ତିରିଂ ତହସିଲ ରାମବେଡା ନଦୀଘାଟରୁ ଝାଡଖଣ୍ଡକୁ ଚୋରା ବାଲି ଚାଲାଣ ନେଇ ଉପଜିଲ୍ଲାପାଳଙ୍କ ଦ୍ୱାରସ୍ଥ ହେଲେ ଗ୍ରାମବାସୀ
#ରାଇରଙ୍ଗପୁର(ଏନ୍.ଏମ୍.): ଦିନକୁ ଦିନ ଚୋରା ବାଲି ମାଫିଆଙ୍କ ପ୍ରାଦୁର୍ଭାବ ହୁ ହୁ ହୋଇ ବଢି ଚାଲିଛି । ଦିବାରାତ୍ର ପ୍ରଶାସନ ଓ ପୋଲିସ ଜଣାତରେ ଚୋରା ବାଲି ଚାଲାଣ ବାହାର ରାଜ୍ୟକୁ ଭାରିଯାନ ଦ୍ୱାରା ବେଧଡକ ଭାବେ ହେଉଥିବା ଅଭିଯୋଗ ହେଉଛି । ମୟୂରଭଞ୍ଜ ଜିଲ୍ଲାର ସିମାନ୍ତ ତିରିଂ ତହସିଲ ଅଧିନସ୍ଥ ରାମ୍ୱେଡା ରାଜସ୍ୱ ଗ୍ରାମ ସନ୍ନିକଟ ରାମବେଡା ନଦୀଘାଟର ବାଲି ଉତ୍ତୋଳନ ପାଇଁ ଚଳିତ ବର୍ଷ ନିଲାମ ହୋଇନାହିଁ । ଯାହାର ସୁଯୋଗ ନେଇଛନ୍ତି ଆନ୍ତଃ ରାଜ୍ୟ ବାଲି ମାଫିଆ ରାକେଟ । ପ୍ରଶାସନ ଜାଣିଶୁଣି ନୀରବ ଦ୍ରଷ୍ଟା ଚାଲିଛି । ରାତିସାରା ଭାରିଯାନ ଦ୍ୱାରା ବାହାର ରାଜ୍ୟକୁ ବାଲି ଚୋରା ଚାଲାଣ କରାଯାଉଛି । ବାଲି ଚୋରା ଚାଲାଣ ଦ୍ୱାରା ସରକାରଙ୍କର କୋଟି କୋଟି ଟଙ୍କାର ରାଜସ୍ୱ କ୍ଷତି ହେଉଛି । ଅନ୍ଧାର ରାତିରେ ଭାରିଯାନ ଦ୍ୱାରା ବାଲି ଚୋରା ଚାଲାଣ ଯୋଗୁଁ ରାସ୍ତାଘାଟ ନଷ୍ଟ, ଧନ ଜୀବନ କ୍ଷୟକ୍ଷତି, ଛୋଟ ବଡ଼ ଦୁର୍ଘଟଣା ଘଟୁଛି ଗ୍ରାମବାସୀମାନେ ଅଭିଯୋଗ କଲେ ମାଫିଆମାନେ ଗ୍ରାମବାସୀଙ୍କୁ ଧମକ ଚମକ ଦେଉଛନ୍ତି । ଗ୍ରାମବାସୀମାନେ ଭୟଭୀତ ଅବସ୍ଥାରେ ଅଛନ୍ତି । ଏହାକୁ ନେଇ ରାମ୍ୱେଡା ଗ୍ରାମବାସୀମାନେ ତିରିଂ ତହସିଲଦାର ଚାରୁଲତା ସିଂଙ୍କୁ ଲିଖିତ ଦାବିପତ୍ର ପ୍ରଦାନ କଲେ ମଧ୍ୟ କିଛି ସୁଫଳ ନମିଳିବାରୁ ଆଜି ରାଇରଙ୍ଗପୁର ଉପଜିଲ୍ଲାପାଳଙ୍କ କାର୍ଯ୍ୟାଳୟରେ ଉପଜିଲ୍ଲାପାଳ ସରୋଜ ଦାସଙ୍କୁ ଏକ ଲିଖିତ ଦାବିପତ୍ର ପ୍ରଦାନ କରିଛନ୍ତି । ଲଘୁଖଣିଜ ଦ୍ରବ୍ୟ ଚୋରା ଚାଲାଣ ରୋକିବା ଉପରେ ଅଙ୍କୁଶ ଲଗାଇବା ସହ ମାଫିଆମାନଙ୍କ ଉପରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବା ଉପରେ ନିବେଦନ କରାଯାଇଛି । ଉପଜିଲ୍ଲାପାଳ ଶ୍ରୀ ଦାସ ଏହାଉପରେ ବିହିତ ପଦକ୍ଷେପ ନେବେ ବୋଲି କହିଥିଲେ । ଦାବିପତ୍ର ପ୍ରଦାନ ସମୟରେ ମୟୂରଭଞ୍ଜ ଜିଲ୍ଲାର କଂଗ୍ରେସ ଦଳିତ ସେଲ ସଭାପତି ଭାଗିରଥି ପାତ୍ର,ରାମ୍ୱେଡା ଗ୍ରାମର ସମାଜସେବୀ ମୁରୁମ କାଲୁଣ୍ଡିଆ, ମାନସିଂହ କାଲୁଣ୍ଡିଆ, କୃଷ୍ଣଚନ୍ଦ୍ର କାଲୁଣ୍ଡିଆଙ୍କ ସମେତ ଗ୍ରାମବାସୀମାନେ ଉପସ୍ଥିତ ଥିଲେ । ଆଗକୁ ଯଦି ବେଧଡକ ଚୋରା ବାଲି ଚାଲାଣ ବନ୍ଦ ନହୁଏ ତାହାହେଲେ ଆଗାମୀ ଦିନରେ ରାସ୍ତା ଅବରୋଧ କରିବାକୁ ବାଧ୍ୟ ହେବେ ବୋଲି ଗ୍ରାମବାସୀ ଚେତାବନୀ ଦେଇଛନ୍ତି ।