ ଶ୍ରୀମତୀ ଲେଙ୍କାଙ୍କ ସହ ଯୁବନେତା ଲୋକନାଥ ଲେଙ୍କା, ସମାଜସେବୀ ଅଶୋକ ମହାନ୍ତି, ଗ୍ରାମ ଅଧିକାରୀ ଗଣେଶ ଚନ୍ଦ୍ର ରାଉତଙ୍କ ସମେତ ଅନେକ ବୁଦ୍ଧିଜୀବୀ ଓ ସମାଜସେବୀ ଉପସ୍ଥିତ ଥିଲେ । ଆଗାମୀ ଦିନରେ ଏଭଳି କାର୍ଯ୍ୟକ୍ରମ ଜାରି ରହିବ ବୋଲି ଶ୍ରୀମତୀ ଲେଙ୍କା ପ୍ରକାଶ କରିଛନ୍ତି ।