୫ଲକ୍ଷ ଟଙ୍କା ମାଗି ୫ଟି ଟାଇମର ବୋମା ଖଞ୍ଜିଥିବା ୬ଜଣ ନକଲି ନକ୍ସଲ ଗିରଫ
#ରାୟଗଡ଼ା(ଏନ୍.ଏମ୍.): ୫ଲକ୍ଷ ଟଙ୍କା ଟଙ୍କା ପାଇଁ ୫ଟି ଟାଇମ ବୋମ ଖଞ୍ଜିଥିବା ନକଲି ନକ୍ସଲଙ୍କୁ ରାୟଗଡ଼ା ପୁଲିସ ଗିରଫ କରିଛି । ସୂଚନା ଅନୁଯାୟୀ ଫୋନରେ ଜଣେ ବ୍ୟବସାୟୀଙ୍କୁ ନକ୍ସଲ ନାଁରେ ୫ଲକ୍ଷ ଟଙ୍କା ମାଗିଲେ ଦୁବୃର୍ତ୍ତ । ଟଙ୍କା ନଦେଲେ ଘର ସହ ତାଙ୍କୁ ଉଡ଼ାଇଦେବାକୁ ଧମକ ମଧ୍ୟ ଦେଇଥିଲେ । ଏତିକିରେ ମନ ବୁଝିଲାନି ଯେ, ପାଇଖାନାରେ ଏବଂ ଘରେ ବାହାରେ ୫ଟି ଟାଇମର ବୋମା ମଧ୍ୟ ଖଞ୍ଜି ଦେଇଥିଲେ ଦୁବୃର୍ତ୍ତ । ଏପରି ଘଟଣା ଘଟିଛି ରାୟଗଡ଼ା ଜିଲ୍ଲାରେ । ପୁଲିସ ଏହି ଘଟଣାରେ ୬ଜଣ ନକଲି ନକ୍ସଲଙ୍କୁ ଗିରଫ କରିଛି । ରାୟଗଡ଼ା ଏସପି ବିବେକାନନ୍ଦ ଶର୍ମାଙ୍କ ସୂଚନା ଅନୁଯାୟୀ, ସୁଙ୍ଗେର ଗାଁର ଟୁଟୁ ଗୋପାଳ ନାମକ ଜଣେ ବ୍ୟବସାୟୀଙ୍କୁ ଦୁର୍ବୃତ୍ତମାନେ ନକ୍ସଲ ନାଁରେ ଫୋନରେ ୫ଲକ୍ଷ ଟଙ୍କା ମାଗିଥିଲେ । ପଇସା ନଦେଲେ ଘର ସହ ତାଙ୍କୁ ଉଡ଼େଇ ଦେବେ ବୋଲି ଧମକ ଦେଇଥିଲେ । ଏନେଇ ଶ୍ରୀ ଗୋପାଳ ଥାନାରେ ଅଭିଯୋଗ କରିଥିଲେ । ତେବେ ଗତ ୭ ତାରିଖଦିନ ଘର ପଛପଟ କାନ୍ଥରେ ଟାଇମର ବୋମା ଖଞ୍ଜା ଯାଇଥିବା ଟୁଟୁ ଜାଣିବାକୁ ପାଇଥିଲେ । ଏନେଇ ପୁଲିସକୁ ଖବର ଦିଆଯିବା ପରେ ପୁଲିସ ଓ ବୋମା ନିଷ୍କ୍ରିୟ ଟିମ୍ ଘଟଣାସ୍ଥଳରେ ପହଞ୍ଚି ଖୋଳତାଡ଼ ଆରମ୍ଭ କରିଥିଲେ । ବୋମା ଖୋଜାଖୋଜି ସମୟରେ ଘର ବାହାରେ ଲାଗିଥିବା ଟାଇମର ବୋମାର ସନ୍ଧାନ ମିଳିବା ପରେ ତାହାକୁ ନିଷ୍କ୍ରିୟ କରାଯାଇଥିଲା । ପରେ ବୋମା ନିଷ୍କ୍ରିୟ ଟିମ୍ ସର୍ଚ୍ଚ କଲା ବେଳେ ପାଇଖାନାରେ ଟାଇମର ଖଞ୍ଜା ହୋଇଥିବା ଜଣାପଡ଼ିଥିଲା । ତେବେ ବୋମା ନିଷ୍କ୍ରିୟ ଟିମ୍ ସମସ୍ତ ବୋମାକୁ ନିଷ୍କ୍ରିୟ କରିବାରେ ସଫଳ ହୋଇଥିଲେ । ପୁଲିସ ଏହି ଘଟଣାର ତଦନ୍ତ କରି ଏହା ପଛରେ ବଡ଼ ଡକାୟତ ଗ୍ୟାଙ୍ଗର ହାତ ଥିବା ଜାଣିବାକୁ ପାଇଥିଲା । ତେବେ ପୁଲିସ ତଦନ୍ତ କରି ୬ଜଣ ଦୁବୃର୍ତ୍ତଙ୍କୁ ଗିରଫ କରିବା ସହ ପଚରା ଉଚରା ସମୟରେ ଟୁଟୁଙ୍କୁ ଧମକ ଦେବା ସହ ତାଙ୍କ ଘରେ ଟାଇମର ବୋମା ଖଞ୍ଜିଥିବା ସ୍ୱିକାର କରିଥିଲେ ବୋଲି ରାୟଗଡ଼ା ଏସ୍.ପି. ଶ୍ରୀ ଶର୍ମା ସୂଚନା ଦେଇଛନ୍ତି । ସେମାନଙ୍କ ନିକଟରୁ ବିଦ୍ୟୁତ ତାର, ଚାରୋଟି ମୋବାଇଲ ଓ ସିଲିଣ୍ଡର ଜବତ ହୋଇଥିବା ଜଣାପଡ଼ିଛି ।