ରେଭେନ୍ସାର ଜମିକୁ ହସ୍ତାନ୍ତର ପ୍ରତିବାଦରେ ଛାତ୍ର ସଂସଦର ପୂର୍ବତନ ନେତାମାନଙ୍କର ମିଳିତ ବିବୃତି
କଟକ (ଏନ୍.ଏମ୍.): କେବଳ ଦେଶ ନୁହେଁ ସମଗ୍ର ବିଶ୍ୱରେ ନିଜର ପରିଚୟ ସୃଷ୍ଟି କରିଥିବା ଐତିହାସିକ ରେଭେନ୍ସା ବିଶ୍ୱବିଦ୍ୟାଳୟର ୪ଏକର ଜମିକୁ ପରିବା ହାଟ କରିବାର ଘୁଣ୍ୟ ଚକ୍ରାନ୍ତକୁ ରେଭେନ୍ସାର ଛାତ୍ରସଂସଦର ପୂର୍ବତନ ନିର୍ବାଚିତ ପ୍ରତିନିଧିମାନେ ଘୋର ବିରୋଧ କରିଛନ୍ତି । ରେଭେନ୍ସାର ପୂର୍ବତନ ସଭାପତି ଗଣେଶ ତ୍ରିପାଠୀ, ଶିବାଶିଷ ପ୍ରହରାଜ, ନସିମ ସରକାର, ପୂର୍ବତନ ସାଧାରଣ ସମ୍ପାଦକ ପାଭେଲ ପ୍ରିୟଦର୍ଶନ, ଦିଲ୍ଲିପ ସ୍ୱାଇଁ, ସିଦ୍ଧାର୍ଥ ରଥ, ପୂର୍ବତନ ଉପ-ସଭାପତି ନିରୁପମା ବେହେରା, ଅଭିରାମ ବେହେରା, ଶିବାନୀ ସାହୁ, ପ୍ରତ୍ୟୁତପନ୍ନା ନାୟକ, ସବିତା ସେଠୀ, ପୂର୍ବତନ ସହ-ସାଧାରଣ ସମ୍ପାଦକ ସୁନିଲକାନ୍ତ ନାୟକ, ଭାଗ୍ୟରବି ଦାସ, ବାପୁଜୀ ହେମ୍ବ୍ରମ, ଗୋବିନ୍ଦ ଚନ୍ଦ୍ର ରାୟ, ଲୋପାମୁଦ୍ରା ବେଉରା, କୃଷ୍ଣଚନ୍ଦ୍ର ଜେନା ଏକ ମିଳିତ ବିବୃତିରେ କହିଛନ୍ତି ୧୫୦ ବର୍ଷର ଏହି ମହାନ ଶିକ୍ଷାନୁଷ୍ଠାନର ୪ ଏକର ଜମି ପ୍ରଶାସନ ନେଇଯିବା ଅତ୍ୟନ୍ତ ବେଦନାଦାୟକ ଓ କ୍ଷୋଭର ବିଷୟ । ରେଭେନ୍ସାର ବିକାଶ ପାଇଁ ଚେଷ୍ଟିତ ହେବା ବଦଳରେ ପ୍ରଶାସନ ଏହାକୁ ଧ୍ୱଂସ କରିବାର ଅପଚେଷ୍ଟା କରୁଛନ୍ତି । ରେଭେନ୍ସାରେ ଅଧ୍ୟୟନରତ ହଜାର ହଜାର ଛାତ୍ରଛାତ୍ରୀଙ୍କ ରହିବା ପାଇଁ ଆହୁରି ହଷ୍ଟେଲ, କର୍ତ୍ତବ୍ୟରତ ଅଧ୍ୟାପକ, ହଷ୍ଟେଲ କର୍ମଚାରୀ ଓ ୪ର୍ଥ ଶ୍ରେଣୀ କର୍ମଚାରୀ ମାନଙ୍କ ରହିବା ପାଇଁ ଆହୁରି କ୍ୱାଟର୍ସର ଆବଶ୍ୟକତା ଥିବା ସମୟରେ ସରକାର ଜମି ଯୋଗାଇଦେବା ସହ ଛାତ୍ରାବାସ ଓ କ୍ୱାଟର୍ସ ନିର୍ମାଣ କରିବା ବଦଳରେ ରେଭେନ୍ସାର ଜମି ନେଇଯିବାର ଚକ୍ରାନ୍ତ କିପରି ସରକାରଙ୍କୁ ଜୁଟିଲା ତାହା ପୂର୍ବତନ ଛାତ୍ର ପ୍ରତିନିଧିମାନେ ପ୍ରଶ୍ନ କରିଛନ୍ତି । ତେଣୁ ତୁରନ୍ତ ସରକାର ରେଭେନ୍ସାର ୪ ଏକର ଜମିକୁ ପରିବା ହାଟ କରିବାର ଏହି କୁଚକ୍ରାନ୍ତରୁ କ୍ଷ୍ରାନ୍ତ ହୋଇ ସେହି ଜମିରେ ରେଭେନ୍ସା ବିଶ୍ୱବିଦ୍ୟାଳୟରେ କର୍ତ୍ତବ୍ୟରତ ହଷ୍ଟେଲ କର୍ମଚାରୀ ଓ ୪ର୍ଥ ଶ୍ରେଣୀ କର୍ମଚାରୀ ମାନଙ୍କ ରହିବା ପାଇଁ କ୍ୱାଟର୍ସ ଓ ଛାତ୍ରଛାତ୍ରୀମାନଙ୍କ ପାଇଁ ଛାତ୍ରବାସ ନିର୍ମାଣ କରିବାର ଦାବି ପୂର୍ବତନ ନିର୍ବାଚିତ ଛାତ୍ର ପ୍ରତିନିଧିମାନେ କରିବା ସହ ପ୍ରଶାସନର ଏହି କୁଚକ୍ରାନ୍ତ ପ୍ରତିବାଦରେ ରାଜ୍ୟ, ଦେଶ ତଥା ବିଦେଶରେ ରହୁଥିବା ରେଭେନ୍ସୀୟ ମାନେ ପ୍ରତିବାଦ କରିବାକୁ ଆହ୍ୱାନ କରିଛନ୍ତି ।