ସେଣ୍ଟ ଜାଭିୟର୍ସ ପକ୍ଷରୁ ଦୀପାବଳୀ ଉତ୍ସବ
#କଟକ(ଏନ୍.ଏମ୍.): ସ୍ଥାନୀୟ ନୂଆବଜାର ସ୍ଥିତ ସେଣ୍ଟ ଜାଭିୟର୍ସ ଇଂରାଜୀ ମାଧ୍ୟମ ବିଦ୍ୟାଳୟରେ ଦୀପାବଳୀ ଉତ୍ସବ ମହାସମାରୋହରେ ପାଳିତ ହୋଇଯାଇଛି । ଉତ୍ସବରେ ମୁଖ୍ୟଅତିଥି ଭାବେ ସ୍ନିଗ୍ଧା ମହାନ୍ତି ଓ ନିମନ୍ତ୍ରିତ ଅତିଥି ଭାବେ ସାମର୍ଥ ମହାନ୍ତି ଯୋଗ ଦେଇଥିଲେ । ବିଦ୍ୟାଳୟର ନିର୍ଦ୍ଦେଶକ ପ୍ରଭୂଚରଣ ମହାନ୍ତିଙ୍କ ଅଧ୍ୟକ୍ଷତାରେ ଆୟୋଜିତ ଏହି ଉତ୍ସବରେ ଅନେକ ସାଂସ୍କୃତିକ କାର୍ଯ୍ୟକ୍ରମ ଯଥା ନୃତ୍ୟ ସଂଗୀତ ମାଧ୍ୟମରେ କୋମଳ ମତି ଛାତ୍ର ଛାତ୍ରୀ ମାନେ ଭାରତୀୟ ସଂସ୍କୃତି ଓ ଚେତନାରେ ଦୀପାବଳୀର ଗୁରୁତ୍ୱକୁ ଆଲୋକପାତ କରିଥିଲେ । ଶ୍ରୀ ମହାନ୍ତି ଜାଭିୟର୍ସ ବିଦ୍ୟାଳୟର କାର୍ଯ୍ୟକ୍ରମକୁ ନିଜର ଭାଷଣ ଜରିଆରେ ଭୂୟସୀ ପ୍ରଶଂସା କରିଥିଲେ । ମୁଖ୍ୟଅତିଥି ଶ୍ରୀମତୀ ମହାନ୍ତି ସମସ୍ତଙ୍କୁ ଦୀପାବଳୀର ଶୁଭକାମନା ଜଣାଇବା ସହ ଏହାକୁ ପ୍ରଦୁଷଣ ମୁକ୍ତ ଭାବେ ପାଳନ କରିବାକୁ ଉପଦେଶ ଦେଇଥିଲେ । ବିଭିନ୍ନ ଦେବ ଦେବୀ ଉପସ୍ଥାପନା କରି, ଛାତ୍ରୀମାନେ ଦୀପାବଳୀକୁ ନିରାପଦ ଓ ପ୍ରଦୂଷଣ ମୁକ୍ତ ଭାବେ ପାଳନ କରିବାକୁ ବାର୍ତ୍ତା ଦେଇଥିଲେ । ବିଦ୍ୟାଳୟର ଅଧ୍ୟକ୍ଷ ମହମ୍ମଦ ମୁସ୍ତାଫା ମାଜିଦ୍ ଯୋଗଦେଇ ପରିବେଶ ସନ୍ତୁଳନ କରିବାରେ ଛାତ୍ରଛାତ୍ରୀଙ୍କ ଭୂମିଳା ଓ ଦୀପାବଳୀକୁ ନିରାଡମ୍ବର ଭାବେ ପାଳନ କରିବା ପାଇଁ ଉପଦେଶ ଦେଇଥିଲେ । ବିଦ୍ୟାଳୟର ପ୍ରଧାନଶିକ୍ଷକ ବିୟତ୍ ମିଶ୍ର ଦୀପାବଳୀ ପାଳନ କରିବାର ଆବଶ୍ୟକତା ସମ୍ପର୍କରେ ଆଲୋକପାତ କରିଥିଲେ । ଏହି ଅବସରରେ ବିଦ୍ୟାଳୟ ପରିସରରେ ସ୍ୱତନ୍ତ୍ର ରଙ୍ଗାରଙ୍ଗ ପରିବେଶରେ ଅଭିଭାବକମାନଙ୍କ ନିମନ୍ତେ ପ୍ରଦୀପ ପ୍ରଦର୍ଶନୀ କାର୍ଯ୍ୟକ୍ରମ କରାଯାଇଥିଲା । ସମସ୍ତ ଅଭିଭାବକ ଓ ଛାତ୍ରଛାତ୍ରୀ ଉତ୍ସବର ସଫଳତା ପାଇଁ ବିଦ୍ୟାଳୟର ଅଧ୍ୟକ୍ଷ, ପ୍ରଧାନ ଶିକ୍ଷକ ଓ ଶିକ୍ଷକ, ଶିକ୍ଷୟିତ୍ରୀମାନଙ୍କୁ ନିଷ୍ଠାପର ପ୍ରଚେଷ୍ଟାକୁ ପ୍ରଶଂସା କରିଥିଲେ । ବିଦ୍ୟାଳୟର ଛାତ୍ରଛାତ୍ରୀ ଓ ଶିକ୍ଷକ ଶିକ୍ଷୟିତ୍ରୀ ସ୍ଥାନୀୟ ଖଟବିନ ସାହି ସ୍ଥିତ ଅନାଥାଶ୍ରମକୁ ପରିଦର୍ଶନ କରି ଆର୍ଥିକ ସହାୟତା କରିଥିଲେ । ଅଭିଷେକ ନନ୍ଦ ଧନ୍ୟବାଦ ଦେଇଥିଲେ ।