ସେନା ପୋଷାକ ପିନ୍ଧି ଅଡ଼ୁଆରେ ପ୍ରଧାନମନ୍ତ୍ରୀ ମୋଦି, ପିଏମଓକୁ ଗଲା କୋର୍ଟ ନୋଟିସ
ଲକ୍ଷ୍ନୌ(ଏଜେନ୍ସି): ଭାରତୀୟ ସେନାର ପୋଷାକ ପିନ୍ଧି ବିବାଦରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଗତବର୍ଷ କଶ୍ମୀର ଯିବା ସମୟରେ ପ୍ରଧାନମନ୍ତ୍ରୀ ମୋଦି ସେନା ପୋଷାକ ପିନ୍ଧିଥିଲେ । ତେବେ ଏହା ବିରୋଧରେ ଆଗତ ଆବେଦନର ଶୁଣାଣି କରି ଉତ୍ତର ପ୍ରଦେଶର ଗୋଟିଏ ଜିଲ୍ଲା କୋର୍ଟ ପ୍ରଧାନମନ୍ତ୍ରୀ କାର୍ଯ୍ୟାଳୟ(ପିଏମଓ)କୁ ନୋଟିସ କରିଛନ୍ତି।
ଆବେଦନକାରୀ ଶୁଣାଣି ବେଳେ ଏପରି ପୋଷାକ ପରିଧାନ ଦଣ୍ଡନୀୟ ଅପରାଧ ବୋଲି କୋର୍ଟଙ୍କୁ ଜଣାଇଛନ୍ତି । ମୋଦିଙ୍କ ସେନା ପୋଷାକ ପରିଧାନକୁ ବିରୋଧ କରି ପ୍ରୟାଗରାଜ କୋର୍ଟରେ ଏକ ଆବେଦନ କରାଯାଇଥିଲା । ଏଥିରେ ଦର୍ଶାଯାଇଛି ଯେ ଦେଶର ସୈନ୍ୟ, ସେଲର ଓ ଏୟାରମ୍ୟାନଙ୍କ କୌଣସି ଜିନିଷକୁ ସାଧାରଣ ଲୋକ ବ୍ୟବହାର କରିବା ଆଇପିସିର ଧାରା ୧୪୦ ଅନୁଯାୟୀ ଦଣ୍ଡନୀୟ ଅପରାଧ । ଆଇନଜୀବୀ ରାକେଶ ନାଥ ପାଣ୍ଡେଙ୍କ ଯୁକ୍ତି ଶୁଣିବା ପରେ ଜିଲ୍ଲା ଜଜ ନଳୀନ କୁମାର ଶ୍ରୀବାସ୍ତବ ପିଏମଓକୁ ନୋଟିସ କରିଥିବା ଜଣାପଡ଼ିଛି । ଶ୍ରୀ ପାଣ୍ଡେ ପ୍ରଥମେ ଗତବର୍ଷ ଡିସେମ୍ବର ମାସରେ ଏସଂକ୍ରାନ୍ତ ଆବେଦନ ମୁଖ୍ୟ ଜୁଡିସିଆଲ ମାଜିଷ୍ଟ୍ରେଟ ହରେନ୍ଦ୍ର ନାଥଙ୍କ ନିକଟରେ ଦାଖଲ କରିଥିଲେ । କିନ୍ତୁ ଏହା ତାଙ୍କ ବିଚାର ପରିସର ମଧ୍ୟରେ ଆସୁ ନଥିବାରୁ ଆବେଦନ ଖାରଜ ହୋଇଥିଲା । ଏହାକୁ ଶ୍ରୀ ପାଣ୍ଡେ ଜିଲ୍ଲା କୋର୍ଟରେ ଚ୍ୟାଲେଞ୍ଜ କରିଥିଲେ । ଏହାକୁ ଗ୍ରହଣ କରି ଜିଲ୍ଲା କୋର୍ଟ ପିଏମଓକୁ ନୋଟିସ କରିଛନ୍ତି । ଏବେ ମାମଲାର ପରବର୍ତ୍ତୀ ଶୁଣାଣି ମାର୍ଚ୍ଚ ୨ରେ ହେବ । ସୂଚନାଯୋଗ୍ୟ, ଗତବର୍ଷ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦୀପାବଳି ପାଳିବା ପାଇଁ ଜମ୍ମୁ-କଶ୍ମୀରର ନୌଶେରା ସେକ୍ଟରରେ ପହଞ୍ଚିଥିଲେ । ଏହି ସମୟରେ ସେ ସେନା ପୋଷାକ ପରିଧାନ କରିବା ସହ ଯବାନମାନଙ୍କ ସହ ଦୀପାବଳି ଉତ୍ସବ ପାଳନ କରିଥିଲେ । ଏହି ଅବସରରେ ପ୍ରଧାନମନ୍ତ୍ରୀ ମୋଦି ସେନା ବାହିନୀ ପାଇଁ ସରକାର ନେଇଥିବା ନେଇଥିବା ପଦକ୍ଷେପ ଗୁଡ଼ିକ ବିଷୟରେ ଯବାନଙ୍କୁ ଅବଗତ କରାଇ ଯବାନଙ୍କୁ ଉତ୍ସାହିତ କରାଇଥିଲେ ।