ହୋଲିର ରଙ୍ଗଖେଳ ପାଲଟିଲା କାଳ, ମହାନଦୀରେ ଗାଧୋଇବା ବେଳେ ଜଣେ ନିଖୋଜ ଅନ୍ୟଜଣେ ମୃତ
#ଚୌଦ୍ୱାର(ଏନ୍.ଏମ୍.): ରଙ୍ଗର ଉତ୍ସବ ହୋଲି କାହା ପାଇଁ ଖେଳ ପାଲଟିଛି ତ ଆଉ କାହା ପାଇଁ କାଳ । ଆଜି ରଙ୍ଗର ଉତ୍ସବ ହୋଲି କେତେକ ପରିବାର ପାଇଁ ଆଣି ଦେଇଛି ଦୁଃଖ । ହୋଲି ଖେଳ ସାରି ରଙ୍ଗ ଛଡ଼ାଇବାକୁ ନଦୀକୁ ଯାଇଥିବାବେଳେ ଦେହର ରଙ୍ଗର ଛଡ଼ାଇବା ପୂର୍ବରୁ ଜୀବନର ରଙ୍ଗ ଫିକା ପଡ଼ିଯାଇଛି । ବିଭିନ୍ନ ସ୍ଥାନରେ ଆଜି ହୋଲିଖେଳ ବେଳେ ନଦୀରେ ଗାଧୋଇବାକୁ ଯାଇଥିବାବେଳେ ଏକାଧିକ ଲୋକଙ୍କ ପ୍ରାଣ ଯାଇଛି । ତେବେ ଏଭଳି ଆଉ ଏକ ଅଭାବନୀ ଘଟଣା ଦେଖିବାକୁ ମିଳିଛି କଟକ ଜିଲ୍ଲା ଟାଙ୍ଗୀ ଚୌଦ୍ୱାର ଅଞ୍ଚଳରେ । ଚୌଦ୍ୱାର ଥାନା ଅନ୍ତର୍ଗତ କୟଳପଡ଼ା ପଞ୍ଚାୟତ ନୂଆ ପାଟଣା ଗ୍ରାମରେ ଘଟିଛି ଏଭଳି ଅଘଟଣ । ଆଜି ହୋଲି ଖେଳ ସାରି ମହାନଦୀକୁ ଗାଧୋଇବାକୁ ଯାଇଥିବାବେଳେ ଜଣେ ବ୍ୟକ୍ତି ପାଣିରେ ବୁଡ଼ି ମୃତ୍ୟୃବରଣ କରିଥିବାବେଳେ ଅନ୍ୟଜଣେ ନିଖୋଜ ହୋଇ ଯାଇଛନ୍ତି ।
ତେବେ ନିଖୋଜ ବ୍ୟକ୍ତି ଜଣକ ହେଲେ ସଞ୍ଜୟ ପରିଡ଼ା (୪୦) ବୋଲି ଜଣାପଡ଼ିଛି । ସେ ଆଜି ହୋଲି ଥିବାରୁ ରଙ୍ଗଖେଳ ସାରି ମହାନଦୀକୁ ଗାଧୋଇ ବାକୁ ଯାଇଥିବାବେଳେ ହଠାତ୍ ତାଙ୍କର ଗୋଡ଼ ଖସି ଯାଇଥିଲା, ଫଳରେ ସେ ଦୂରକୁ ଭାଷି ଯିବା ସହ ବୁଡ଼ି ଯାଇଥିଲେ । ସେହିଭଳି ଉକ୍ତ ଅଞ୍ଚଳ ତଥା ସିମିଳିହାଣ୍ଡ ଗ୍ରାମର ନକୁଳ ଦାସ(୫୫) ଗାଧୋଇବାବେଳେ ହଠାତ୍ ବୁଡ଼ିଯାଇଥିଲେ । କିନ୍ତୁ ନଦୀରେ ତାଙ୍କ ସହ କିଛି ଲୋକ ଗାଧୋଉଥିବାବେଳେ ତାଙ୍କୁ ଉଦ୍ଧାର କରି କଟକ ବଡ଼ ମେଡ଼ିକାଲକୁ ପଠାଇଥିଲେ । ମାତ୍ର ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ମାତ୍ର ସଞ୍ଜୟର କୌଣସି ପତ୍ତା ମିଳିନଥିବାବେଳେ ନଦୀରେ ଓଡ଼୍ରାଫ ଟିମ ସହ ସ୍କୁବା ଡ୍ରାଇଭରଙ୍କକ ଏକ ଟିମ ଖୋଜାଖୋଜି ଚଳାଇଛନ୍ତି । ତେବେ ସଂଧ୍ୟା ୮ଟା ପର୍ଯ୍ୟନ୍ତ ତାଙ୍କର କୌଣସି ପତ୍ତା ମିଳିପାରି ନାହିଁ । ଘଟଣାସ୍ଥଳରେ ଟିପିଏମ୍ ଫାଣ୍ଡି ପୁଲିସ ଉପସ୍ଥିତ ରହି ସ୍ଥିତି ନିୟନ୍ତ୍ରଣ କରିଥିଲା ।