ରକ୍ତ ଦେବା ପାଇଁ ଲାଞ୍ଚ ନେଇ ଭିଜିଲାନ୍ସ ଜାଲରେ ରକ୍ତ ଭଣ୍ଡାର କର୍ମଚାରୀ
କଟକ(ଏନ୍.ଏମ୍): କୁହା ଯାଉଛି ରକ୍ତଦାନ ଜୀବନ ଦାନ । ଏହି ନ୍ୟାୟରେ ରାଜ୍ୟରେ ବହୁ ଜନସାଧାରଣ ସ୍ୱେଚ୍ଛାକୃତ ରକ୍ତଦାନ କରିବାକୁ ଆଗେଇ ଆସିଥାନ୍ତି । ତେବେ ଏହାକୁ ଅଧିକ କ୍ରିୟାଶୀଳ କରିବା ପାଇଁ ରାଜ୍ୟ ସରକାରଙ୍କ ପକ୍ଷରୁ ଜୀବନବିନ୍ଦୁ କାର୍ଯ୍ୟକ୍ରମ କରାଯାଉଛି । ହେଲେ ରକ୍ତଭଣ୍ଡାରରେ ଥିବା ରକ୍ତ ରୋଗୀ ପାଇବା ପାଇଁ ହିନସ୍ତା ହେଉଥିବାବେଳେ କର୍ମଚାରୀଙ୍କୁ ହାତଗୁଞ୍ଜା ଦେବାକୁ ପଡ଼ୁଛି । ଫଳରେ ସରକାରଙ୍କ ଏଭଳି ଜନକଲ୍ୟାଣ ଯୋଜନା ଦିଗହରା ହେଉଛି ।
ପୁନଶ୍ଚ ରୋଗୀକୁ ବଞ୍ଚାଇବା ଲାଗି ଆବଶ୍ୟକ ହେଉଥିବା ରକ୍ତ ଦେବାପାଇଁ ରକ୍ତଭଣ୍ଡାର କର୍ମଚାରୀ ଲାଞ୍ଚ ନେଉଥିବାବେଳେ ଧରାପଡ଼ିବା ପରେ ରକ୍ତକୁ ନେଇ ଚାଲିଥିବା ବେପାରର ପର୍ଦ୍ଦାଫାସ ହୋଇଛି । ରକ୍ତ ପାଇବା ପାଇଁ ଲୋକେ ହଇରାଣ ହେବା ଏବଂ ସେମାନଙ୍କୁ ଆର୍ôଥକ ଶୋଷଣ କରାଯାଉଥିବା ନେଇ ବାରମ୍ବାର ଅଭିଯୋଗ ହେବାପରେ ଭିଜିଲାନ୍ସ ଆଜି ମେଡ଼ିକାଲ୍ରେ ଚଢଉ କରିଥିଲା । ତେବେ ଏହି ଚଢାଉ ସମୟରେ କ୍ୟାନସର ୱାର୍ଡ ନିକଟସ୍ଥ କେନ୍ଦ୍ରୀୟ ବ୍ଲଡ ବ୍ୟାଙ୍କର ଟେକ୍ନିସିଆନ କିଶୋର ଚନ୍ଦ୍ର ସ୍ୱାଇଁ ଲାଞ୍ଚ ନେବାବେଳେ ଭିଜିଲାନ୍ସ ଧରିଛି । ସେ ୨ୟୁନିଟ ରକ୍ତ ଦେବାଲାଗି ଜଣେ ରୋଗୀଙ୍କ ସଂପର୍କୀୟଙ୍କଠାରୁ ୫ହଜାର ଟଙ୍କା ଲାଞ୍ଚ ନେଉଥିବା ବେଳେ ଧରା ପଡ଼ିଥିବା ଭିଜିଲାନ୍ସ ପକ୍ଷରୁ କୁହାଯାଇଛି । କିଶୋର ଠାରୁ ଲାଞ୍ଚ ନେଉଥିବା ଟଙ୍କା ମଧ୍ୟ ଭିଜିଲାନ୍ସ ଜବତ କରିଛି । ଲାଞ୍ଚ ନେଇ ଧରାପଡ଼ିବାପରେ ଭିଜିଲାନ୍ସ କିଶୋରର କଟକ ଚାନ୍ଦିନଚୌକ ଏବଂ ତାଙ୍କ ଜନ୍ମସ୍ଥାନ ଗୋବିନ୍ଦପୁର ଘରେ ଏକକାଳୀନ ଭାବେ ଚଢାଉ ଆରମ୍ଭ ହୋଇଛି । ତେବେ ଚଢ଼ାଉ ପରେ ବିପୁଳ ପରିମାଣର ଆୟବର୍ହିଭୂତ ସମ୍ପତ୍ତି ଠାବ ହେବାର ସମ୍ଭାବନା ରହିଥିବା ଭିଜିଲାନ୍ସ ପକ୍ଷରୁ ସୂଚନା ଦିଆଯାଇଛି ।