ସିଏମସି ନିର୍ବାଚନ ପାଇଁ କଟକ ନଗର କଂଗ୍ରେସ ପକ୍ଷରୁ ପ୍ରକାଶ ପାଇଲା ଇସ୍ତାହାର
କଟକ (ଏନ୍.ଏମ୍.): କଟକ ନଗର ଜିଲ୍ଲା କଂଗ୍ରେସ କମିଟି ପକ୍ଷରୁ ସ୍ଥାନୀୟ ସେଲଟର ଛକ ସ୍ଥିତ କଂଗ୍ରେସ କାର୍ୟ୍ୟାଳୟରେ ଚଳିତ ୨୦୨୨ ସିଏମସି ନିର୍ବାଚନ ନିମନ୍ତେ ଇସ୍ତାହାର ଉନ୍ମୋଚିତ ହୋଇଯାଇଛି । ବାରବାଟୀ-କଟକ ବିଧାୟକ ଇଂମହମ୍ମଦ ମୋକିମ ଇସ୍ତାହାରର ଶୁଭ ଉନ୍ମୋଚନ କରି କଂଗ୍ରେସ ଦଳ ସିଏମସି ପରିଷଦ ଗଠନ କାଲେ କଂଗ୍ରେସ ପକ୍ଷରୁ ନିଆଯାଇଥିବା ୧୪ ଗୋଟି ସଂକଳ୍ପକୁ ବାସ୍ତବାୟିତ କରି ଦୁର୍ନୀତି ମୁକ୍ତ, ସ୍ଵଚ୍ଛ ଓ ସମୃଦ୍ଧ କଟକ ସହର ନିର୍ମାଣ ପାଇଁ କଂଗ୍ରେସ ପ୍ରତିଶୃତି ବଦ୍ଧ ବୋଲି ଘୋଷଣା କରିଥିଲେ । କଟକ ନଗର କଂଗ୍ରେସ ସଭାପତି ତଥା ମେୟର ପ୍ରାର୍ଥିନୀ ଗିରିବାଳା ବେହେରା ଇସ୍ତାହାର ଉନ୍ମୋଚନ ଅବସରରେ କଂଗ୍ରେସ ଦଳ ସଂଗ୍ରାମୀ ମନୋଭାବ ନେଇ କଟକ ସହରକୁ ଏକ ଆଦର୍ଶ ଓ ବିକଶିତ ସହରରେ ପରିଣତ କରିବା ପାଇଁ ଇସ୍ତାହାରର ସଂକଳ୍ପକୁ ଅକ୍ଷରେ ଅକ୍ଷରେ କାର୍ୟ୍ୟ କରିବା ବୋଲି ବକ୍ତବ୍ୟରେ କହିଥିଲେ । ଅନ୍ୟମାନଙ୍କ ମଧ୍ୟରେ ବରିଷ୍ଠ କଂଗ୍ରେସ ନେତା ଅଶୋକ ସାମଲ, ବିଶ୍ଵଜିତ ଦାସ, ଶରତ ଚନ୍ଦ୍ର ସେଠି, ମଜୀଦ ଖାନ, ସତ୍ୟାନନ୍ଦ ରାଉତ, ଆର୍ୟ୍ୟବୀର ଲେଙ୍କା, ସୌମ୍ୟରଞ୍ଜନ ଦାସଙ୍କ ସମେତ ସମସ୍ତ କର୍ପୋରେଟର ପ୍ରାର୍ଥୀମାନେ ଉପସ୍ଥିତ ରହିଥିଲେ ।